Kaveinga ʻo e Māhina Ní: Ko e Houngaʻia ʻi he Fakafiefia ʻo e Fakatomalá

Siʻi ngaahi kaungāmeʻa,

ʻOku ʻikai ke u saiʻia hono fakahoko ha ngaahi fehalākí. Mahalo te mou pehē ʻoku ou fie haohaoa.

ʻA ia ʻoku ngali kehe, koeʻuhí he ko ʻeku ngāue ko ha tokotaha faʻu tohí ʻoku fiemaʻu ai ke u fakahū ha ngāue ʻoku ʻikai haohaoa ʻi he ʻaho kotoa pē.

Ko e hā pē ha fakamatala te u ngāue ki ai ʻe fou ia ʻi ha ngaahi fakatonutonu kehekehe kae ʻoua kuo aʻu ki he lelei taha ʻe lava ʻo aʻu ki aí. Pea ʻoku mou ʻilo ha meʻa? ʻOku ʻikai ke u loto-mamahi ʻi hono fakahaaʻi mai ʻeku ngaahi fehalākí, ka ʻoku ou saiʻia he sio ki hono fakatonutonu e ngaahi fehalaākí kae ʻoua kuo lelei ange ʻa e fakamatala aofangatukú ʻi he tuʻunga ne u mei lava ʻiate au peé.

Kiate au, ʻoku fakahaaʻi heni ha konga siʻi pē ʻo e fiefia ʻoku hoko ʻi he fakatomalá.

Ko e malava ke fakatomalá ko e taha ia ʻo e ngaahi maka tuliki ʻo e ongoongolelei ʻo Sīsū Kalaisí, ka ki ha kakai tokolahi, ko e foʻi fakakaukau ʻo e fakatomalá ʻokú ne ʻomi ʻe ia ha ilifia pe ongoʻi halaia kae ʻikai ko ha fiefia. ʻI he fiemaʻu ke ke fakatomalá, mahalo te ke ongoʻi hangē ʻoku ngaohi koe ʻe hoʻo ngaahi angahalá ke ke hoko ko ha tokotaha kovi.

Ka ko e meʻá ʻeni: Ko e fiemaʻu ke ʻi ai ha tokotaha ʻētitá ʻoku ʻikai ʻuhinga ia ko ha tokotaha faʻu tohi kovi au. ʻOku ʻikai ʻuhinga e fiemaʻu ia ke fakatomalá, ko ha tokotaha kovi au.

Ko e fakatomalá ʻoku ʻikai ko ha palani talifaki ia pe fakaʻilonga ʻo ha taʻelavameʻa. Ko e fakatomalá ʻa e palaní! Naʻe ʻafioʻi ʻe he Tamai Hēvaní te tau fiemaʻu ha Fakamoʻuí ke tau lava ʻo toe foki hake ai kiate Ia. Pea ʻoku ʻikai momou ʻa Sīsū Kalaisi ke tokoniʻi kitautolu—ʻokú Ne finangalo ke tau maʻu Hono mālohí.

ʻI hoʻo lau e ngaahi talanoa ʻo e māhina ní mei ha kakai lalahi kei talavou kuo nau aʻusia ʻa e fakafiefia ʻo e fakatomalá, ʻoku ou fakatauange ʻe ueʻi kimoutolu ke mou ongoʻi ʻa e loto-houngaʻia, loto-falala mo e nonga ko iá. Ko ha ngaahi fakamatala ʻeni ʻe niʻihi te ke lava ʻo maʻu ʻi he māhiná ni:

• Ko ha tokotaha lahi kei talavou mei he ʻOtu Filipainí naʻá ne ikunaʻi ʻene ilifia ke talanoa ki heʻene pīsopé

• Ko ha sisitā mei ʻAfilika Tonga ʻokú ne ʻiloʻi ʻoku ʻikai fiemaʻu ke ne haohaoa kae ʻi ai hano mahuʻinga

• Ko e ʻuhinga ʻo e fakatomala fakaʻahó

• Ko ʻeku fakamatala fekauʻaki mo e founga ʻoku tokoniʻi ai kitautolu ʻe he fakatomalá ke tau tafoki kia Sīsū Kalaisí

ʻOku tau maʻu foki ha ngaahi talanoa ko ha konga ʻo ʻetau ngaahi fakamatala hokohokó:

• Mei he Malaʻe ʻo e Ngāue Fakafaifekaú: Founga ke falala ai ki he ʻEikí ʻi he taimi ʻoku ʻikai fenāpasi ai e ngaahi uiuiʻi fakafaifekaú—mo e lea fakafonuá—mo hoʻo ʻamanakí

• Ko Hono Fakaʻaongaʻi ʻo e Fuakava Motuʻá ki Hoʻo Moʻuí: Poupou ʻa e Haʻu, ʻo Muimui ʻIate Aú fekauʻaki mo e ʻuhinga, feituʻu, mo e meʻa ʻi he hoko ko ha tauhi ʻo e ngaahi fakatupu ʻa e ʻOtuá

• ʻOku Ou Tui: Founga ke sio ai ki he ongoongoleleí ʻaki ha vakai foʻou, neongo kapau kuó ke hoko ko ha mēmipa ʻi ha taimi fuoloa.

• Ki he Ngaahi Faʻē ʻo e Fānau Īkí: Ko e meʻa ʻoku fai ʻe ha faʻē kei siʻi ke mahino ʻoku fakaofo ʻa e hoko ko ha faʻeé—neongo e taimi ʻe ʻikai ongoʻi pehē aí

Kapau ʻoku ʻi ai ha meʻa ʻe taha ʻoku ou loto ke mou ako mei he fakamatala ko ʻení, ʻoku ʻofeina moʻoni kimoutolu. ʻOfeina ʻe he kau ngāue ʻo e YA Fakauiké, kae mahuʻinga tahá, ʻofeina ʻe homou Tamai Hēvaní mo homou Huhuʻí. Kātaki ʻo fanongo ki Heʻena pōpoaki ʻi he makasini ko ʻení: ʻoku ʻi ai maʻu pē ha founga ke foki ai kiate Kinaua. Pea te Na fai ʻa e meʻa kotoa pē ʻe ala malavá ke tokoniʻi koe ke ke haʻu ki ʻapi.

ʻOfa atu,

Madelyn Maxfield, ko e akoako ʻētita ki he Ki Hono Fakamālohia ʻo e Toʻu Tupú