Autu o lenei masina: Saili le Olioli i se Lalolagi Pa’ū

Uo Pelē,

O loo i ai se faaupuga sa ou aoaoina mai lo’u peresitene o le misiona ou te pipiimau i ai pe a oo mai taimi faigata. Sa ia fai mai, “Ua tuuto atu le Atua i lo outou olioli.”

Atonu e te tilotilo solo i taua, mala, faiga sauā, finauga, ma faama’i ua taatele i le lalolagi i aso nei ma mafaufau pe faapefea ona moni lenei mea.

E faapefea?

Iesu Keriso.

“Aua tou te fefefe; aua faauta, ou te au mai ia te outou le tala lelei e olioli tele” o le mea lea na faasilasila mai e le agelu i le fanau mai o Keriso (Luka 2:10, faaopoopoina le faamamafa). O le faamoemoe a le Atua i le auina mai o Keriso i le lalolagi, ina ia mautinoa ai lou ola e faavavau ma le olioli e faavavau. O se vavega, ua Ia folafola mai ia te oe le olioli e ala ia Keriso i soo se vaega o lou olaga—lelei ma leaga, taimi lelei ma taimi leaga. O le savali lena matou te mananao e faasoa atu ia te outou i lenei masina: O Iesu Keriso o le olioli.

E ui i lea, ua tatou iloa o nisi taimi e faigata ona maua le olioli. O lea la, na matou tuufaatasia ai nei tusitusiga i lenei masina e faaali atu ai ia te oe e mafai na maua le fiafia i taimi uma. O le olioli o se vaega o lou natura paia i le avea ai ma se atalii o le Atua ma lou tofi i le avea ai ma se soo o Keriso. E ui lava i mea faigata, e mafai ona e fiafia i lenei lalolagi pa’ū.

O nisi nei o tusitusiga mai autalavou matutua i lenei masina:

• O se talavou matua mai Aferika i Saute na maua le faamalologa ia Keriso ina ua uma ona aafia i sauaga tau feusuaiga

• O se talavou matua mai Iurukuei o le na maua le olioli i le salamo i aso taitasi

• O se talavou matua mai Kanata o le na maua le olioli ma le fesootaiga i le talalelei ina ua uma ona saili i nofoaga sese

E i ai foi a matou tala o lo o avea ma vaega o la matou faasologa o lo o faaauau pea:

• Tomai o le Olaga: O nisi o faamanatu aoga ma faamoemoe pe a e feagai ma suiga tetele o le olaga

• Faaaogaina o le Mataupu Faavae ma Feagaiga i Lou Olaga: Lagolago mo lau suesuega o le Sau, Mulimuli Mai ia te Au e uiga i le filifili e taulai atu i le olioli

• Faigalotu Faapitoa: Auala e Mafai Ona Tatou Faatoilaloina ai Faaosoosoga e Faatusatusa

• Fesili ma tali: E faapefea ona tatou mafatia ma le olioli?

Sa ou mafaufau umi ma le malosi e uiga i le mea e tusi atu ia te oe i lenei tusi. Sa ou mafaufau i le tele o auala e mafai ona ou fesootai ai i o outou olaga, e faaali atu ai ia te outou ou te malamalama i luitau o le le fiafia o loo feagai ma outou.

Ae na ou iloaina e tusa lava pe e le mafai ona ou malamalama atoatoa, e toatasi lava le tagata e mafai. O Iesu Keriso o le tali lea i taimi uma.

Faitauga fiafia,

Tori Stone, , AM Faalevaiaso faataitai