Mo Tina o Fanau Laiti
Pe a le "Matagofie" Tele le Avea ai ma se Tina
O le tulaga faatina e mafai ona avea ma se faafefiloi o le olioli ma luitau.
I le avea ai ma se tina mo le taimi muamua ma se pepe fou, sa ou vaivai. Sa ou i ai i le po atoa faatasi ma la’u pepe faatoa fanau mai, ma sa toe a le mafai ona matou o i le lotu. Ina ua maea le sauniga, sa uu e se olomatua agalelei lo’u lima ma fai mai, "Pe le o le avea ea ma se tina o se mea matagofie tele?"
Sa ou lagona le le fiafia tele e tali atu. Sa ou manao e avea ma se tina i lo’u olaga atoa, ma e ui e mafai ona ou tautino atu e tele naua vaega matagofie i le tulaga faatina, i lena taimi, e moi lava e le i "matagofie" tele ia te au.
Sa amata ona ou lagona le tausalaina a o oso mai mafaufauga ma popolega faafailele i lo’u mafaufau. Ae faapefea pe afai i le mavae ai o mea uma, ou te le manao e avea ma se tina? I vanu o le iai o se pepe fou, ou te lei lagonaina lenei "ofoofogia" faifai pea lea na faailoa mai e isi tina. Sa tiga foi lo’u loto mo tamaitai o e sa moomoo e avea ma tina, ma sa ou lagona le manatu faapito mo le le fiafia i minute uma o le avea ai ma se tina.
Pe ua avea ea a’u ma se tina leaga i lena mea? Pe na o a’u ea na lagona faapea?
Mauaina o le Matagofie
Sa ou tesi atu i nisi o a’u uo o e sa le’i leva foi ona i ai ni pepe. Sa ou fiafia lava e faalogo sa i ai foi o latou aso faigata (ma po). O le talanoa ma i latou na taitai atu ai au i se malamalamaaga ofoofogia:
Atonu tatou te faaaogaina le upu matagofie e faamatala ai le tulaga faatina aua e mafai ona faigata ma ofoofogia i le taimi lava e tasi.
Sa ou lagonaina le le fiafia ona ua matou faaaogaina le upu matagofie e faamatala ai le avea ma se tina, nai lo upu e pei o le luitauina, le manatu faapito, alu ai mea uma, upu uma e lagona le moni ia te au aua e faalagolago lau pepe ia te au i le 24/7. Sa toetoe lava a ou moomoo maimau pe ana fesili mai lena olomatua i le lotu, "Pe le faigata ea le avea ma tina?"
Na faafuasei lava ona oo mai upu o le viiga "Ou te Tu ma Ofo" i lo’u mafaufau:
O le Togiola a le Faaola sa luitauina, le manatu faapito, ma alu ai mea uma. Ae ua tatou faamatalaina i lena pese e faaaoga ai le upu matagofie.
O le Mea sa Ou Aoaoina i le Avea ai ma Tina
O le taimi nei ua tasi le tausaga o lo’u atalii, ma a o’u mafaufau i le tausaga ua te’a talu ona avea a’u ma tina, ua tele ni mea ua ou aoaoina. Ma o le mea aupito sili ona taua, ua ou latalata atili atu ai ia Iesu Keriso.
E masani ona ou tomanatu i le upusii lenei mai ia Peresitene Jeffrey R. Holland, Sui Peresitene o le Korama a Aposetolo e Toasefululua: “E leai se alofa i le olaga faaletino e latalata atu pe faatusalia i le alofa le pona o Iesu Keriso nai lo le alofa le manatu faapito e iai i se tina mo sana tama.”
Ua oo ina ou malamalama atili i le Faaola a o o’u aoaoina le uiga o le avea ai o se tina.
Ua faateleina foi lo’u talisapaia loloto o lo’u tina agalelei ma le anoanoa’i o osigataulaga sa ia faia mo a’u i lo’u olaga atoa. O le Matagofie o se upu o le a ou faaaogaina e faamatala ai o ia.
E masani ona faatatau mai tusitusiga paia i tina ma tulaga faatina. O le faitauina o na mea o se tina na aumaia ai se vaaiga fou i lo’u olaga.
Mo se faataitaiga, o le toe faitauina o le Isaia 49:15 ua sili atu le moni ia te au i le taimi nei aua ua ou malamalama ai i le tulaga e iai le faafailele pea o se tamaitiiti: “E galo ea i le fafine lana tama ua susu, na te le alofa i le tama a lona lava manava? ai lava e galo ia te i latou, ae le galo lava oe ia te au.”
E le galo i lo’u tino faitino o lo o iai sa’u tama o faalagolago mai ia te au, ae, e tumau pea le le mafaatusalia i le alofa atoatoa e faavavau o le Faaola mo i tatou.
O le tausia o se atalii ua fesoasoani ia te au e malamalama atili ai i faamanuiaga folafolaina o a’u feagaiga o le malumalu ma aumaia ia te a’u ni faamoemoega sili atu i le manao e faaa’oa’o aoaoga a lo’u Faaola.
O le avea ai ma tina i aso uma e aumaia ai se faafefiloi o luitau ma le olioli, lea e faamatalaina atoatoa ai le mea e ala ai ona avea le avea ma tina ma tulaga "matagofie," e tusa lava pe ono le iai se lagona faapena.
E ui lava ou te le lagona e pei o se tina "matagofie" i taimi uma, ou te faamoemoe o aso taitasi o le a mafai ona ou avea atili ma atili atu e pei o lo’u Faaola, o Iesu Keriso, ma aoaoina lo’u atalii i le ala e mulimuli ai i Ona tulaga’a’ao.