O Lau Misiona Lenei; E Mafai Ona E Faia!

Sa ou mafaufau, "Ai o tausua mai. E tatau ona i ai se mea sese."

O le iloaina o le a ou auauna atu i se misiona e tautala faaFarani i Aferika, sa ou lagonaina ai le le mautonu ma le masalosalo—o lagona sa ou iloaina e sau mai le fili.

Sa ou iloaina foi e leai se tasi mai lo’u atunuu na auauna atu muamua i Cote d’Ivoire ! I le nofoaga autu mo le aoaoina o faifeautalai i Kana, sa ou iloaina ai e leai se tasi iina e tautala faaSipaniolo. Sa lofituina le le mafai ona fesootai atu i la’u lava gagana.

Sa ou manao e togi le solo ma alu i le fale, ae sa ou manatuaina sa i ai foi se aafiaga faapena a Nifae. Ina ua ulu atu o ia i le aai ma vaavaai mo le fale o Lapana, sa ia fai mai, "Ma sa taitaiina au e le Agaga, ona sa le mua’i iloa muamua o mea e tatau ona ou faia" (1 Nifae 4:6).

Sa ou lagona le pei o Nifae. Ma, ina ua uma ona tatalo faatauanau, sa ou lagonaina le filemu. Ina ua oo mai masalosaloga, o le fasifuaitau "O lau misiona lenei, ma e mafai ona e faia" na oo mai i lo’u mafaufau. Ma sa ou iloaina faatasi ai ma le fesoasoani a le Alii, sa mafai ona ou faia.

Ina ua ou taunuu atu i Cote d’Ivoire, sa taia a’u i fale faatauvaa ma le malosi o le susu o le ea. O masina muamua sa faigata, i le tapulaa o le vai ma le eletise. Sa ou tatalo mo le malosi, ma na oo mai le fasifuaitau lava lea e tasi ia te au: "O lau misiona lenei, ma e mafai ona e faia."

I se tasi aso, sa ou tau atu ai i le 3 Nifae 5:13: "Faauta, o au o se soo o Iesu Keriso, le Alo o le Atua. Ua Ia valaauina au e talai atu lana afioga i totonu o ona tagata, ina ia mafai ona latou maua le ola tumau e faavavau."

O lenei mea na suia ai la’u vaaiga. Sa ou aoao e toe faavaa ni aafiaga leaga i ni aafiaga malie ma vaai i faamanuiaga sa ou maua.

Sa amata ona faaitiitia lo’u popole i mea ou te lei mauaina ae matele atu e uiga i mea na manaomia e isi. Faafetai i le faamanuiaina o au e le Alii i le meaalofa o gagana, sa ou aoaoina le faaFarani i totonu o ni nai masina ma malamalama lelei i le Igilisi ina ia mafai ona ou tautala i gagana e tolu! Sa suia o’u masalosaloga ma popolega i le olioli i le auauna atu i le Alii.

Na iu lava ina ou iloaina le mafuaaga na valaauina ai au e auauna atu.

Na aoao mai Elder David F. Evans o le Fitugafulu: "Tou te mananao ina ia e fiafia? … Auauna atu i ou uso a tagata i le avea ai ma se faifeautalai mo le Alii. … O le a suia ai mea uma. … O le a faigata le galuega, ae o le a tele foi le faamalieina tele ma le olioli a o e auauna atu. Afai e te faamaoni i le taimi o lau misiona ma mulimuli ane, o le a e toe tepa i tua i lou olaga ma faapea atu faatasi ma Peresitene [Gordon B.] Hinckley, ‘O mea lelei uma na tutupu ia te au talu mai lena taimi e mafai ona tau uma atu i lena faaiuga ina ia auauna atu i se misiona ma tuuina atu lo’u ola i le Alii.’”

Afai o e popole pe o le a se mea o le a tupu i lou aiga, uo, aoga, galuega, po o naunauga faaleuo, manatua ua folafola mai e le Alii, “Ou te le tuua outou o matua oti: Ou te sau ia te outou” (Ioane 14:18).

“Faagalo lou tagata,” e pei ona saunoa mai Peresitene Hinckley, ma ia e tuu atu uma oe lava i lenei galuega tele. O le a faamanuiaina e le Alii au taumafaiga, o lou aiga, ma lou olaga, ao e tuuina atu uma oe lava ia te Ia.

Afai e te manao e fiafia, mulimuli i le ala o le talalelei, ma afai e te maua le avanoa, alu i se misiona. O faamanuiaga ia e oo mai ia i latou na auauna atu i le Alii o lo o vaaia foi i le mae’a ai o a latou misiona.

Ou te valaaulia foi tagata uma o e gafatia ona saunia ma auauna atu i se misiona. Ua valaaulia i tatou e le Alii e saili Ana fanau o e o lo o vaavaai mo Ia. O le a oo mai tofotofoga, ae o le faatuatua ia Keriso ma se suiga lelei i lau vaaiga, o le a e vaaia ai faamanuiaga a le Atua a o e auauna atu ia te Ia.

E ala i lo’u mafaufau ma le loto e taulai atu i lle Alii, ua suia ai la’u vaaiga faalemafaufau. Ua amata ona ou vaai mo le lelei, ua mou ese lou fefe ma le masalosalo, ma sa mafai ona ou lagonaina le olioli tumau o le ola ai i le talalelei a Iesu Keriso.

Ou te iloa e alofa le Atua ia i tatou ma e silafia patino i tatou, ma ona o lenei mea Na ia auina mai ai Lona Alo Pele E Toatasi, “ina ia le fano se tasi e faatuatua ia te Ia, a ia maua e ia le ola e faavavau (Ioane 3:16).

Na te silafia le nofoaga e manaomia ona tatou auauna atu ai. Ua lata mai le taimi o le a ou maua ai le avanoa e toe vaai ai i lo’u aiga ma molimau atu o Iesu o le Keriso, ma po o fea lava e valaauina ai i tatou e manaomia lava i tatou e le Alii, o Lana talalelei e tutusa lava i gagana uma, ma e moni lava: o lau misiona lenei, ma sa mafai ona ou faia.

E te mafaia foi!