Mai le AM Faalevaiaso
Pe a Foliga Mai Ua Le Mafai ona Faaleleia Mea, Ave Oe Lava i se "Inisinia Faaleagaga"
O le salamo e pei lava o le faaleleia o se taavale—o nisi taimi e te manaomia ai se tasi e i ai tomai faapitoa e fesoasoani ia te oe.
Ina ua 16 o’u tausaga, sa tonu ia te a’u e faaleleia le taavale Mustang ’67 tuai a lo’u tinamatua. Sa ou galue muamua i taavale, ae e le o le ituaiga o afi lea, ma sa tele ni faafitauli. Na pau lava le auala e faaleleia ai o le aveese lea o le afi, faata’ape, ma toe tuufaatasia.
Sa ou faatauina se tusi i le lipeaina o le afi ma faitau faatolu mai le faavaa i le faavaa, tau faamasani ai i le fausaga. Sa ou lipeaina ma suia vaega tuai uma, ae ina ua ou faaolaina le afi, sa pusa mai tua. Pusa moni lava—na pa mai ai i fafo le afi.
O lea sa ou toe alu ai e suesue. Sa ou iloa ai sa le sa’o lou toe tuuina o se vaega o le afi, o lea sa ou toe fetuunaia ai ma toe ola ai le taavale.
O le taimi lea, sa gaoioi le afi … pe a fua iai. Ae sa pa’o faaletonu. E pei, sa sili atu le leaga nai lo le taimi muamua ae ou te lei faataapeina le afi e amata ai. Sa matua ou lotovaivai lava ma le fiafia. Sa ou galue malosi, ae sa ou leiloa pe o le a le mea sa sese ona ou fai, e itiiti ifo pe faapefea ona faaleleia.
Sa ou lagona e pei ua ou toilalo.
Pe afai na sese muamua se mea ia te oe - ma talu ai o oe o se tagata ola, ua e—atonu na e lagonaina lea lagona e tasi. Pe a e faia se measese pe agasala, e mafai ona faigata ona iloa le auala e faaleleia ai lou "afi faaleagaga." Faafetai, ua iai ni o tatou taitai alolofa po o "inisinia faaleagaga" e mafai ona fautuaina i tatou a o tatou liliu atu i le Faaola mo le faaleleia.
E Leai Se Mea E Le Mafai Ona Faaleleia
Pe a tatou agasala, o le salamo e aofia ai le iloaina o le measese ua tatou faia, faia o faatinoga talafeagai e faasa’oina ai, ma tumau ai—faia faasa’oga ia e tumau.
E ui i lea, e le faigofie i taimi uma. O nisi taimi e te manao e sui, ae e ui i au taumafaiga sili, e te toe pa’u atu pea i tua i vaisu masani. E te ono lagona foi e faapea o le faatoilaloina o au agasala o se mea e le mafai ona fai.
Ae e le moni lena mea.
E le mafai lava ona le faasaoina oe. E oo lava i le taavale a lo’u tina matua, i le leaga e pei ona vaaia, sa mafai ona faaleleia.
Sa na ona ou manaomia lava o sina fesoasoani faaopoopo.
Sa ou avea le taavale i se inisinia sa ia iloa lelei le ituaiga o afi lea, ma sa mafai ona ia maua le faafitauli. Sa ia faaleleia ma faaali mai ia te au le auala e faasa’o ai i le lumanai ina ia mafai ai ona ou faaolaina pea le afi i le ala e tatau ai. Sa matua ou fiafia lava ona e lei faaletonu le poloketi, faafetai i se tasi na sili atu le atamai nai lo a’u—se tasi na mafai ona aoaoina a’u.
Pe a lagonaina e pei ua oo lou "afi faaleagaga" i se taofi atoatoa, o le salamo e mafai ona “faamumuina le malosi faaleagaga lelei” ma uunaia oe e toe agai i luma. Ma o le fesoasoani mai se punavai atamai e mafai ona faaali atu ia te oe le auala tonu e faia ai.
E le o Tuua Na o Oe.
Atonu e lagona le maasiasi po o le fefe e ta’uta’u atu se agasala i lou epikopo po o le peresitene o le paranesi, ae o lagona o le ma e le mai le Atua. Sister Tamara W. Runia, Fesoasoani Muamua i le AuPeresitene Aoao o Tamaitai Talavou na ia aoao mai talu ai nei, “E ui ina popole le Atua e uiga ia tatou measese, e sili atu Lona ano i le mea e tupu pe a mavae ona tatou faia o se sese.”
O le saiia o le fesoasoani i le salamo e le o se faailo o le vaivai. O se faailo ua ia te oe le lotomaualalo e faalagolago i le faagasologa ma le taitaiga a le Tamma Faalelagi.
O le mafuaaga lena na faatauanau mai ai Elder Scott D. Whiting o le Fitugafulu: “Aua e te lafilafi mai ia i latou o le a alolofa ma lagolagoina oe; ae, tamoe i ai. O epikopo, peresitene o paranesi, ma taitai lelei e mafai ona fesoasoani ia te oe ia maua le mana faamalolo o le Togiola a Iesu Keriso.”
Mafaufau iai i le auala lenei: Ina ua ou alu atu i se inisinia mo se fesoasoani i le afi o e taavale, sa ia le faia ia ou lagona le valea, auina ese a’u, pe fai mai ou te foia e au lava ia. O lana galuega o le faaleleia o faafitauli tau taavale!
I se auala tutusa, o le galuega a le epikopo o le fesoasoani i tagata lotu o lana uarota e mulimuli ia Iesu Keriso, lea e aofia ai le salamo. O le mea moni, o lana “tiutetauave autu o le tupulaga faiae i le uarota.” E aofia ai ma oe!
E te le o faamamafaina le avega a lou epikopo po o le peresitene o le paranesi pe a e alu atu iai mo se fesoasoani. O lana galuega e le o le faitioina o oe po o le ta’u atu ia te oe e tatau ona e iloa lelei. O lana galuega o le lagolagoina lea o oe ma taiala oe i punaoa o malosiaga faaleagaga ma faalelagona—aemaise lava i lou Togiola.
E Iai Se Tasi e Malamalama
E tusa lava pe le’i ui mai lou epikopo i le ala tonu ua e iai, e malamalama Iesu Keriso, ma Na te fesoasoani ia te oe i lena talanoaga. Faatasi ai ma le Faaola, e leai se mea e le mafai ona le faaleleia.
Ou te iloa e ma te savavali ma le Faaola a o o’u taumafai e faaleleia a’u measese. Na te faia ia mafai ona ou faia le galuega lea ou te manaomia ona fai. Ou te matua faafetai mo le taitaiga, taiala, ma le fesoasoani na Ia tuuina mai. Na te faaagavaaina a’u e tausia lo’u "afi faaleagaga" ia atoatoa ma agai i luma i luga o le ala o feagaiga, e tusa lava pe iai nai mea e pusa mai tua i le aluga o le ala.