Tomai o le Olaga
O Motugaafa e 3 e Fesoasoani ia te Oe e Fetuunai ai Suiga o le Olaga
E tele suiga o le olaga i le taimi o le talavou matua. O nisi nei o fautuaga e fesoasoani ia te oe e maua ai le filemu.
E leai se mea e sili ona lafoia ese ai a’u e pei o se suiga faafuasei mai i la’u masani, e tusa lava pe ua ou saunia e talia pe faafuase’i.
O suiga e mafai ona faigata (e o’o lava i suiga lelei!), ma i le avea ai ma talavou matutua, atonu tatou te feagai ma le tele o suiga i lenei taimi o o tatou olaga nai lo se isi lava taimi. O le Faatautaia o tafaoga faamasani ma faaipoipoga, toe foi mai misiona, mauaina o valaauga fou, siitia ese, tulituliloaina o aoaoga po o galuega, tausiga o fanau, po o le osia o feagaiga—a o taumafai e saili se tulaga mausali i lenei lalolagi ua fesuisuiai pea.
Na saunoa mai Peresitene Thomas S. Monson (1927–2018):
“E i ai taimi e tatou te faalogo uma ai i nisi o ituaiga o upu masani: ‘E leai se mea e tumau pea e pei o suiga.’
I o tatou olaga atoa, tatou te feagai pea ma suiga. O nisi suiga e faigofie ona taliaina; o nisi e leai.”
O le feagai ai ma le anoanoa’i o suiga i lenei taimi o le olaga e mafai ona tuua ai i tatou e lagona le atuatuvale ma le le mautonu i nisi taimi. Ae o le mea e faafetai ai, o loo i ai nisi o mea e mafai ona tatou faia e fesoasoani ai ia i tatou ia maua le mautu, mafanafana, ma le saogalemu i nei mea uma:
1. Ia Fai se Laasaga e Tasi i le Taimi
Sa ou feagai ma le tele o suiga tetele i lo’u olaga na matua lagona ai le le paleni.
Sa maualuga o’u faamoemoega mo a’u lava ia, ia vave ona ou masani, ma sa ou lagona le le fiafia ile aluga o le taimi ae o loo lagona pea le le mautonu. Ae ui i lea, ua ou aoaoina o lo o i ai le mana i le faia o “laasaga pepe” i le taliaina o suiga.
E mafai e le Tama Faalelagi ona fesoasoani ia i tatou e faamasani i mea fou, e tusa lava pe o le fetuuna’i ua na o le faia lea o ni laasaga laiti i luma e talia ai le suiga.
E le tatau ona faamamāfā i o tatou luga ina ia tatou iloa mea uma i le taimi e tasi. Nai lo lena, e mafai ona tatou faia mea, ia tasi le laasaga i lea taimi! Manatua, “O mea laiti ma faatauvaa e faataunuu ai mea tetele” (Alema 37:6). Ia onosai ma agaalofa ia te oe lava ia, a o e faamasani i lau masani fou.
2. Ia Faamoemoe i Mea Sili
O nisi taimi, o suiga e mafai ona aumaia ai se lagona o le toesea, faate’aina, po o isi lagona faigata. E leai se tulaga e tumau ai lava e faavavau.
O le mea moni, na molimau mai talu ai nei Elder Dieter F. Uchtdorf o le Korama a Aposetolo e Toasefululua e faapea, “o le natura o mea uma o le lalolagi e faasolo ina matutua, pala, vaivai, pe le aoga. Ae o le olioli faaleatua e faavavau, ona o le Atua e faavavau.”
O a’u o se tagata e faamoemoe i mea sili i le tele o aso, ae o lo’u mafaufau atuatuvale e fiafia tele e suesue le tulaga o se mea o tupu ma oso a i faaiuga e sili ona leaga - aemaise lava a o le’i amataina po o le mae’a ai o se suiga tele o le olaga. Ae peitai, o le iloaina o loo taua i le Tama Faalelagi le mea e sili ona lelei mo a’u, e fesoasoani ia te a’u ou te manatua ai po o le a lava le mea e tupu, o le a lelei mea uma.
O loo ia i tatou mafuaaga uma e tatau ai, e tatou te faamoemoe ai i mea sili mo le lumanai. E tusa lava pe le o sologa lelei mea e pei ona tatou faamoemoeina, e le o mamao ese le olioli ma i tatou ona o Iesu Keriso.
7. Taulai Atu i Au Feagaiga
Pe a suia pea lava pea le olaga o loo siomia ai a’u, ou te maua le saogalemu i le iloaina e le suia a’u feagaiga.
E faavavau i latou.
Ou te iloa o loo faamaoni le Atua Ana folafolaga ia te a’u ma faamautinoa mai ia te a’u o loo ia te a’u Lona mana i lo’u olaga e feagai ai ma mea uma e oo mai ia te a’u. Ioe, o suiga i o tatou olaga e mafai ona tafiesea ai i tatou mai o tatou tulaga, ae o le tumau faamaoni i a tatou feagaiga e mafai ona fesoasoani ia i tatou e maua ai le malosi o loo tatou sailia.
Na molimau mai Elder Ulisses Soares o le Korama a Aposetolo e Toasefululua e mafai ona tatou maua se faamautinoaga faapitoa e ala i le mea na ia ta’ua o le “talitonuga mautinoa o feagaiga.” Sa ia saunoa, “O lenei mautinoa e filemu ae o le faamautinoaga moni o le mauaina o faamanuiaga ua folafola mai e le Atua mo i latou o e tausia a latou feagaiga ma e matuai manaomia e ui lava i tulaga luitauina o o tatou aso.”
Ona o faamanuiaga o feagaiga o le malumalu, ua mafai ai ona tatou maua se faavae mausali, o se lagona o le filemu, ma le malosi e faaauau ai, fetuunai, ma faamasani ai i le lalolagi ua fesuisuiai pea.
Atonu o i tatou o ni tagata e fiafia i le mea masani, e moomoo i taimi uma mo mea e tumau pea le mautinoa ma le saogalemu. Ae o le mea moni, o le suiga e le maalofia—ma o le auala lena e tatau ona i ai! Ua na o se vaega lenei o la tatou malaga i le olaga nei. Ona o Iesu Keriso, e ui lava i suiga e ono faateia ai i tatou, e mafai ona faaauau pea ona tatou maua le olioli, alualu i luma, ma lagona le faamoemoe i mea sili i vaitau uma o le olaga.