Faaaogaina o le Feagaiga Tuai i Lou Olaga
Ioe, O Oe o se Tausimea o le Lalolagi—ae Aua le Atuatuvale!
O le tausia lelei o le siosiomaga o se poloaiga taua, ae e le tatau ona tatou faafaigataina.
Faaleagaina. Faatafunaga o le Togavao. O vasa e tumu i lapisi. Suiga o le Tau.
Pe a e faalogoina nei upu ma faaupuga, e te ono lagona le popole, leai se faamoemoe, po o le le ano ona ua lofituina i faamatalaga.
I tausaga talu ai nei, na aumaia ai e ala o fesootaiga i luma o le gauai o le lalolagi ia atugaluga tau siosiomaga, ma o le vaaia o le tulaga lautele o le mataupu e taua. Ae o nisi taimi, o le iai o lea tioata lautele e mafai ona faafaigata ai ona faailoa poo le a lou tiute patino - pe o le mea muamua, aisea foi o le a e taumafai ai.
O le vaifofo? O le malamalama i lau matafaioi filifilia faalelagi o se tausimea o le foafoaga a le Atua.
Aisea E Tatau Ai Ona Ou Popole?
Na e iloa sa poloaiina e le Tama Faalelagi i tatou uma ina ia auai ma le naunautai i le puipuia o le lalolagi?
I le Mataupu Faavae ma Feagaiga 104:13, ua faalutele mai ai e le Alii lenei valaaulia loloto: “Aua e tatau ia te A’u, o le Alii, ona faia tagata taitoatasi ia tali, o se tausimea i luga o faamanuiaga faaletino, ua Ou faia ma saunia mo a’u meaola.”
Afai e le lava lena o se valaau e faatino, o lo tatou perofeta o aso nei, Peresitene Russell M. Nelson, na folafola mai: “I le avea ai ma e faaaogaina lenei Foafoaga paia, o le a la le mea e tatau ona tatou faia? E tatau ona tatou tausia le lalolagi, ia avea ma tausimea atamamai, ma faasaosaoina mo tupulaga i le lumanai."
O se tausimea o se tagata e vaavaaia se mea ua tuuina atu i lana tausiga. Ua tuuina atu e le Alii le lalolagi i lau tausiga, ma o lau galuega o le tausia lea.
E faigofie ona sui atu le tiute tau le siosiomaga i se isi tagata poo se faalapotopotoga tele atu foi nai lo o oe pe a e lagona o se faafitauli tele e pei o le paneta ma e le mafai ona e faia toatasi.
O le faafouina o le tiute faalelalolagi i le faaleagaga patino o le ki lea i le aloese mai i le lofituina. Manatua: Ua e agavaa tulagaese mo lou tulaga o se tausimea o le lalolagi ona o lou faasinomaga paia o se atalii/afafine o le Atua.
O Fea e Tatau Ona Ou Amata Ai?
Na o lou faitauina lava o le faamatalaga o le galuega. O le a la le isi mea? Ua oo i le taimi e faia ai se auala e faavae i le faatuatua e faasao ai
O ni manatu nei se 10 e te amata ai:
-
Tape le vai pe a le faaaogaina.
-
Saili auala malie e toe faaaoga ai au meatotino tuai.
-
Filifili isi auala e faimalaga ai pe a mafai.
-
Amata se polokalama o auaunaga i lou alalafaga.
-
Ia magafagafa i mea e te faatauina. Fesili, "O le a ou faaaogaina ea nei mea mo se taimi umi?"
-
Ia faaaogaina le malamaalama faalenatura i le tele e mafai ai i le aso.
-
Ia nofouta e uiga i polokalama o le faasao i le lotoifale ma tulafono. O lenei mea e mafai ona faigofie e pei o le mulimulitai i faitotoa o ala o fesootaiga o lau faigamalo i le lotoifale.
-
Faamatagofie lou lalolagi. Piki i luga lapisi, taumafai e toto fugalaau po o laau, ma ia magafagafa pe a tafafao i fafo.
-
Fesoasoani i lou tuaoi. Mafaufau i togalaau, ofoina atu o femalagaaiga, po o le pikiina o a latou oloa toe faaaogaina mo i latou pe afai e leai se latou auaunaga faapena.
-
Tatalo ia iloa le auala e mafai ona faaaoga ai au taleni ma meaalofa faaleagaga ina ia avea ai ma tausimea sili atu o le siosiomaga.
Faapefea Pe Afai Ou Te Le Vaaia Taunuuga?
Sa e faia mea uma i luga o le lisi, ma o lo o tumu pea le sami i lapisi, o tumau pea le faaleagaina o se faafitauli, ma e le o faaleleia lava lau ala o fesootaiga.
Faatali! Ae e te le’i fiu, manatua au "aisea."
I se faigalotu talu ai nei, na saunoa ai le Peresitene Aoao o le Aualofa o Camille N. Johnson e faapea: “E taua tele lo tatou iloa o le sootaga i le va o le tausiga o le lalolagi ma le tausia o o tatou tuaoi. I le tausiga o le lalolagi, o le faamatagofieina o lo tatou siosiomaga faalelotoifale, ma le fesoasoani atu i o tatou alalafaga e faasao, ua tatou faatinoina o ni tausimea atamamai o le lalolagi e faamanuia ai olaga o o tatou tuaoi.”
O taumafaiga uma, tusa lava pe o le a le faatauvaa, o se isi laasaga i le mulimulita’ia o le poloaiga a le Alii e galue o se tausimea i luga o faamanuiaga faalelalolagi.
Ia Fiafia Lou Loto
Na faamalamalama mai e le Alii e faapea “o mea uma e maua mai le eleele, i lona tau, ua faia mo le lelei ma le faaaogaina e le tagata, e faafiafia ai mata ma faaolioli ai le loto” (Mataupu Faavae ma Feagaiga 59:18).
Ia faia le tausimea o le siosiomaga o se faamuamua i lou olaga, ae aua le faatagaina le popole, leai se faamoemoe, po o le fefe e faamalumalu i le olioli lea e sau mai le ola ai i lenei lalolagi matagofie.
Na aoao mai le Epikopo Pulefaamalumalu o Gérald Caussé e faapea, “O na foafoaga matagofie na saunia uma mo lo tatou manuia ma o ni faamaoniga ola o le alofa o le Foafoa mo Ana fanau.”
A o e taumafai e tausia lenei poloaiga ina ia avea ma tausimea lelei atu o le lalolagi, e mafai ona e faatupuina se talisapaia loloto atu mo foafoaga a le Atua ma faatamaoaigaina ai olaga o i latou o siomia oe.