Mai le AM Faalevaiaso
Atonu e Faigata le Salamo i Aso Taitasi—ae E Le Tatau Ona Faapena
Sa foliga faavaivai tagata le salamo i aso taitasi seia oo ina ou malamalama i ai.
Ua ou faalogo i le tele o mea sese e uiga i le salamo.
Mo se taimi umi lava, sa ou le mautinoa pe sa ou salamo "i le ala sa’o." Sa ou aoaoina "laasaga" i le salamo. Ae sa ou lagonaina e pei afai ou te lei mulimuli sa’o i "laasaga uma", e le mafai ona faamagaloina au mo au agasala.
Ae sa ou le mautinoa lelei foi po o le a le ala sa’o e salamo ai.
Ou te ta’u atu i le Tama Faalelagi ua ou salamo ma ole atu ia te Ia mo se faamagaloga, ma a o ta’u atu ia te Ia e uiga i au agasala na fesoasoani ou te lagona ai le faaitiitia o le tausalaina, sa pei foi o se feau—na o se isi lava mea e togi ese mai se lisi faaleagaga o mea e fai. Ou te lei vaai i le taua.
O Le Salamo i Aso Taitasi e … Lelei?
Ae, o nai tausaga ua mavae, na saunoa ai Peresitene Russell M. Nelson, “E leai se mea e sili atu ona saoloto, sili atu ona malualii, pe sili atu ona taua i lo tatou alualu i luma faaletagata lava ia nai lo se taulaiga masani i aso taitasi i le salamo.”
Na faate’ia ai lo’u mafaufau i lenei mea.
Sa ou iloa sa masani ona ou taulimaina le salamo e pei o se meafaigaluega o faalavelave faafuasei - e faatoa fai lava pe a matua talafeagai ai lava. Ae o lea ua faapea mai le perofeta e tatau ona ou faia i aso taitasi uma—ma e tatau ona logo lelei?
O le mea moni, talu ai sa ou mafaufau i le salamo o se lisi umi, tigaina o galuega faatonu, o le manatu o le faia lea i aso uma e foliga e faavaivai tagata ma e sili atu le taufaafefe nai lo le taalo i le taaloga taumatemate o le salamo sa ou masani ai. Sa ou le iloa lava pe o fea o le a amata ai pe o le a ona foliga vaaia mo a’u.
O le a Sao Lava Le Salamo?
E lei leva ona uma lena, ae ou ulufale i le nofoaga autu e aoaoina ai faifeautalai ma amata ona suesue le Talai La’u Talalelei. O iina, na ou faitau ai: "O le salamo o se faagasologa o le liliu atu i le Atua ma le liliu ese mai le agasala. Pe a tatou salamo, o a tatou amioga, manaoga, ma mafaufauga e suia ia ogatasi ma le finagalo o le Atua.”
A o o’u faitauina lena mau, sa fesoasoani mai le Agaga ia te a’u e iloa o le salamo ua le na o se lisi e togi pe a uma ona fai po o se mea faatoa fai pe a tatou faia ni measese tetele.
I lona autu, o le salamo o se suiga.
Ma o lona uiga la e le na o agasala e faatatau i ai. O lona uiga o soo se taimi ou te faatuina ai se sini ina ia avea atili e pei o Iesu Keriso—ina ia tuputupua’e faaleagaga, faaletino, po o le faaleatamai i se ala e ogatasi ma le finagalo o le Atua—o loo ou salamo.
O lenei e moni lava e iai taimi e iai ituaiga o agasala e manaomia ai lo tatou feiloai atu i taitai perisitua mo se fesoasoani ma le taitaiga. Ae pe a ou mafaufau patino i le salamo i aso taitasi, ou te mafaufau iai o se siaki faifaipea ma le Atua e vaai ai pe o o’u faia mea o loo finagalo o Ia ou te faia. Ma pe a fesoasoani mai le Agaga ia te a’u e vaai ou te mafai ona faia ia sili atu, o lona uiga o le salamo o le filifili e suia le ala ma sailia le fesoasoani a le Faaola a o o’u tumau ai i luga o le ala o feagaiga.
E Faapefea La Ona Ou Salamo I Aso Taitasi?
A o o’u taumafai e fuafua pe o le a le uiga o le salamo i aso uma, o upu mai ia Elder David A. Bednar o le Korama a Aposetolo e Toasefululua na fesoasoani mai. Na ia faapea mai:
“O le tatalo anoa i le taeao o se elemene taua i le foafoaga faaleagaga o aso taitasi—ma e muamua i le foafoaga faaletino po o le faataunuuina o feau ma galuega o le aso. …
“I le faaiuga o le aso, tatou te toe tootutuli ai ma toe lipoti atu i lo tatou Tama. … Tatou te salamo, ma faatasi ai ma le fesoasoani mai o le Agaga o le Alii, faailoa ala e mafai ona tatou faia ina ia lelei atili ai taeao.”
I nisi upu: Tatalo i le Atua. Ole atu ia te Ia mo le taitaiga. Usitaia. Toe lipoti atu. Toe fai
O nisi nei o auala ua ou faatinoina ai lena fautuaga i lo’u lava olaga:
-
Ou te setiina ni sini faalevaiaso i le taimi o le sauniga faamanatuga. Ou te tomanatu i mea sa ou faia i le vaiaso ua te’a ma faalogo i le Agaga e uiga i mea ou te galue iai e faaleleia ma suia.
-
Ou te setiina ni sini ma fuafua e ausia na sini ma tusia i latou i se laupapa paepae i lo’u potumoe.
-
A o faagasolo lo’u vaiaso, pe a ou tatalo, ou te talanoaina a’u sini ma lo’u Tama Faalelagi, ole atu mo Lana fesoasoani i le ausiaina, ma toe lipoti atu pe o faapefea ona faagasolo, ma faalogologo mo nisi taitaiga ma faamaoniaga o lo o o’u iai i le ala sa’o.
Filifilia o Ia i Aso Uma
Tatou te le avea faapei o Iesu Keriso e ala i le faatoilaloina o nai agasala lapopoa i le taimi e tasi. Ou te manatu o faaiuga faaleaso laiti, e faalagolago ia te Ia—tasi le pasene le lelei atu i aso taitasi—lea e taitai atu ai i le suiga moni i le aluga o taimi.
E mafai ona tatou filifili e mulimuli ia Iesu Keriso i aso uma. Ma pe a tatou sese, ua tatou maua le faamanuiaga o le salamo, filifili e mulimuli pea lava pea ia te Ia, ma faaauau ona tuputupu a’e i na mea uma. O le salamo lena i aso ia te a’u.