Mai AM Faalevaiaso
Sa ou Sailia se Feso’ota’iga i Nofoaga Sese, ae sa ia te Au le Tali i le Taimi Atoa
Sa ia a’u le tali i lo’u faafitauli o le tuua toatasi, ae sa le mafai ona ou iloa atu.
A o ou tuputupu a’e i Le Ekalesia a Iesu Keriso o le Au Paia o Aso e Gata Ai, sa ou lagona le tuua toatasi.
O le avea ai ma se tasi o tagata (i se vaega toalaiti) o le ekalesia i la’u aoga maualuga atoa, na ou lagona ai le vavaeeseina mai isi tagata uma. E lei toatele ni tagata na faalogo muamua e uiga i le Ekalesia, o lea sa ou lagona ai e pei e le tele ni avanoa ou te talanoa ai e uiga i ai. O nisi taimi ou te le manao ai ona sa ou fefe i le teena ma atili lagona ai le tuulafoaiina.
Sa amata ona ou lagona le le fiafia i le talalelei ina ua foliga mai o le toatele o a’u uo sa sili atu lo latou fiafia nai lo au.
Sa foliga mai sa latou fiafia tele i pati, ma sa ou lagona le tuulafoaiina. Sa ou tali atu leai i taimi uma i a latou valaaulia ma sa lagona e pei ua ou teena la latou faauoga ma le fiafia.
O lea la, i le tasi aso ou te le’i teena ai a latou valaaulia.
Vaavaai i talaatu o le Maka
Sa tele taimi sa ou tafao faamasani ma nei uo. Sa ou lagonaina e pei ua iu lava ina avea au ma se vaega o se nuu ma iu ai ina ou le toe alu i le lotu.
Ae ui i lea, ina ua mavae sina taimi, sa ou lagona le vaivai ma sili atu le tuua toatasi nai lo se isi lava taimi. Sa mafai ona ou lagonaina lo’u faalagolago i le manao i le nikotini ua fai ma vaisu ma ua le mafai ona pulea lo’u olaga.
Ou te le’i malamalama po o le a lo’u faafitauli. Na iu lava ina ou maua uo ma feso’ota’iga na ou naunau i ai, aisea la ua le mafai ai ona ou fiafia e pei o latou?
O le taimi lava lea, na maliu ai se tasi e pele i la’u uo. Ina ua ou talanoa atu ia i latou ma taumafai e fesoasoani, sa amata ona ou ta’u atu mea uma sa ou iloa e uiga i le fuafuaga o le faaolataga, ma faamalamalama atu o le a mafai ona toe vaai i se tasi e pele ia i latou i se aso.
… E a?
Sa le mafai ona ou talitonu i le mea sa ou fai atu ai! Ou te lei mafaufau e uiga i le talalelei mo le tele o tausaga.
Ae sa ou lagonaina le faamoemoe a o ou faamalamalama atu lenei upumoni sa ou aoaoina, ma sa ou iloaina e lei mou atoa atu lo’u faatuatua.
Sa ou mafaufau loloto i vaega o lo’u faatuatua o loo ia te au pea. Sa ou mafaufau i le auala na ofoina mai ai e le Ekalesia ia te au i taimi uma se nofoaga ma tagata e tutusa o latou mafaufau—o loo taumafai uma e mulimuli ia Iesu Keriso, auauna atu i isi, ma maua aafiaga o le olioli ma folafolaga o le talalelei.
Na aoao mai Elder Dale G. Renlund o le Korama a Aposetolo e Toasefululua, “O i tatou … E mafai ona vaai i tala atu o le faailoga. E manaomia ona tatou puipui mai lea uiga ne’i o tatou misia Iesu Keriso i o tatou olaga ma lē mafai ai ona tatou iloa le tele o faamanuiaga ua Ia ofoina mai mo i tatou. Tatou te manaomia o Ia.”
Sa ou iloaina sa ou sailia le fiafia i nofoaga sese uma.
E Le o Tuua Na o Oe
Ina ua mavae lenei aafiaga, sa amata ona ou feiloai ma faifeautalai e fesoasoani ia te au ia ou toe iloa Iesu Keriso. Sa latou fesoasoani ia te au ina ia ou auai atili i le talalelei. Sa amata ona ou tatalo atili ma taulai atu i le toe iloaina o lo’u faasinomaga paia. Na ou lafoaia foi le nikotini. Sa ou iloa sa faatasi le Atua ma a’u a o ou taumafai e suia lo’u olaga.
I le aluga o taimi, sa ou iloaina le sootaga sa ou maua ma isi soo o Keriso i la’u uarota. Sa amata foi ona ou talanoa i a’u uo e uiga i lo’u faatuatuaga ma tali a latou fesili, ma na ou fiafia ai.
O le tele o lo’u tuua toatasi i le taimi ua tuanai na mafua mai i lo’u le maua o se talitonuga mautinoa. Ae ina ua suia la’u taulaiga mai le taumafai e faaofi i totonu i le avea ai o lo’u lava tagata—o se atalii o le Atua—ma faasoa atu lo’u faatuatua, sa ou maua le olioli ma le auai i le ola atoatoa ai i le talalelei.
Na folafola mai e Elder Dieter F. Uchtdorf o le Korama a Aposetolo e Toasefululua:
“Ua i ai i le Atua se mea e sili atu ua Ia ofo mai. O se olioli maualuga atu ma loloto atu—o se olioli e sili atu i lo se isi lava mea e ofo mai e lenei lalolagi. O le olioli lea e onosaia le lotonutimomoia, e talepeina faanoanoaga, ma faaitiitia le lagona tuuatoatasi.
O le fiafia faalelolagi, i se isi itu, e le tumau. E le mafai lava. O le natura lava ia o mea uma faalelalolagi o le faasolo matua, pala, leaga, po o le le toe aoga. Ae o le olioli faaleatua e faavavau, ona o le Atua e faavavau.”
Ou te le o toe lagonaina le faaesea i le avea ai ma se tagata o le Ekalesia. O le taulai atu ia Iesu Keriso ua aveesea ai le avega mai o’u tauau ma mafai ai ona ou toe manava! A ou mulimuli ia te Ia, ou te iloa moni ai e le o tuua na o au. Ona o faamanuiaga o feagaiga, o le meaalofa o le Agaga Paia, ma folafolaga uma a Keriso, ua ou iloa ai o loo faatasi o Ia ma au.
O le olioli tumau e aumaia e lenei upumoni i lo’u olaga e sili atu nai lo soo se fiafiaga puupuu sa ou sailia e aunoa ma Ia.