Faaaogaina o le Mataupu Faavae ma Feagaiga i Lou Olaga
O E Taulai Atu I Ou Faafitauli po o Ou Faamanuiaga? O Mea na Aoao Mai e le Au Paia Anamua ia te A’u e uiga i le Olioli
O aafiaga o le Au Paia anamua i le Mataupu Faavae ma Feagaiga ua aoaoina ai a’u i le tele o mea e uiga i le lagonaina o le olioli.
Faaaliga atoa: Ou te tausalaina i le avea ma tagata e taulai atu i mea leaga e ono tupu ma ātu lou mafaufau i o’u faafitauli.
Ua faamanuiaina a’u i ē pele, ua latou siomia a’u ma tuuina mai le tele o fofo talafeagai. Ae latou te ta’u atu ia te oe e masani ona ou le mulimuli i a latou fautuaga ae faaauau pea ona ou lagona le faanoanoa, ua ou lotomaaa tele e lafoai ese lo’u vaaiga le lelei.
Ia, ou te le o faiatu la o faafitauli uma ma tofotofoga o le olaga o le a faigofie ona foia pe afai tatou te “lelei” pe “vaai i le itu lelei.” O le ataata a o feagai ai ma o tatou tauiviga e le faigofie i taimi uma. Ae ou te talitonu, o mea tatou te filifili e taulai atu i ai, e mafai ona aafia ai lo tatou gafatia e onosaia faigata ma lagona le olioli i o tatou luitau.
E pei ona aoao mai Peresitene Russell M. Nelson, “O le olioli o tatou lagonaina e itiiti lava se mea e faatatau i tulaga o tatou olaga a o mea uma o loo faatatau i le taulaiga o ō tatou olaga.”
Ae e faapefea ona siitia lo tatou taulaiga ina ia lagona le olioli lea e foliga mai ua mamao mai lo tatou gafatia e aapa atu?
Ia Taulai atu i Folafolaga a le Atua
A o ou suesueina le Mataupu Faavae ma Feagaiga i lenei tausaga ma le Sau, Mulimuli Mai ia te Au,o le Au Paia anamua o le Ekalesia ua faamaonia o ni faataitaiga mamana o lenei mataupu faavae na aoao mai e Peresitene Nelson. Sa onosaia ma le faamaoni e le Au Paia o latou luitau e ala i le manatuaina o la latou sini faaiu—o le “aisea” i tua atu o mea uma sa latou ola ai ma faamanuiaga na folafola atu ia i latou.
Ua ou aoao e uiga i le Au Paia o e na faalagolago i le Alii ina ua Ia fetalai mai:
“E lē mafai ona outou vaaia i o outou mata faalenatura, i le taimi nei, le fuafuaga a lo outou Atua e faatatau i mea o le a oo mai pe a mavae le taimi nei, ma le mamalu e mulimuli mai pe a mavae puapuaga e tele.
“E oo mai faamanuiaga pe a mavae atu puapuaga e tele” (Mataupu Faavae ma Feagaiga 58:3--4).
O nei Au Paia, i le faatuatua o le a faataunuu e le Alii Ana folafolaga ia i latou, sa latou taulai atu i faamanuiaga o le a oo mai pe a mavae atu, ae le o le taimi nei, o o latou puapuaga. Ou te talitonu o lenei suiga i le taulaiga na fesoasoani ia i latou e faaauau pea ona fetaomi atu i luma ma e oo lava i le ausia o mea atonu e manatu nisi e le mafai ona mafaufauina i o latou tulaga—o le olioli!
E oo mai le olioli i le taeao
I le Salamo 30 o loo i ai se fuaiupu e faitauina, “E tasi le po e tagi ai, a o le ao o le taeao e oo mai ai le olioli” (Salamo 30:5). O nisi o outou atonu na oo moni lava i lenei mea. O tauiviga e mafai ona foliga mai e sili atu le taufaafefe i le po, o mea faigata e sili atu ona le mafaia. O nisi taimi o lena folafolaga o le taeao e foliga mai e le mafai ona e au i ai. Ae ona oo mai lea o le tafa o ata, ma ua mou ese atu o tatou popolega i le malamalama o se aso fou.
Atonu na e oo foi i lenei mea faafaatusa. E te lagona e leai se mutaaga o tiga, faigata, po o tauiviga i lou olaga, ma e te lagonaina le pogisa ua lofituina oe. Atonu o le folafolaga o le olioli e foliga mai e le mafai ona e ausia i le pogisa. E faapefea ona tatou gafatia le oo atu i le taeao?
E pei o Au Paia anamua, e mafai ona tatou “fetaomi atu i luma ma le tumau ia Keriso, ma se susulu atoatoa o le faamoemoe” (2 Nifae 31:20). Pe a tatou lagona le lofituina i le pogisa, e mafai ona tatou tuu lo tatou faatuatua mausali ma le le maluelue ia Keriso, o lē e aumaia ia i tatou le faamoemoe i le olioli o le a oo mai i le taeao. Ua faamautinoa mai e le Alii ia i tatou, e pei ona Ia faia i le Au Paia, “E lei oo mai le itula, ae ua lata mai” (Mataupu Faavae ma Feagaiga 58:4).
Olioli i le lotolotoi o le faanoanoa
O se mea masani le lagona o le faanoanoa, le lē fiafia, po o le lagona matuai leai se faamoemoe i nisi taimi. O le toesea, ma’i o le tino ma le mafaufau, faalavelave tuga faalelagona, po o le sauaina e mafai ona taofi ai le fiafia ma le faamoemoe tatou te manana’o e lagona ma faafaigata ai ona iloa atu se malamalama i le faaiuga o le ana.
Ae e mafai ona lagonaina le olioli i le lotolotoi o le faanoanoa ona o Iesu Keriso. Ua tatou faitau i tusitusiga paia, “Ma ua faapea ona tatou vaai ai i le pogai tele o le faanoanoa, ma o le olioli foi—o le faanoanoa ona o le oti ma faafanoga i totonu o tagata, ma o le olioli ona o le malamalama o Keriso i le ola” (Alema 28:14). E mafai ona tatou lagonaina le faanoanoa mo tiga tatou te onosaia a o lagonaina foi le olioli ona o le malamalama ola o le Faaola.
O loo ou taumafai e suia la’u vaaiga le mautonu pe a oo mai luitau ia te a’u e ala i le taulai atu i faamanuiaga o loo faatalitali mai mo a’u—nai lo o’u faafitauli. O nisi taimi e lofituina ai au i le faanoanoa, ae o le manatuaina o Keriso e aumaia ai ia te a’u le faamoemoe o le a oo mai le olioli.
A o outou onosaia faigata ua tuuina mai i o outou luga, ou te faamoemoe o le a outou manatuaina le olioli o le Au Paia, ma iloa e mafai foi ona outou olioli pe a outou manatuaina le faamoemoe o lo tatou Faaola, o Iesu Keriso.