Maʻá e Ngaahi Faʻē ʻo e Fānau Īkí
ʻI he Taimi ʻOku ʻIkai Fuʻu “Fakaofo” Ai ʻa e Hoko ko ha Faʻeé
Ko e angamaheni ʻo e tuʻunga fakafaʻeé ʻoku faʻa fakafiefia mo ʻi ai ha ngaahi pole.
ʻI heʻeku fuofua hoko ko ha faʻē mo ha pēpē valevalé, naʻá ku ongosia. Kuó u ʻā he poó kakato mo ʻeku pēpeé, pea mālō pē ʻema aʻu ki he lotú. Hili e lotú, naʻe puke atu ʻe ha fefine toulekeleka angaʻofa siʻoku nimá mo pehē mai, “Hono ʻikai fakaofo ʻa e hoko ko ha faʻeé?”
Naʻá ku fuʻu puputuʻu ke fakahoko ange ha tali. Kuó u fiemaʻu maʻu pē ʻi he kotoa ʻo ʻeku moʻuí ke hoko ko ha faʻē, pea neongo te u lava ʻo pehē ʻoku ʻi ai ha ngaahi tafaʻaki fakaofo lahi ʻo e hoko ko ha faʻeé, ka ʻi he mōmeniti ko iá, naʻe ʻikai fuʻu ongo “fakaofo” ia kiate au.
Naʻe kamata ke u ongoʻi halaia ʻi he hū ki hoku ʻatamaí ha ngaahi fakakaukau fakatupu lōmekina mo loto-hohaʻa. Fēfē kapau naʻe ʻikai ke u fie hoko au ko ha faʻē? ʻI he ngaahi faingataʻa ʻo e fefaʻuhi mo ha pēpē valevalé, naʻe ʻikai ke u faʻa ongoʻi ʻa e “fakaofo” naʻe talamai ʻe he ngaahi faʻē kehé. Naʻe mamahi foki hoku lotó ki he houʻeiki fafine naʻa nau fakaʻamua ke nau hoko ko ha ngaahi faʻeé, peá u ongoʻi siokita ʻi he ʻikai ke u saiʻia ʻi he miniti kotoa pē ʻo ʻeku hoko ko ha faʻeé.
Naʻá ne ʻai nai au ke u hoko ko ha faʻē kovi? Ko au tokotaha pē nai naʻe ongoʻi pehení?
Ko Hono Kumi ʻo e Fakaofó
Naʻá ku tohi ki ha niʻihi ʻo hoku ngaahi kaungāmeʻa ne nau toki fāʻelé. Naʻá ku ongoʻi fiemālie ʻi he fanongo ne nau maʻu pē foki mo kinautolu ha ngaahi ʻaho (mo ha ngaahi pō) faingataʻa. Naʻe takiekina au ʻe heʻeku talanoa mo kinautolú ki ha fakakaukau fakaʻofoʻofa.
Mahalo pē ʻoku tau fakaʻaongaʻi ʻa e foʻi lea fakaofó ke fakamatalaʻi ʻaki ʻa e hoko ko ha faʻeé koeʻuhí ʻe malava pē ke faingataʻa mo fakaʻofoʻofa ʻi he taimi tatau.
Kuó u ongoʻi loto-mamahi ʻi heʻetau fakaʻaongaʻi ʻa e foʻi lea fakaofó ke fakamatalaʻi ʻaki ʻa e hoko ko ha faʻeé, kae ʻikai ko ha ngaahi lea hangē ko e faingataʻa, taʻesiokita, ʻosi kia velenga, ngaahi lea naʻe ongo moʻoni kiate au ʻi he fakafalala mai ʻeku pēpeé kiate au ʻi ha houa ʻe 24 ʻaho ʻe 7. Naʻá ku meimei fakaʻamu naʻe ʻeke mai ʻe he fefine ʻi he lotú, “ʻIkai ʻoku mātuʻaki faingataʻa ʻa e hoko ko ha faʻeé?”
Fakafokifā kuo haʻu ki heʻeku fakakaukaú ʻa e ngaahi lea ʻo e foʻi himi “ʻOku Fakaofó.”
Naʻe mafatukituki ʻa e Fakalelei ʻa e Fakamoʻuí, taʻesiokita pea mo ʻosi kia velenga. Pea ko ʻeni ʻoku tau fakamatalaʻi ia ʻe kitautolu ʻi he foʻi hiva ko iá ʻo fakaʻaongaʻi ʻa e foʻi lea fakaofó.
Ko e Meʻa Kuo Akoʻi Au Ki Ai ʻe he Hoko ko ha Faʻeé
Kuo taʻu taha ʻeni hoku fohá, pea ʻi heʻeku fakakaukau atu ki he taʻu kuo ʻosí mei heʻeku hoko ko ha faʻeé, kuó u ako ha meʻa lahi. Pea ko e mahuʻinga tahá, kuó u toe ofi ange kia Sīsū Kalaisi.
Kuó u faʻa fakakaukau ki he konga lea ko ʻeni meia Palesiteni Sefilī R. Hōlani, Palesiteni Leʻoleʻo ʻo e Kōlomu ʻo e Kau ʻAposetolo ʻe Toko Hongofulu Mā Uá: “ʻOku ʻikai ha ʻofa ʻi he moʻui fakamatelié ʻe momoʻi fakatataua ki he ʻofa haohaoa ʻa Sīsū Kalaisí, ka ko e ʻofa taʻe-siokita ʻa ha faʻē tōnunga ki haʻane tama.”
Kuo mahino lelei ange kiate au ʻa e Fakamoʻuí ʻi heʻeku ako ʻa e meʻa ʻokú ne ʻai kita ke te hoko ko ha faʻeé.
Kuó u maʻu foki ha loto-houngaʻia lahi ange ki heʻeku faʻē ʻofá pea mo e ngaahi feilaulau taʻefaʻalaua kuó ne fai maʻaku ʻi heʻeku moʻuí kotoa. Ko e fakaofó ko ha foʻi lea ia te u fakaʻaongaʻi ke fakamatalaʻi ʻaki ia.
ʻOku lave maʻu pē ʻa e folofolá ki he ngaahi faʻeé mo e tuʻunga fakaefaʻeé. ʻI heʻeku lau e folofolá ko ha faʻeé kuó u maʻu ai ha fakakaukau foʻou ki heʻeku moʻuí.
Hangē ko ʻení, ʻi heʻeku toe lau ʻa e ʻĪsaia 49:15 ʻoku ongo moʻoni ange ia kiate au he taimí ni ʻi he mahino kiate au ʻa e tūkunga ʻo hono fafanga maʻu pē haʻate tamá: “ʻE faʻa fakangalongaloʻi ʻe ha fefine ʻene tama ʻoku huhú, ke ne taʻeʻofa ai ki he tama ʻa hono manavá? ʻIo, te nau faʻa fakangalo nai, ka ʻe ʻikai te u fakangalongaloʻi koe.”
He ʻikai lava ʻe hoku sinó fakatuʻasino ʻo fakangaloki ʻoku ʻi ai haʻaku tama ʻoku fakafalala kiate au, ka—ʻoku ʻikai pē ke teitei fakatataua ia ki he ʻofa haohaoa mo taʻengata ʻoku maʻu ʻe he Fakamoʻuí kiate kitautolú.
Kuo tokoni hono ohi hake ha fohá ke mahino lelei ange kiate au ʻa e ngaahi tāpuaki kuo talaʻofa mai ʻo ʻeku ngaahi fuakava fakatemipalé mo ʻomi ha taumuʻa fisifisimuʻa ange ʻi hono fiemaʻu ke moʻui ʻaki e ngaahi akonaki ʻa e Fakamoʻuí.
ʻI he ʻaho kotoa pē ʻo ʻeku hoko ko ha faʻeé ʻokú ne ʻomi ha ngaahi faingataʻa mo ha fiefia fakatouʻosi, ʻa ia ʻokú ne fakamatalaʻi lelei ʻa e ʻuhinga ʻo e malava ke “fakaofo” ʻa e hoko ko ha faʻeé, naʻa mo e taimi mahalo he ʻikai ongo pehē aí.
Neongo ʻoku ʻikai ke u ongoʻi maʻu pē ʻo hangē ha faʻē “fakaofó”, ka ʻoku ou ʻamanaki ʻi he ʻaho takitaha te u lava ʻo hangē ange ko hoku Fakamoʻui ko Sīsū Kalaisí, pea akoʻi hoku fohá ʻi he founga ke muimui ai ʻi Hono ngaahi ʻalungá.