Faamaloloina e Keriso ina ua uma ona Osofaia

I le taimi lea, sa ou aafia ai i sauaga tau feusuaiga. Ina ua mae’a le osofa’iga, sa ou tauivi e iloa tonu pe o le a se foliga o lo’u lumana’i.

Sa i ai sa’u fesili fou: Aisea na tatau ai ona ou onosaia se mea tugā faapea, ae maise lava a o ou taumafai e fai le galuega a le Alii?

Sa lofituina lo’u olaga i le le mautonu, fefe, ma le masalosalo. Sa ou manatu ua le mafai ona toe faaleleia a’u. Sa le mafai ona ou iloa pe faapefea ona ou toe maua lo’u malosi mai se aafiaga tugā faapea. Sa ou lagonaina le tuulafoaiina ma ua faatumulia a’u i le faanoanoa tele.

Sa ou popole ona o le aafiaga na mafua ai ona ou le agavaa, o lea sa ou aapa atu ai i lo’u peresitene o le siteki mo se taitaiga. Sa ia fautua mai ou te sailia le mafanafana i le Togiola faamalolo a Iesu Keriso. Sa ia faamamafa mai o Keriso o le punavai tupito lea o le faamalologa ma le filemu ma sa ia uunaia a’u e faitau le Tusi a Mamona.

Sa faaauau pea ona ou tauivi ma le le mautonu ma le masalosalo. Sa puaoa lo’u mafaufau, ma sa ou le iloa le mea e fai. Sa fautuaina au e lo’u peresitene o le siteki e taofi a’u pepa o le misiona a o ou sailia se fesoasoani faapolofesa mai se fomai o le mafaufau. O auala na latou aoaoina ai au e taulima ai o’u lagona, faatasi ai ma le lagolago a uo, na fesoasoani ia te a’u i le faagasologa o lo’u faamalologa. Ae sa faapitoa lava lo’u maua o le mafanafana i le malumalu.

I lenei vaitaimi o le tiga tele, sa ou liliu atu ai foi i le Atua i le tatalo mo le faamalologa, malosi, ma le filemu. A o ou faatofuina au lava i le Tusi a Mamona, sa amata ona ou lagonaina se lagona loloto o le toafilemu. O le mana faamalolo o Iesu Keriso sa matuai taua lava ia te au. Sa oo ina ou iloaina o le mea sa ou oo i ai e le o so’u sese, ma sa ou lagonaina le mafanafana i le iloaina sa silafia e le Atua o’u tauiviga ma “o le a tau [a’u] taua” (Mataupu Faavae ma Feagaiga 105:14). O lenei malamalamaaga na aumaia ai ia te au le faamautinoaga ma le manino sa ou sailia.

Na tauave e Iesu Keriso i Ona lava luga “tiga ma ma’i o ona tagata … ina ia mafai ona faatumulia ona lagona i le alofa mutimutivale” (Alema 7:11–12). O Keriso o lo o ia te ia se malamalamaaga loloto o faalavelave tuga ua tuana’i na tatou onosaia ma ofoina mai ia i tatou le mafanafana ma le toafilemu. E na te fesoasoani foi iā i tatou e faamagalo atu, e tusa lava pe umi se taimi e faia ai.

A o ou galue i o’u tiga faatasi ai ma le fesoasoani faapolofesa ma le faaleagaga, sa ou maua le filemu. Talu ai nei na ou maua ai lo’u faaeega paia o le malumalu ma lo’u valaauga o le misiona, o nei mea uma e faafetai lava i le mana o Iesu Keriso.

Na aoao mai Elder Patrick Kearon o le Korama a Aposetolo e Toasefululua: “E faapitoa Iesu i mea e foliga mai e le mafai. Na afio mai o Ia iinei e fai ia mafai mea e le mafai, o mea e le matogiolaina ia mafai ona togiola, ia faamalolo ma’i e le mafaamaloloina, e faasa’o mea e le mafaasa’oina, e folafola mai e le mafolafolaina. Ma e lelei tele ai o Ia. O le mea moni, e matua’i atoatoa ai o Ia.”

O upumoni o le Togiola a Iesu Keriso na avea ma se mea moni ia te au a o Ia faia le mea sa ou manatu e le mafai i lo’u olaga ona fai. Sa Ia faamaloloina lo’u fefe, masalosaloga, ma le le mautonu, ma o se vavega na Ia faamaloloina ai au.

Afai na e aafia i se faalavelave tuga po o se sauaga, ia manatua o lo o alofagia oe! E te agavaa mo le alofa ma le faamalologa Faamolemole ia onosai ia te oe lava; O le faamalologa e le tausisi i se taimi faatulagaina. Ma aua le mafatia na o oe! E taua tele le sailia o tagata lagolagosua e mafai ona e faatuatuaina—e te iloa moni lava le eseesega.

Ma o le mea e sili ona taua, liliu atu ia Keriso. O le a Ia laveai ia te oe.