Salamo i Aso Taitasi: O Le A Lena Mea ma Le Auala e Fesoasoani ai ia te Au e Maua ai le Olioli Tumau

Ina ua amata ona ou salamo i aso uma, sa ou le mautinoa po o le a le uiga o lena mea. Sa ou salamo i a’u agasala, ae o le tele o taimi, i le aso e sosoo ai, ou te toe faia ai foi lea lava mea sese e tasi. Sa ou mafaufau, “Aisea e tatau ai ona ou salamo pe afai e le mafai ona ou suia vave a’u mausa leaga?”

Sa ou alu i le Tama Faalelagi ma ta’u atu ia te Ia ou popolega ma fesili atu pe aisea e finagalo ai o Ia ia tatou salamo i aso uma. Sa ou lagonaina le fesootai mai e le Agaga i lo’u mafaufau e faapea, o taimi uma lava ou te salamo ai, e tuuina mai e le Faaola ia te au se avanoa e toe amata ai. Na saunoa mai foi Peresitene Nelson: “O le salamo o le ki lea i le alualu i luma. O le faatuatua mama e faatumauina ai lo tatou agai i luma i luga o le ala o feagaiga.”

O le salamo e le faatatau i le faaatoatoaina o mea; e faatatau i le faaauau pea ona faalagolago ia Keriso e suia ai lo tatou natura i le aluga o taimi! Sa ou iloaina e tusa lava pe a ou faia ia lava mea sese e tasi, pe a ou salamo faamaoni i a’u agasala ma taumafai e suia, o le a Ia fesoasoani mai ia te a’u ia alualu i luma i sina mea itiiti ma sina mea itiiti.

Na saunoa mai Sister Kristin M. Yee, Fesoasoani Muamua i le Au Peresitene Aoao o le Aualofa: “Afai o loo e tauivi ma se tulaga e te manatu ua tatau ona e faatoilaloina i le taimi nei, aua e te fiu. Ia onosai ia te oe lava, tausi au feagaiga, ia salamo soo, saili le fesoasoani mai ou taitai pe a manaomia, ma alu i le maota o le Alii i le tele e te mafaia. Faalogologo ma usitai i uunaiga e auina mai e Ia ia te oe. O le a Ia le lafoa’ia lava Lana sootaga faalefeagaiga ma oe.

O le isi mea na fesoasoani ia te a’u e taulai atu ai i le salamo i aso taitasi o le auai lea i le malumalu. Ou te fiafia i le mana tatou te maua pe a tatou osia feagaiga ma le Alii, ma ua ou lagonaina lena mana i lo’u olaga a o ou filifili e faatuatua i mea e mafai ona fesoasoani mai le Tama Faalelagi ma Iesu Keriso ia te a’u e fai.

E ala i le taulai atu ia i Laua i aso taitasi ma le onosai ia te a’u lava, ua ou lagonaina ai le tuputupu a’e malosi o la’u sootaga ma i Laua. O le tootuli ma talanoa atu i le Tama Faalelagi i po uma e uiga i mea o loo ou taumafai e suia ma le amanaiaina o Lona aao i lo’u olaga, ua fesoasoani foi ia te a’u e lagona ai le olioli i le meaalofa o le Togiola a le Faaola.

O loo i ai se olioli patino e oo mai i le faamamaina o tatou e lo tatou Faaola e ala i le toe tautino atu i a tatou feagaiga ma Ana poloaiga. E ala i a tatou taumafaiga e suia ma lo tatou faalagolago ia te Ia, e mafai ai ona tatou sailia Lana fesoasoani e motusia ai mausa e foliga mai e le mafai na momotu, ole atu mo le faamagaloga, ma faamagalo i tatou lava.

O loo faamanatu mai foi e Sister Yee: “O aso taitasi o se aso fou ua faatumulia i le faamoemoe ma avanoa ona o Iesu Keriso. O aso taitasi e mafai ai e oe ma a’u ona iloa, e faapei ona tautino mai e le Tina o Eva, ‘o le olioli o lo tatou togiolaina, o le olioli o le faaatoatoaina’ [Mose 5:11], o le olioli o le lagonaina o le alofa e le mavae o le Atua mo oe.”

Ua sili atu ona ou lagonaina le alofa o le Tama Faalelagi nai lo se isi lava taimi faatasi ai ma la’u molimau loloto o le salamo i aso taitasi. E leai se mea e sili atu ona ou manao ai e faaauau pea ona alualu i luma nai lo le iloaina o le Faaola e faaloaloa mai pea Lona aao ia te au i taimi uma ou te liliu atu ai ia te Ia mo le faamagaloga ma le fesoasoani. Ou te le atoatoa ae ou te lagona le suia o lo’u loto pe a ou amataina aso fou taitasi ma se manao e aoao ma faia ia sili atu.

O le iloaina tatou te agasala uma, ou te faafetai ai mo le alofa tunoa o le Faaola ma le olioli e aumaia e Lona alofa mutimutivale i lo’u olaga i aso taitasi.