Mai le AM Faalevaiaso
O Le Aoaoina e Le o Nonoaina Lo’u Taua i le Faaatoatoaina
Ina ua ou taofia le fenumiai o le usiusitai ma le taua, sa iu lava ina ou malamalama i le alofa tunoa.
Pe i ai se taimi e te lagona ai ua lelava le Atua ia te oe i le toe faia pea lava pea o agasala lava e tasi? Pe faapea foi o lou taua e faalagolago i le lelei o lou usitai ma mulimuli i tulafono?
Afai na faapena ou lagona, ia iloa e le o tuua na o oe.
Talu mai lava lo’u laitiiti, sa ou nonoaina lo’u taua faaletagata lava ia i le avea ai ma se tamaitiiti "lelei"—po o le tamaitiiti e lei faia ni mea sese. Sa ou faananau i le faamaoniga, o lea sa ou taumafai ai i le mea sili ou te mafaia e avea ma tagata aoga sili ona lelei, o le afafine sili ona lelei—o le o loo valivali i taimi uma i totonu o laina.
Ae e faia e tamaiti ni mea sese. E manaomia e tamaiti aoga se faasa’oga. O le tuputupu ae o lona uiga o le aoao, o nisi taimi e ala i le toilalo po o luitau po o mea sese. Ae ui i lea, e ui lava sa ou iloa e moni lenei mea, ae o mea sese uma lava sa pei o se ta’eta’ei i lo’u taua. Sa ou vaai ia te au lava e le taua tele i lo’u aiga, faiaoga, ma uo i soo se taimi lava ou te lei ausia atoatoa ai ni faamoemoega.
Manatuaina o le Mafuaaga na Afio Mai ai Keriso
O lenei mafaufau o le fiaatoatoa na vave ona oo mai i lo’u faatuatua ina ua ou auai O Le Ekalesia a Iesu Keriso o le Au Paia o Aso e Gata Ai i le 18 o tausaga. Sa ou talitonu o le avea ma tagata sili ona usiusitai na ou taua ai i fofoga o le Tama Faalelagi. Lea foi, sa ou fuaina lo’u taua e ala i le lelei o lo’u mulimuli i tulafono.
A o faamaoni o’u faamoemoega, sa ou sese. O lenei mafaufau na atia lemu ai lo’u mautinoa.
Ia, o le a le mea na suia?
Mo a’u, o le konafesi aoao ia Aperila 2025—o se lauga faapitoa na tuuina mai e Sister Tamara W. Runia, Fesoasoani Muamua i le Au Peresitene Aoao o Tamaitai Talavou. Sa ia faapea mai, “Ou te tautino atu, e ui ina popole le Atua e uiga ia tatou measese, e sili atu Lona ano i le mea e tupu pe a mavae ona tatou faia o se sese.”
A o ou tu i lo’u potu malolo, sa tafe ifo loimata i ou foliga. Sa fetalai le Agaga i lo’u loto, faamanatu mai ia te a’u o se mea sese le fusia o lou usiusitai i lo’u taua ma ou te manaomia ona vaai i mea i se vaaiga ese.
E le’i tuuitiitia lo’u taua i le Atua ina ua ou faia measese. Sa matua ou sese lava i le talitonu faapena. Sa faaauau Sister Runia e ala i le aoaoina e faapea pe afai tatou te salamo, e olioli le Atua. I vaiaso taitasi pe a ou tagofia le faamanatuga, ou te maua ai le avanoa e faafou ai a’u feagaiga, toe amata, ma toe taumafai atili.
O le Taua e Tumau—I Taimi Uma
O le vaega o le lauga na iloga ona taia ai a’u o le faamalamalamaina mai lea e Sister Runia o lo tatou taua o ni fanau a le Atua i ona lima.
Sa sii lona lima agavale e faatusa ai le taua faaletagata o se tasi, ona faaaoga lea o lona lima taumatau e faaalia ai luga ma lalo o le olaga—measese, tulaga manuia, tauiviga, ma le alualu i luma. Ina ua agai i luga ma lalo le lima o le "usiusitai", sa tumau mausali pea le lima o le "taua".
Sa tautino mai Sister Runia: "O lou taua e le o nonoaina i le usiusitai. O lou taua e tumau; e le suia lava. Na tuuina atu ia te oe e le Atua, ma e leai se mea e mafai e oe po o se isi lava ona fai e suia ai. O le usiusitai e aumaia ai faamanuiaga; e moni lena mea. Peitai o le taua e le o se tasi lea o na mea. O lou taua e ‘tele lava … i le silafaga a le Atua’ i taimi uma[Mataupu Faavae ma Feagaiga 18:10], po o fea lava e ave iai oe e au faaiuga.”
O se mea moni mamana lenei sa manaomia ona ou aoaoina.
Faaaliga mo Lo’u Agaga
I lena konafesi aoao, sa taliina ai e le Tama Faalelagi se fesili ou te leiloa sa tanumia loloto i lo’u agaga. Sa o se faaaliga mo lo’u loto, na toe faaleleia le faitau sefulu o tausaga o le talitonuga maualalo faaletagata ma le le to’a ma nai lo lena na faatumulia a’u i Lona alofa mama ma le alofa mutimutivale.
O le talalelei a Iesu Keriso o se tasi o faamoemoe aua na te aoaoina le salamo. E ala atu i lo tatou Faaola, o Iesu Keriso, e mafai ona faafouina i tatou, faamamaina, ma faapaiaina. Na te fiafia moni i le faamagaloina o i tatou. O le mafuaaga lena ua Ia mafatia ai ma le loto iai mo a tatou agasala ma puapuaga. E pei ona ou manatuaina lenei upumoni ma taulai atu i le alofamutimutivale e le gata Na te ofoina mai i taimi uma ou te liliu atu ai ia te Ia, ou te lagonaina le faateleina o lo’u lagona o le taua faaletagata lava ia ma le aluese atu o le le mautinoa.
Pe a e lagonaina e faapea o lou taua e faalagolago i lou usiusitai, ia manatua le ala o lo o alolofa atoatoa ai le Tama Faalelagi ma Iesu Keriso ia te oe. Ua La saunia le ala mo oe e togiolaina ai. Ole atu i le Tama Faalelagi i le ala o Ia silasila mai ai ia te oe—ona avea lea o lena upumoni e gotouga loloto ifo i lou agaga.
Taofi mau iai. Aua lava nei toe masalosalo i ai.