Mai le AM Faalevaiaso
O le Fiaatoatoa Sa Taofia Ai Lo’u Alualu i Luma. O Le Mea Lenei Sa Ou Faia E Uiga i Ai
E finagalo Keriso ia tatou liliu atu ia te Ia i le taimi nei, e tusa lava po o le a lo tatou le saunia.
Fai mai ma le lauiloa ia Theodore Roosevelt, "O le faatusatusa o le gaoi o le olioli."
E faigofie ona iloa pe faapefea ona faatatau lenei faamatalaga i a tatou fegalegaleaiga ma isi. Ae ou te finau o loo i ai se faatatauga faaopoopo i totonu. Atonu o le faatusatusa o le gaoi o le olioli,.ae o le fiaatoatoa, ia te a’u, o le gaoi o le alualu i luma.
Tauivi ma le Fiaatoatoa
Mo le tele o lo’u olaga, o a’u o se tagata aoga maoae ma se afafine faamaoni. Sa ou faamaualugaina a’u lava i lo’u tomai e faapaleni ai le galuega, aoga, ma le aiga.
Sa ou tauivi ma le popole i tua atu sa ou le manao i se tasi e iloa lo’u latalata atu i le malepelepe. O lenei fiaatoatoa na oo atu i se maualuga e le gafatia i le taimi o lo’u tausaga amata i le kolisi.
Sa ou malemo i la’u avega o le kosi. Sa le lelei o’u togi e pei ona sa i ai i le aoga maualuga. Sa ou faaaluina ni itula faaopoopo i le galuega. Sa se’e atu lo’u valaauga i le Ekalesia i mavetevete.
Sa ou lagona le pei o se toilalo atoa ma le atoatoa.
I le pito i luga o lena mea, sa ou fefe tele e fesili atu mo se fesoasoani. Sa le mafai ona ou tautino atu—ia te au lava ia, i isi, ma i le Atua—ua matua mamao ese lava lo’u olaga mai lou gafatia e pulea ai.
Sa lapatai mai Elder Vern P. Stanfill o le Fitugafulu: "O le fiaatoatoa e manaomia ai se tulaga faatonuina faigata, e faia e le tagata lava ia e faatusatusa ai i tatou i isi. O lenei mea e afua ai le tausalaina ma le atuatuvale ma e mafai ona tatou mananao ai e o ese ma faaesea i tatou lava” Ma sa ou aoaoina lena lesona i se ala faigata.
Sa ou talitonu sa tatau ona mafai ona taulimaina mea uma sa tuuina mai i lo’u ala. Ina ua le mafaia, sa ou lagonaina le tausalaina atoa lea sa taofia ai a’u i le liliu atu i lo’u Tama Faalelagi ina ua ou matua manaomia lava o Ia.
Sa le mafai ona ou agai i luma i soo se vaega o lo’u olaga.
Ae sa le’i leiloa le faamoemoe. E pei ona saunoa mai ia Elder Gerrit W. Gong o le Korama a Aposetolo e Toasefululua, “E ala i le liua faaleagaga ia Iesu Keriso, e mafai ai ona tatou sao mai fiaatoatoa faavaivai loto.”
Mauaina O Le Filemu i A’u Feagaiga
I le mae’a ai o se tasi aso faigata lava, sa ou lagona le uunaiga e alu i le malumalu ma faia papatisoga mo e ua maliliu.
O iina i le vai papatiso, sa ou lagona ai le alofa sa matua malosi lava sa maligi ai o’u loimata.
Sa ou toe tepa i lo’u lava papatisoga ma le fiafia sa ou maua i le faamamaina e ala i le Togiola a Iesu Keriso. Ina ua uma ona ou savali ese mai le vai papatiso, sa fesili mai lo’u tina pe na faapefea lou lagona. I le susu pala ma le tetete faalia, sa ou tali atu i upu mama a se teineitiiti valu tausaga: "Tina, o lo o ou lagona le matua mafanafana i totonu."
O lena aso i le malumalu, sa ou iloaina sa ou matua taulai atu i le fiaatoatoa e ala i lo’u lava lelei lea na matua ou faafitia ai le avanoa e faaatoatoaina ai ia Keriso (tagai i le Moronae 10:32–33). Sa ou lagona se faamautinoaga mamana e mafai ona ou maua lena lava lagona mafanafana i aso uma. Afai ou te salamo pea, e mafai ona faaatoatoaina a’u e ala ia Iesu Keriso ma Lana Togiola (tagai i le Ioane 17:23).
Opogiina o le Avanoa Loa Lua
Mai lena aso agai i luma, sa ou tuuto e sui.
Sa amata ona ou toe tatalo tauanau. Sa le’i faigofie—aemaise lava i le amataga—ae sa amata ona ou mafanafana a o o’u faamalosia lo’u sootaga ma le Tama Faalelagi ma Iesu Keriso.
Sa ou sailia foi se malamalamaaga loloto o le Togiola a Iesu Keriso, e taulai atu i le upumoni e faavavau o le a fautua le Faaola e fai ma o tatou sui pe afai tatou te salamo faamaoni.
O le fiaatoatoa e matua faaleagaina ai le faamoemoega o le olaga faaletino. Afai ua auina mai i tatou i le laloagi e aoao e avea e faapei o le Tama Faalelagi ma Iesu Keriso (tagai i le Alema 12:24), e mafai faapefea ona tatou faamoemoe ua avea e faapei o La’ua? Afai tatou te atoatoa moni, tatou te le manaomia se Faaola po o Lana Togiola e le i’u.
E le tuulafoaiina i tatou e le Faaola, e tusa lava pe tatou te lagonaina le le agavaa pe le atoatoa. E pei ona faasoa mai e Peresitene Russell M. Nelson, “Sa puapuaga le Faaola i tiga ma mafatiaga ma faaosoosoga o ituaiga uma’ [Alema 7:11] ina ia mafai ona Ia faamafanafana i tatou, faamalolo i tatou, laveai i tatou i taimi e manaomia ai.”
Ua ou aoaoina e finagalo Keriso tatou te liliu atu ia te Ia i le taimi nei, tusa lava pe tatou te lagona le le saunia. A o tatou faamalosia lena sootaga, o le a Ia fesoasoani mai ia i tatou e faatoilalo o tatou le atoatoa.
Ou te pepelo pe a ou fai atu ou te le o tauivi ma le fiaatoatoa. Ae o lea ua ou maua a’u lava o lagona le "mafanafana i totonu" soo se taimi lava ou te faia ai le mea sili ou te mafaia i le Alii, tusa lava pe le atoatoa.
Afai e te lagona o au taumafaiga o se soo, tagata aoga, tagata faigaluega, uo, po o se tagata o le aiga e le o lava, ia iloa e le o oe o se tagata ua leai se faamoemoe. E mafai ona e malolo e ala i le taulai atu i e Faaola. O le fiaatoatoa atonu o se gaoi i le alualu i luma, ae o le Faaola o le ki i le filemu.
Liliu atu ia te Ia, ma o le a e vaaia le alualu i luma i lou olaga.