Faapitoa lava mo le Aufaaipoipo Fou
O Fesoasoani e 4 mo le Faia o Filifiliga o se Ulugalii
O le a’oa’oina o le faia o filifiliga o se ulugalii e mafai ona faigata. O nisi nei o fautuaga e fesoasoani ia te oe e faia faatasi ai ni filifiliga sili atu.
Sa ma faia ma lo’u toalua le tele o filifiliga i le lua tausaga muamua o le ma faaipoipoga, mai filifiliga laiti e pei o le filifili po o le a le ituaiga susu e faatau i filifiliga tetele e pei o le taimi e amata ai ona maua se fanau.
Tusa lava po o le a le tele pe laititi, o le faia o filifiliga e mafai ona faigata, aemaise lava pe a e a’oa’o e faia ma se isi tagata!
I le aluga o taimi ma le tele o taumafaiga, ua ma a’oa’o ai pe faapefea, faatasi ai ma le fesoasoani a le Alii, e faia faatasi faaiuga lelei. O mea nei e fā ua ma a’oa’oina e mafai ona fesoasoani iā te oulua ma lou toalua e faia ai filifiliga o se ulugalii.
1. Ia “Lelei lou Mafaufau”
Ua faamanatu mai e tusitusiga paia,, “Ua le foaiina mai e le Atua ia te i tatou le Agaga e mata’u ai; a o le Agaga e faamalosi ai, ma alofa ai, ma mafaufau tonu ai” (2 Timoteo 1:7; faaopoopo le faamamafa).
E mafai ona e faaaogaina lenei mea e ala i le iloaina, o le faia o faaiuga pe a lagona e oe po o lou toalua le vaivai, fefe, po o le ita, o le a atili ai ona faigata. O se tasi o auala e fesoasoani ai ia te oe lava ma lou toalua ia mafaufau lelei, o le tatalo faatasi. Ole atu i le Tama Faalelagi mo se taitaiga patino i faaiuga o loo e faia. O le a Ia lē tuuina atu ia te oe i taimi uma le taitaiga i le tulaga o se laau mumū po o se malamalama faaniutu, ae o le a Ia taialaina ou mafaufauga ma faatinoga e tusa ai ma Lana taimi.
Pe a to’afilemu oe ma lou toalua, maua le mafaufau manino, ma ogatasi ma le Agaga, o le a sili atu ona faigofie le faia faatasi o filifiliga.
2. Aloese mai le Faanatinati po o le Soona Mafaufau Tele
E tusa lava pe o loo oulua mafaufau lelei, o le vave tele o le faia o le filifiliga, e mafai ona aafia ai lou gafatia e faia le filifiliga e pito sili ona lelei. Ia onosai le tasi i le isi ma faaavanoa se taimi e faagasolo faalemafaufau ai lua filifiliga, ia tatalo, ma mafaufau loloto i faaiuga ma taunuuga e ono tulai mai a o lei faatinoina.
Ae ui i lea, o le faatali mo se taimi umi e faatino ai, e mafai foi ona afaina ai. O le soona mafaufau tele foi, e mafai ona taitai atu ai i le popole ma le le mautonu. Nai lo le soona mafaufau tele i le faaiuga, afai na lua tatalo e uiga i ai, ia uunaia e le tasi le isi e galulue loa i le faatuatua ma le mautinoa. A ogatasi oulua ma le Alii, e mafai ona oulua faia ni filifiliga i le lotogatasi.
Na saunoa Elder Carlos A. Godoy o le Fitugafulu faapea: “O le faia o faaiugae aafia ai o tatou olaga ma olaga o e tatou te alolofa i ai aunoa ma le mauaina o se vaaiga lautele o o latou taunuuga, e mafai ona aumaia ai nisi o tulaga lamatia.” Peitai, a tatou vaai mamao i taunuuga o nei faaiuga i le lumanai, e mafai ona manino atili la tatou vaai i le ala e pito sili ona lelei tatou te ui ai i le taimi nei.”
3. Manatua, O Musumusuga Lelei e Manaomia ai Faamatalaga Lelei
I le taimi sa filifili ai e Peresitene Russell M. Nelson ona fesoasoani i le Au Peresitene Sili, sa ia faatalanoaina uso taitasi o le Korama a Aposetolo e Toasefululua aua sa ia iloaina “o musumusuga lelei e faavae i luga o faamatalaga lelei.”
E faatatau foi lea mea i a i tatou! O filifiliga sili ona lelei o filifiliga malamalama. Talanoa i lou toalua e uiga i le manatu o le fesili atu i uo faatuatuaina ma tagata o le aiga mo se latou fautuaga e uiga i filifiliga o lo o oulua mafaufau faatasi iai. Afai e te lua lagona uma o le a aoga, aapa atu i isi mo so latou manatu. Faasoa atu i le tasi ma le isi mea ua lua aoaoina ma fefautuaai i lagona e uiga i le mataupu.
Ua faamalosiau mai le Alii ina ia tatou “saili i le aoaoina, e ala lava lea i le suesue ma le faatuatua foi” (Mataupu Faavae ma Feagaiga 88:118). Saili faamatalaga ma le malamalama mai punaoa lelei, e aofia ai punaoa faaleagaga e pei o tusitusiga paia, o upu a perofeta, ma lua faamanuiaga faapeteriaka malou toalua. A oulua faia uma suesuega, o le a mafai ona oulua agai i luma i lua filifiliga ma le mautinoa.
4. Ia Avea Keriso Ma Lua Tapasa
A o oulua faaaofia ma lou toalua le Alii i le faia o lua faaiuga ma agai i luma i le faatuatua, o le a Ia faamalamalamaina lo oulua ala.
Na saunoa mai Peresitene Monson (1927-2018), “A o tatou mafaufau i faaiuga tatou te faia i o tatou olaga i aso taitasi—pe faia ea lenei filifiliga po o lena filifiliga—afai tatou te filifilia Keriso, o le a tatou faia le filifiliga sa’o.”
I faaiuga uma e te feagai, filifili le ala o le a mafai ai ona oulua faalatalata atili atu ma lou toalua ia Iesu Keriso. Ia avea o Ia ma au tapasa tupito i au filifiliga uma. Afai e te faaaofia le Alii i le lua faaipoipoga ma mulimuli i Lana faatulagaga mo le sailia o tali, o le a Ia tuufaatasia oulua ma taialaina oulua i lua olaga atoa.