Ou te Talitonu
Pe o E Manatu Faatauvaa Ea i le Talalelei?
E alala le tusitala i Mallorca, Sepania.
E tofu uma lava i tatou ma taimi i o tatou olaga na tatou iloa tatou te lei talisapaiaina le talalelei mo le vavega o iai.
I se tasi aso i la’u savaliga i le galuega, sa ou ita ai i se faafitauli masani: turisi.
Ua ou masani i Turisi iinei i Mallorca, ae i lenei aso faapitoa, sa ou matamata ai ma le faatupulaia o le ita i le toatele o i latou ua poloka ai le taulaga, e tutu e pue ata o mea uma sa latou vaai i ai.
Ou te manatua lo’u matauina o se tasi o turisi o loo tilotilo atu i totonu o se faamalama ma pueina ni ata ma mafaufau, "Aisea? Ua na o se faamalama masani lenei. Aisea ua e pueina ai fua? "
Ae ina ia le faaauau, atonu ou te amio i le ala lava e tasi pe a ou asiasi atu i nofoaga fou. O lea sa ou filifili ai e sui la’u taulaiga.
Ina ua ou vaai i se tasi o faasino atu a latou meapueata i se fale, sa ou filifili e vaai foi i luga ma sue foi pe mafai ona ou maua poo a oa sa matuai taulai atu i ai. Afai ou te matauina se tasi o iloilo se faleoloa sa ou pasia i aso uma, sa tonu ia te au e tuu atu i ai se vaaiga lona lua ma iloa ai le maa taua sa latou manatu e aoga le pueina o ata.
Ma e te iloa? Sa ou maua ni mea matagofie i lena savaliga i le galuega. Ina ua ou taumafai e tilotilo atu i lo’u fale e pei o loo ou vaai i ai mo le taimi muamua ma le toe manatu faatauvaa iai, sa ou maua ai ni mea fou e talisapaia.
Mulimuli ane, sa ou mafaufau i lenei mea:
E faafia ona ou manatu mama i le talalelei?
Iloaina o Faamanuiaga ua Uma ona Tatou Mauaina
Ou te manatua se taimi i la’u misiona sa ou le lagonaina ai le fiafia tele. Sa faaauau pea ona ou tatalo e uiga i mea lava e tasi ma le le lagonaina e pei o loo ou mauaina ni tali.
Sa ou talanoa i lo’u peresitene o le misiona e uiga i o’u lagona, ma sa ia ta’u mai ia te a’u atonu ou te le o faalagolago atoatoa i folafolaga a Keriso. I le taimi muamua ou te lei iloa le uiga o lana tala, ae a o ou mafaufau pea i ai ma suesue i le uiga o le faalagolago atoatoa i le Alii, sa uunaia au e amata ona iloa ma faafetai mo faamanuiaga ua uma ona ou maua. O lenei mea na fesoasoani ou te iloa ai ua uma ona tali mai le Tama Faalelagi i le tele o a’u tatalo ma faamanuiaina a’u i le tele o auala.
Sa aoao mai Elder Ulisses Soares o le Korama a Aposetolo e Toasefelulua: “O lena faatutugata e afua mai i le faifaimalie atu o lo tatou naunau e punouai atoatoa i le talalelei a le Alii. …O lea faamalieina, pe a tatou talanoa i ai, e afua ai ona tatou faatauagafau i meaalofa o le talalelei, ma tatou oo atu ai i le tulaga matautia o le faatuatuana’i o lo tatou punouai i mea taua o le talalelei a Iesu Keriso ma feagaiga na tatou osia.”
Pe a ou lagona e pei ua ou ono manatu faatauvaa i le talalelei a Keriso, o nisi taimi o le tali o le toe foi lea i le faavae ma manatuaina le mea e sili ona taua.
Vaavaai i lo Tatou Faatuatua i se Malamalama Fou
Mo le tele lava o lo’u olaga atoa, sa ou oo ai i tulaga e na o au ai lava le tagata auai o le Ekalesia a Iesu Keriso o le Aupaia o Aso e Gata Ai. E o lo’u aiga i le lotu, ma e iai sa’u paranesi matagofie, ae i le aoga po o le faatasi ai ma uo, e masani lava ona tuua na o au i lou faatuatuaga.
Pe a ou feiloai i ni tagata fou, o a’u lava lo latou uluai faatomuaga i le talalelei. Pe a latou aoaoina ni mea e uiga ia te a’u ma le auala ou te ola ai, latou te vaai iai o se mea fou ma manaia.
Mo se faataitaiga, i ni nai masina talu ai sa ou iai i se pati o le galuega lea sa inuina ai e tagata uma le ava malosi. Ina ua ou faamatala atu i au uo faigaluega ou te le inu, sa latou manatu sa ou le inu i lena po ona ou te aveina le taavale i se taimi mulimuli ane. Ina ua ou faamalamalama atu iai ou te le inu lava, sa tele lava ni a latou fesili.
Pe a ou maua nei aafiaga, ou te faamatalaina lou faatuatuaga i tagata o e faatoa faalogo lea iai mo le uluai taimi (pe sa na ona faalogo foi i la tatou Ekalesia i ala o faasalalauga). Ma pe a ou vaaia i latou o aoao e uiga i la tatou Ekalesia mo le uluai taimi, e fesoasoani ia te a’u e tilotilo i lo’u lava faatuatuaga i se malamalama fou.
Toe Fo’i i le Ala
Ou te manatu tatou te maua uma taimi i o tatou olaga tatou te iloaina ai tatou te le’i talisapaia le talalelei mo le vavega o iai. Ae e iai ni mea faigofie e mafai ona tatou faia e toe foi ai i le ala, e pei o le iloaina o le aao o le Alii i o tatou olaga ma le faasoaina atu o a tatou molimau i isi. E mafai ona avea i tatou e pei o na turisi, o e sa vaaia ni vavega i meafaitino o aso uma. E mafai ona tatou vaaia ma fiafia i vaega matagofie o le talalelei ia ua avea ma faasologa masani ia i tatou.
Ou te fiafia i le Faataoto 3:5–6, e faapea mai:
"Ia e faatuatua ia Ieova ma lou loto atoa; ae aua le faalagolago i lou lava atamai.
Ia e manatua o Ia i ou ala uma, ona faatonuina ai lea e Ia lava ou ala."
Pe a tatou faailoa atu le mea na faia e le Tama Faalelagi ma Iesu Keriso mo i tatou, o le a La’ua faaauau ona tuuina mai ia i tatou taitaiga ma musumusuga fou.
Ma o le a La’ua fesoasoani ia i tatou e faaauau ona iloaina ia faamanuiaga o le iai o le talalelei i o tatou olaga.