E le o toe talitonu lo’u aiga ia Keriso, ae ou te Maua Pea le Olioli i le Talalelei

Na ou ola a’e i le Katoliko, ma sa tapua’i o’u mātua iā Iesu Keriso i taimi uma. Ae i ni nai tausaga ua mavae, na maua ai e lo’u tama le tele o tusitusiga e tetee ai i le Kerisiano. I le aluga o taimi, sa faalogo o’u matua i nei savali ma le toe talitonu ia te Ia po o soo se isi lava tapuaiga.

I lena taimi, sa ou faauo atu ma tagata o Le Ekalesia a Iesu Keriso o le Au Paia o Aso e Gata Ai. Sa latou valaauliaina au i gaoioiga, ma sa ou taumafai i taimi uma e auai i avanoa uma ou te maua.

I se tasi aso i le faataitaiga a le aufaipese a le lotu, sa tufatufa ai tamaitusi o le Mo Le Malosi o le Autalavou ma sa tuu mai e la’u uo se tamaitusi ia te au. A o ou faitau i ana savali e uiga i le faamalosia o la’u sootaga ma Iesu Keriso, sa ou lagonaina le fia taumafa i le upumoni ua mumū i totonu ia te au.

Sa ou fia iloa atili e uiga ia te Ia ma Lana talalelei. Sa tuuina mai e la’u uo ia te au se Tusi a Mamona ma valaaulia au e fesili atu i le Tama Faalelagi pe moni ona aoaoga, o lea sa ou taliaina ai lana valaaulia.

A o ou faitau i le 2 Nifae 27:23, sa ou lagona le mafanafana: “Aua faauta, o Aʼu o le Atua; ma o Aʼu o se Atua o vavega; ma o le a Ou faaali atu i le lalolagi e tutusa lava aʼu ananafi, i le asō, ma le faavavau; ma Ou te lē galue i totonu o le fanauga a tagata vagana ua tusa ai ma lo latou faatuatua.”

O lenei mau na faaali mai ai ia te au le mamana o le faatuatua ia Iesu Keriso. Sa ou manao e toe talitonu ia te Ia. A o ou faamaeaina le tusi, sa ou lagonaina le molimau mai o le Agaga i le moni o loo soifua Iesu Keriso ma e moni le Tusi a Mamona. E lei umi ae ou papatiso ma amata ona ou ola i se olaga e matua ese lava nai lo lo’u aiga.

O nisi taimi, o le avea ai ma tagata e toatasi o le Ekalesia i lo’u aiga e faigata ai mea. Ae ou te faafetai ua faamanuiaina au e le Tama Faalelagi i uo faamaoni, taitai o le Ekalesia, ma tagata o le uarota o e siitia au pe a ou lagona le tuua toatasi.

Talu ona ou papatiso, ua ou matuai faafetai lava mo le meaalofa o le Agaga Paia ma ua ou lagonaina moni lava le Faaola faatasi ma au.

Sa aoao mai e Elder Takashi Wada o le Fitugafulu: “A o tatou ulu ifo i le feagaiga o le papatisoga faatasi ma le Atua, tatou te folafola atu ua tatou loto e tauave i o tatou lava luga le suafa o Iesu Keriso, tausi poloaiga a le Atua, ma auauna atu ia te Ia mo aso uma o totoe o o tatou olaga. Ae folafola mai e lo tatou Tama Faalelagi ia i tatou e faapea, e mafai ona tatou maua pea Lona Agaga e faatasi ma i tatou—le taitaiga faifaipea mai le Agaga Paia.”

O le ola ai i se auala e faatumauina ai le Agaga ia te au, e faamanatu mai ai ia te au e le o tuua na o au i la’u malaga, e tusa lava pe ou te tu na o a’u i lo’u aiga.

O nisi taimi ou te lagona ai le faanoanoa e uiga i faaiuga a o’u matua, ae e ala i le tatalo, ua ou lagonaina ai le faamautinoaina o loo i ai le faamoemoe mo i laua e toe talitonu ai i le Faaola i se aso.

Talu ai nei sa ou maua ai o’u faaeega paia ma osia feagaiga ma le Tama Faalelagi ua suia ai lo’u olaga. Ua ou aoaoina o Lana fesoasoani, o tofotofoga ma luitau uma tatou te feagai i le lalolagi e mafai ona i ai se faamoemoega ma e mafai ona fesoasoani ia i tatou e lagona ai Lona filemu ma le olioli. Pe a ou lagonaina le tuua toatasi i lo’u aiga, ou te sailia Iesu Keriso ma lagona le agaga faafetai mo Ia ma Lana talalelei e sili atu nai lo se isi lava taimi.

Na aoao mai e Peresitene Nelson “O le taui mo le tausiga o feagaiga ma le Atua, o le mana faalelagi—mana e faamalosia ai i tatou e tetee atili atu ai i o tatou tofotofoga, faaosoosoga, ma lototiga.”

Ou te iloa o loo i ai i le Tama Faalelagi ma Iesu Keriso se fuafuaga sili mo i tatou taitoatasi, ma o lo tatou olioli o i le totonugalemu lea o lena fuafuaga (tagai i le 2 Nifae 2:25). Afai o e i ai i se tulaga e tutusa ma a’u, ia e iloa e le o tuua na o oe. O taimi uma lava e te aapa atu ai i le Faaola ma filifili e tausia au feagaiga, o loo faatasi Lona Agaga ma oe. E tusa lava po o le a le mea e filifili e lou aiga e fai pe le faia, e iloa oe, vaaia oe, ma alofagia oe e le Atua.