Sa Ou Fefe e Talanoa i Lo’u Epikopo—O Le A Faapefea Ona Ia Tali Mai?

I le taimi muamua, sa le mamafa ia te au. Sa ou vaai i tulafono a le Ekalesia o se pule taofiofi. Sa ou alu pea i le lotu, ae sa ou lagona le le agavaa ma ou le toe tagofia ai le faamanatuga mo ni masina.

Ona oo mai lea o le KOVITI-19, ma taofia ai au taumafaiga uma. I le taimi lava lea e tasi, sa faateia lava a’u i le faailoa mai: O a’u sa vaetamaina. E lei fai mai lava o’u matua ia te a’u, ma sa ou feagai ma sina faafitauli o le faasinomaga.

Sa ou lagona le mamao mai mea uma sa ou talitonu i ai. Sa ou iloaina e tatau ona ou iloa po o ai moni lava a’u. Ina ua iu ina ou alu i le fale, sa ou talanoa atu i o’u matua e uiga i mea uma—e aofia ai filifiliga sa ou faia. Nai lo le otegia o a’u, sa la’ua tali mai ma le alofa. Sa laua faamanatu mai ia te a’u poo ai moni lava a’u: o lo la atalii ma se atalii faapelepele o le Atua.

Sa ou manao e sui. Sa uunaia au e o’u matua e talanoa i lo’u epikopo, amata le faagasologa o le salamo, ma faalagolago i le mana togiola o le Faaola.

Ae sa ou fefe! Sa ou popole i le faasalaina po o le faamasinoina o a’u ona o a’u filifiliga. E masani lava ona ou le popole i mafaufauga o isi tagata ia te a’u, ae o lo’u epikopo o se alii maoae tele, ma ou te lei manao e faanoanoa o ia i le ta’uta’u atu ia te ia o mea sa ou faia.

Ae e pei ona aoao mai Elder Scott D. Whiting o le Fitugafulu: “Aua le lafi mai ia i latou o e o le a alolofa ma lagolagoina oe; ae, taufetuli atu ia i latou. O epikopo, peresitene o paranesi, ma taitai lelei e mafai ona fesoasoani ia te oe ia maua le mana faamalolo o le Togiola a Iesu Keriso.”

O epikopo, e “umia ki o le perisitua e fai ma sui o le Alii e fesoasoani ai i tagata o le Ekalesia ia salamo.” Nai lo le feagai ai ma se faamasinoga matuia ina ua ou talanoa atu ia te ia, na pau lava le mea na ou lagonaina i le ofisa o lo’u epikopo o le faamafanafanaga. Sa ou iloaina na faatuatuaina o ia e le Alii e fesoasoani mai ia te au, ma sa ou lagonaina e mafai foi ona ou faatuatuaina o ia.

Sa uunaia au e lo’u epikopo e aoao e uiga i le Faaola ma Lana Togiola e ala i le fausiaina o mausa faaleagaga. Sa ma feiloai soo ma lo’u epikopo, ma sa ia valaau ma siaki mai ia te au i vaiaso uma e asiasi po o oa mai a’u. Sa ou lagonaina le alofagia tele i taimi uma ma te talanoa ai.

Mulimuli ane, faatasi ai ma le fesoasoani a lo’u epikopo, sa ou laa ese ai mai mausa leaga i lo’u olaga. Ae ui i lea, sa ou popole lava i le toe tagofia o le faamanatuga. Pe sa ou agavaa moni ea—e tusa lava pe ua uma galuega uma sa ou faia?

Ae sa faamautinoa mai e lo’u epikopo ia te au. Sa ia faamanatu mai ia te au ou te le tau manaomia ona atoatoa—tau lava o le naunau. Sa ou faia le mea sili na ou mafaia, ma sa silafia e le Faaola lena mea ma o le a faaauau pea ona faamagaloina au a o ou faalagolago i Lana meaalofa o le salamo.

Na aoao mai talu ai nei e Sister Tamara W. Runia, Fesoasoani Muamua i le Au Peresitene Aoao o Tamaitai Talavou, “O le o mai ia Keriso o loo faapea mai, ‘E mafai ona e fesoasoani mai ia te au?’ ma le faamoemoe, se faamautinoaga faaalia o loo faaloaloa mai Pea Ona aao ia te oe.”

Ina ua mavae lenei aafiaga, sa amata ona ou faafouina a‘u feagaiga e ala i le faamanatuga ma le mautinoa. Sa ou lagona le peiseai o se tagata fou, ma se lagona fotua‘e po o ai moni lava au ma le mea e mafai ona ou faia ma le fesoasoani a le Alii. Sa oo foi ina ou auauna atu i se misiona aua ina ua uma ona ou molimauina le tele o le suiga o le meaalofa o le togiola a le Faaola i lo‘u olaga, sa ou manao e fesoasoani i isi ia maua le faamoemoe na Ia tuuina mai ia te au i aso uma.

O poloaiga e le o se pule taofiofi—ua i ai, ona e finagalo le Atua ia tatou manuia, tuputupu ae, ma ia sao mai mailei o le agasala. O le totonugalemu o le talalelei a Iesu Keriso o le alofa lea ua ia te Ia ma le Tama Faalelagi mo i tatou. Ona ou te lagonaina lena alofa atoatoa, o loo ou taumafai ai ia avea atili e faapei o i La‘ua.

O la La‘ua meaalofa o le salamo e faatumulia ai lo‘u olaga i le olioli.