Fesili ma Tali
E Faapefea Ona Ou Toe Faafouina le Olioli i Taimi o Mafatiaga?
E alala le tusitala i le Puerto Rico.
E finagalo le Atua ia tatou fiafia e tusa lava pe tatou te mafatia. Ae pe faapefea ona tatou faia o lena mea?
Ina ua ou foi mai la’u misiona, sa ou le mautonu. I la’u misiona, sa ou lagonaina le taitaiga a le Agaga Paia, sa ou mautinoa i le moni o le talalelei, ma sa ou vaaia le tele o vavega. Ae o le olaga masani a … e, masani. Ma na faafuasei lava ona foliga mai ua sili atu ona faigata.
Sa faaauau pea ona ou fesili atu i le Atua, “Aisea? Aisea e matua ese ai le olaga i le taimi nei?
Sa ou alu i le inisitituti ma auai i sauniga faamanatuga, ae sa ou le lagonaina soo le Agaga e pei ona ou lagonaina i la’u misiona. Ona ou manatuaina lea o se fuaitau na ta’u atu e lo’u peresitene o le misiona i faifeautalai i le toetoe lava o konafesi uma:
“I le olaga, e mafai ona tatou taumafai e mafatia ma le olioli.”
Ina ua ou faalogo muamua i lenei mea, ou te le’i mauaina. Ae i lena taimi o le manatuaina, na faafuasei ona ou malamalama. E finagalo le Tama Faalelagi ia tatou maua le olioli tumau—e tusa lava pe tatou te i ai i se vaitau o mafatiaga i le olaga.
Ina ua uma ona ou oo i faigata i lo’u olaga, ua ou aoaoina ni nai auala e fesoasoani ai le Tama Faalelagi ia i tatou ia lagona le olioli, e tusa lava po o le a le mea o loo tutupu i o tatou olaga.
Saili le Toefuataiga i Aso Taitasi
I ni nai tausaga talu ona mavae lenei iloiloga, sa faavaivai lo’u faaleagaga ina ua oo mai se luitau e le’i mafaufauina i lo’u ala. Sa amata ona ou sē ese mai le ala o feagaiga ma aveesea ai le olioli sa ou lagonaina. Ina ua mavae ni nai masina, sa ou iloa e tatau ona ou toe foi mai, o lea sa ou filifili ai e matamata i le konafesi aoao.
Na saunoa Elder Dieter F. Uchtdorf o le Korama a Aposetolo e Toasefululua e uiga i mausa faigofie i aso taitasi lea e fesoasoani ia i tatou e tumau ai i le ogatasi ma le Atua: “E mafai ona tatou faatautaia lo tatou ala i le pogisa ma tofotofoga o lenei olaga ma maua lo tatou ala e toe foi atu ai i lo tatou Tama Faalelagi pe afai tatou te saili ma talia ia faailo faaleagaga ua Ia saunia, talia faaaliga faaletagata lava ia, ma taumafai mo le toefuataiga i aso taitasi.”
Na ou iloa ai, o le mea lea e tatau ona ou amata ai ia toe faafouina lo’u olioli.
Ua tuuina mai e le Atua ia i tatou meafaigaluega uma tatou te manaomia e maua ai le olioli i lenei olaga, e oo lava i le lotolotoi o tofotofoga. Pe a tatou manatuaina ni faatinoga faigofie i aso taitasi lea e aumaia ai le toefuataiga i aso taitasi, e pei o le tatalo ma le suesueina o tusitusiga paia, ua tatou tatalaina o tatou loto i le Atua ma o a tatou tauiviga e foliga mai e sili atu ona laiti. O le a tatou lagonaina le malosi ma le olioli sili atu, e tusa lava po o a o tatou tulaga.
Manatua Au Feagaiga
E ala i le salamo ma le faalagolago i le Togiola a le Faaola, na ou toe foi atu ai i le ala o feagaiga. A o amata ona ou sauniuni e avea ma se tagata faigaluega o le malumalu, sa ou iloaina se isi auala taua ua mafai ai e le Alii ona tatou maua le olioli i o tatou mafatiaga: o feagaiga.
Na fesili talu ai nei Elder Yoon Hwan Choi o le Fitugafulu, “E te manao ia e fiafia?” Na ia tali ma sii mai le saunoaga a Peresitene Nelson: “Afai e te manao e faanoanoa, soli poloaiga—ma aua lava ne’i salamo. Afai e te manao e fiafia, tumau i le ala o feagaiga.”
O le manatuaina o a’u feagaiga ma le Tama Faalelagi ma Iesu Keriso na aumaia ai ia te au le olioli i taimi na luitauina ai lo’u faatuatua, ina ua feagai e pele ia te a’u ma le mativa, ma pe a ou feagai ma mea faafeagai i la’u misiona. Ma o le asō, o le tausia o a’u feagaiga ma i Laua e aumaia ai ia te au le olioli e tusa lava po o le a le mea o feagai ma a’u.
E tusa lava po o le a le aluga o le olaga ma e tusa lava po o le a le malosi o tauiviga o le olaga, o le a e vaaia vavega pe afai e te tumau i le ala o feagaiga a le Atua.
Faalogo i musika o le talalelei
O musika na fesoasoani ia te au e manatua ai lesona o le olioli sa ou aoaoina i lo’u olaga atoa.
A o ou laitiiti, ou te manatua lo’u faalogologo i le viiga faaiu i le sauniga faamanatuga. Ina ua uma le tatalo, sa ou saofai i le piano mo le taimi muamua ma taina le fati. Sa pei lava sa ou iloaina i taimi uma. O lenei aafiaga e mafai ona faatusatusa i le auala e mafai ona tatou aoao ai e mafatia ma le olioli.
O le ala o le feagaiga e pei lava o lena piano. O le taimi lava e amata ai ona tatou taina le fati—o le olioli o le talalelei—e oo mai ia i tatou e pei lava ua tatou iloaina i le taimi atoa. A o faaauau pea ona tatou faataitai, o le a faigofie atu ona taina le fati. E faapena foi, a o tatou punouai i faatinoga faigofie i aso taitasi e fesoasoani tatou te lagonaina ai le Agaga, e pei o le tatalo ma le suesueina o tusitusiga paia, o le a faigofie ona maua le olioli o le talalelei. Pe a oo mai mafatiaga ia i tatou, e mafai lava ona tatou maua le fati fiafia, pe afai tatou te taina pea ma faataitai pea.
A o avea o ia ma se tasi o Fitugafulu, sa aoao mai Elder Wilford W. Andersen: “Afai e te le o faalogo i musika o le talalelei … , faamolemole ia manatua upu nei e lua: faataitai pea. Faatasi ai ma le fesoasoani a le Atua, o le a i ai se aso o le a faatumulia ai e le musika o le talalelei oe ma lou aiga i le olioli e le mafaamatalaina.”
O le a Tauaveina Oe e le Alofa o le Atua
O lenei, pe a ou manatuaina upu a lo’u peresitene o le misiona ia “mafatia ma le olioli,” ua ou iloa le mea e amata ai. Ou te mafaufau i auala na faaali mai ai e le Atua ia te au e maua ai le olioli i nei luitau ua mavae. Ua tuuina mai e le Tama Faalelagi ia i tatou le tele o meaalofa ma faamanuiaga e mafai ona faamanatu mai ai ia i tatou Lona alofa ma le olioli e mafai ona ala mai ia Iesu Keriso.
O lo Laua alofa o le a tauaveina ai i tatou ma fesoasoani ia i tatou ia olioli—i o tatou taimi lelei ma i o tatou mafatiaga.