O le Salamo E Le Na o le Faatoilaloina o le Agasala

A o lei alu la’u misiona, sa le’i atoatoa lo’u olaga, ae sa lelei. Sa ou fiafia i le kolisi ma faatoa ou maua lea o se uo mamae sili lava. Sa o’u fiafia lava.

Sa ou iloa o le auauna atu i se misiona o le a faigata. Ae, sa i ai pea ia te au lenei faamoemoega o le auauna atu i se misiona o le 18 masina sili lea ona lelei o lo’u olaga—ma ni faigata laiti.

Ae o le ono masina i totonu o le misiona, na avea ai le faaipoipoga a la’u uo ma luitau aupito fou i se lisi o mea faigata ou te lei faamoemoeina. O le siitia atu i se atunuu ese ma le aoaoina o se gagana fou na o’u lagona ai le tuuatoatasi ma le popole. O aafiaga o le teena o se vaega o le olaga faafaifeautalai sa maua ai le ivā faalemafaufau. O le mea moni lava, sa na o lo’u fia alu i le fale.

Sa ou lelava ma fiu, ma ou te lei lagonaina le ofoina mai e le Atua ia te au o le faamoemoe ma le fiafia lea sa ou matuai manaomia lava. Ana le uma ia isi vaega uma sa ou sailiili atu ai, faatoa ou liliu atu ai i se folafolaga mai lo’u faamanuiaga faapeteriaka: o le a ou lagonaina le alofa o le Tama Faalelagi e ala i tusitusiga paia.

A o ou suesue i tusitusiga paia, sa ou maitauina lo’u lagonaina o se sootaga loloto i le tala ia Eva. Sa tuliesea o ia mai le parataiso ma oo atu ai i se togavao pogisa ma le pagatia, lea sa pei na o’u lagonaina. E talitutusa ma lo’u aafiaga, na oo mai le suiga o Eva ona o se filifiliga patino. Sa ou mafaufau pe na ia toe salamo i lana filifiliga, e pei sa amata ona ou salamo i la’u filifiliga e auauna atu.

Ae sa i ai se vaaiga a Eva e sili atu ona poto nai lo a’u. E ui ina sa peiseai sa leiloa mea uma ia te ia, ae ina ua ia iloa e i ai sona Faaola, sa “fiafia o ia, ua fai mai: A na le seanoa la ta solitulafono … po ua le mafai ona ta iloa le lelei ma le leaga, ma le olioli o le togiolaina o i taua” (Mose 5:11).

Na te lei salamo i lana filifiliga. Sa matuai faafetai o ia mo lena filifiliga. E ui ina sa tuliesea i la’ua ma Atamu mai le parataiso, sa sili atu le suamalie o le olioli i le togiolaina nai lo le tiga mai mea sa aveesea. O le mea moni, sa foliga mai o le togiola na aumaia ai ia te ia le olioli sili atu nai lo le tulaga sa i ai sa le manaomia ona togiolaina.

E faapefea ona tupu lena mea?

Atonu tatou te manatu o le salamo e mo na o le aveesea o agasala ma amioga leaga mai o tatou olaga. O le faasologa o le aveeseina e ono faigata ma nisi o taimi e tiga, o lea e faigofie ai ona faapipii atu ai se lagona faalelelei i le upu.

Ae o le salamo e le na o le faaitiitia o le agasala. E faatatau foi i le avea atili e faapei o Keriso.

O le liliu atu ia te Ia—suia o o tatou uiga faaalia ma faaogatusa la tatou vaaiga ma Lana—o se ituaiga salamo foi.

Sa ou iloaina i lo’u ita ma le tuuatoatasi, ua pumoomoo ai la’u vaaiga. Sa ou matuai taulai atu i mea sa ou misia lea na ou le iloa ai le mea na ou mauaina: o se sootaga vavalalata ma lo’u Faaola.

Sa ou iloaina e manaomia ona ou salamo mo lo’u amio le lelei. Sa umi se taimi, ae a o ou aioi atu mo le fesoasoani a lo’u Togiola, sa faamautinoa mai ia te au “o le a ou maua i le olaga lenei le olioli” (Mose 5:10).

Sa ou faanoanoa pea ona sa ou misia le faaipoipoga a la’u uo, ae i se taimi, sa tali mai le Alii i a’u tatalo. Sa ou matua fiafia lava mo la’u uo, ma sa ou maua le olioli tele i la’u molimau e faapea, e silafia moni lava e le Tama Faalelagi ma alofa i Ana fanau uma. Sa sili atu mea na ou mauaina nai lo le mea na ou misia.

Na aoao mai Sister Kristin M. Yee, Fesoasoani Lua o le Au Peresitene Aoao o le Aualofa, “O le salamo e mafai ai ona tatou lagonaina le alofa o le Atua ma iloa ma alofa ia te Ia i auala semanu tatou te le iloaina lava.”

Ona o le salamo, ua ou iloa ai nei a o ou faalatalata atu ia Keriso, “o le a ia faia [lo’u] togavao e pei o Etena, ma [lo’u] toafa e pei o le faatoaga a le Alii; e maua ai i totonu le fiafia ma le olioli” (Isaia 51:3).

Ina ua ou foi i le fale mai lau misiona, ou te lei foi i se parataiso. O le olaga o le mae’a ai o le misiona o se togavao fou mo a’u e atiina ae. E le faigofie, ma o nisi taimi ou te misia ai lava lo’u olaga a o lei alu la’u misiona.

Ae ua ou iloa, ona o Keriso, o le a atili loloto ai lo’u olioli i le malamalama o lo’u togiola.