Mei he YA Fakauiké
Ngaahi Moʻoni ʻe 5 ke Fakamālohia Koe ke Fakafepakiʻi ʻa Hono Fakaʻaongaʻi ʻo e Ponokalafí
ʻE lava ke tokoniʻi kitautolu ʻe Sīsū Kalaisi ke tau ikunaʻi e ngaahi tōʻonga moʻui maʻunimaá pea takiekina ʻetau ngaahi holí ki he māʻoniʻoní.
Naʻe teʻeki ke u fakataumuʻa ke maʻunimā au ʻe he ponokalafí mo e ngāue fakatongá (masturbation), ka ʻi heʻeku kei toʻu tupú, naʻe faifai pea takiekina atu ʻe heʻeku fieʻiló—fakataha mo e ngaahi meʻa ne u sio ai ʻi he ʻinitanetí—ki he ngaahi ʻulungaanga ko iá. Neongo ne u ongoʻi mā, ka naʻe faingataʻa ke u siʻaki e ngaahi tōʻonga moʻui ko iá, tautefito ki he ngaahi taimi ʻo e tuenoá, loto-mafasiá pe mamahí.
ʻI he lotolotonga ʻo ʻeku ngaahi faingataʻaʻiá, naʻe ʻi ai ha meʻa mālohi ʻe nima ne u ako naʻá ne poupouʻi mo tokoniʻi au ke u mapuleʻi lelei ange au, ʻofa lahi ange pea mo maʻu ha tui lahi ange kia Sīsū Kalaisi.
1. ʻOku Toputapu ʻa e Ongo Fakasekisualé
Ko e meʻa ʻe taha naʻá ne tokoniʻi aú ko ʻeku ʻilo ʻoku lelei pea toputapu ʻa e ongo fakasekisualé, kae ʻikai fakamā. ʻOku tokoni ʻetau ngaahi ongo fakasekisualé mo e ngaahi holí ke tau faʻu ha fānau pea fiefia, ʻofa mo uouangataha mo hotau ngaahi hoa malí ʻi heʻetau malí. ʻOku fekauʻi kitautolu ʻe he ʻOtuá ke fakaʻaongaʻi hotau tuʻunga malava fakasekisualé ʻi he vā fakamalí pē koeʻuhí ke tau lava ʻo aʻusia kakato ʻa e lelei ʻo e mālohi ko ʻení.
Naʻe akoʻi ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ko e ngaahi vā fakasekisualé “ʻoku ʻikai ko ha fie ʻilo pē ki ha meʻa ke ʻahiʻahiʻi, fakafiemālieʻi ha holi, pe ha faʻahinga fakafiefia pe meʻa fakamānako ke tulifua siokita ki ai” ka “ko e meʻa pē ia ʻe taha ʻokú ne fakahaaʻi ai hotau anga fakalangí mo e meʻa ʻoku tau malavá mo ha founga ke fakamālohia ai e ngaahi haʻi fakaeloto mo fakalaumālie ʻi he vā ʻo e husepānití mo e uaifí.”
Ko ʻetau fakaʻānaua ke fakahaaʻi ʻa e ʻofá ʻi loto ʻi he vā ʻo e nofo-malí ko ha ngaahi holi māʻoniʻoni ia. Pea “ʻi hono aʻusia ʻo e ngaahi ongo fakasekisualé ʻoku angamaheni ia” ki he houʻeiki tangatá mo e fafiné fakatouʻosi. Ka ʻoku feinga ʻa Sētane ke fakaʻaongaʻi ʻetau ngaahi holí ke takiekina taʻetotonu kitautolu. ʻOkú ne ʻahiʻahiʻi kitautolu ke tataki hotau tuʻunga malava fakasekisualé ki ha ngaahi ʻulungaanga fakamamahi kae ʻikai ko ha ngaahi taumuʻa fakalangi.
2. ʻOku ʻIkai ʻOmi ʻe he Fakatonuhiaʻi Hoʻo Tōʻonga Moʻuí ʻa e Nongá
ʻOku pehē ʻe he māmaní ko e ngāue fakatongá (masturbation) mo e mamata ʻi he ponokalafí ko ha meʻa ia ʻoku ʻikai kovi pe ko ha ngaahi tōʻonga moʻui lelei ia. Naʻá ku feinga ʻi ha ngaahi taimi ʻe niʻihi ke fakaʻaongaʻi ʻe ngaahi fakakaukau ko ʻení ke fakatonuhiaʻi ʻeku ngaahi angafaí. Ne u pehē kiate au pē, “ʻOku ʻikai uesia ha toe taha kehe ia heni, ko ia ʻoku ʻikai ke ne fakatupu ʻe ia ha kovi.”
Ka neongo ia, ne u ʻiloʻi naʻe ʻikai ʻomi ʻe hono fakatonuhiaʻi ʻeku tōʻonga moʻuí ha nonga. Ka naʻá ku ongoʻi liʻekina, loto-mamahi pea fihia ʻi heʻeku ngaahi tōʻonga moʻuí pē. Naʻe kamata ke u fakatokangaʻi naʻe taʻofi au ʻe heʻeku ngaahi tōʻonga moʻuí—ʻa ia ne u ʻosi ʻiloʻi ʻoku fepaki mo e ngaahi fekau ʻa e ʻOtuá—mei he fetuʻutaki mo e ʻOtuá mo hono maʻu ha fiefia ʻoku moʻoní.
3. ʻE Fakamālohia Koe ʻe Sīsū Kalaisi
Neongo ne u fiemaʻu ke liliu ʻeku ngaahi tōʻonga moʻuí, ka naʻe ngali taʻemalava he taimi ʻe niʻihi. Ka naʻá ku maʻu ha ʻamanaki lelei ʻi heʻeku tafoki kia Sīsū Kalaisí.
Naʻá ku ʻiloʻi ʻokú Ne manavaʻofa ki he tokotaha kotoa pē ʻoku vaivai, mamahi pe mafasiá. Naʻá Ne fakaloloto ʻeku holi ke fakatomala pea tauʻatāiná peá Ne ʻomi ʻa e mālohi ke fili ha ngaahi tōʻonga moʻui ʻoku lelei angé. Neongo ne u tō mo humu ʻi ha ngaahi taimi lahi, ka naʻá Ne tokoniʻi au ke u “tupeʻi atu ʻa e ngaahi seini” naʻá ne fusi hifo aú (2 Nīfai 1:23).
Naʻe kamata ke u fetongi ʻeku ngaahi tōʻonga moʻui koví ʻaki ha ngaahi ʻekitivitī naʻá ne ʻomi ha fiefia, hangē ko e feohi mo e kakai ne u ʻofa aí, fakatupulaki hoku ngaahi talēnití pea mo hono ako ʻo e ongoongoleleí. Naʻá ku maʻu foki ha mālohi ke talanoa mo ʻeku pīsopé mo ha kakai kehe ne nau poupouʻi au.
Naʻa mo e taimi ne u fakalakalaka aí, ne u kei ongoʻi pē he taimi ʻe niʻihi ha loto-foʻi pe mā, ka naʻá ku feinga ke falala kia Sīsū Kalaisi mo ʻEne Fakaleleí. Naʻe pau ke u ngāue ʻaki ʻeku tuí naʻa mo ʻeku ngaahi vaivaí, naʻe feʻunga ʻEne ʻaloʻofá maʻaku (vakai, ʻEta 12:27).
Naʻe akonaki ʻa ʻEletā J. Tēvini Kōnisi, ko ha Fitungofulu Māʻolunga Fakalangilangi, “Kapau te mou feinga fakamātoato pea ʻoua ʻe kumi ʻuhinga mo angatuʻu—kae toutou fakatomala mo tautapa ke maʻu e ʻaloʻofa pe ko e tokoni ʻa Kalaisí—te ke ‘lelei feʻunga,’ pē koe ai, ʻo fakahōifua ki he ʻEikí.”
4. ʻE Lava Ke Ke “Fonu ʻi he ʻOfá”
Naʻe akoʻi ʻe he palōfita ko ʻAlamaá, “Tokanga foki ke ke taʻofi kotoa hoʻo ngaahi holi fakakakanó, koeʻuhi ke ke fonu ʻi he ʻofá” (ʻAlamā 38:12). ʻE lava ke ʻuhinga ʻa e taʻofí ki hono takiekina, puleʻi pe fakaʻehiʻehi.
Naʻá ku ʻiloʻi ko e taimi ʻoku ou ngāue ai ʻo fakatatau mo ʻeku ngaahi ongo fakasekisualé ʻi ha ngaahi founga taʻefakangatangata pe ʻikai māʻoniʻoni, naʻá ku aʻusia ha ongo liʻekina. Ka ʻi he taimi naʻá ku taʻofi mo takiekina ai ʻeku ngaahi ongo fakasekisualé ki ha ngaahi taumuʻa māʻoniʻoní, naʻá ku fonu ʻi he ʻofá.
Lolotonga ʻeku kei tāutahá, ne u maʻu ha mālohi ʻi he tokanga taha ki heʻeku ngaahi holi māʻoniʻoní ke fakahaaʻi ʻi ha ʻaho ʻeku ngaahi ongo fakasekisualé ʻi ha nofomali taʻengata. ʻI heʻeku fehangahangai mo e filí, naʻá ku feinga ke manatuʻi ʻa e meʻa naʻá ku fiemaʻu moʻoní ko e ʻofa tuʻuloá, kae ʻikai ko e fakahōhōloto fakataimí. Naʻá ku maʻu foki aʻ e moʻui kakató mo e fiefiá ʻi he fetuʻutaki mo e niʻihi kehé pea mo hono fakamālohia hoku ngaahi vā fetuʻutaki mo e Tamai Hēvaní, Sīsū Kalaisi mo hoku fāmilí, pea mo hoku ngaahi kaungāmeʻá.
Naʻe faifai peá u fetaulaki mo ha taha ne ma mali kimui ange. Naʻá ma fāifeinga fakatouʻosi ke moʻui ʻaki e fono ʻo e angamaʻá pea teuteu ki he mali temipalé. Naʻe fakaʻaiʻai kimaua ʻe heʻema ʻofa ki he ʻEikí, ʻe heʻema feʻofaʻakí, pea mo ʻema loto-holi ke maʻu ha vā fetuʻutaki fiefia mo moʻui leleí.
ʻI heʻema tauhi ko ʻeni ʻema fuakava ʻi he malí, ʻokú ma fiefia ʻi he ngaahi tāpuaki kakato ʻo e ongo fakasekisualé kuo foaki mai ʻe he ʻOtuá. ʻOku fakafaingamālieʻi ʻe heʻema fetauhiʻaki kiate kimaua pea kia Sīsū Kalaisí ke ma aʻusia ai ha fiemālie, uouangataha mo e fiefia.
5. ʻOku ʻOmi ʻe he Fakamoʻuí ha ʻAmanaki Lelei mo ha Fakamoʻui
ʻE malava ke faingataʻa ke tauhi ʻa e fono ʻo e angamaʻá pea fakaʻehiʻehi mei he ngaahi tōʻonga moʻui koví, tautefito kapau ʻokú ke ongoʻi tuenoa pe tatali ki ha faingamālie ke toki mali.
Ka ʻoku maʻu ʻe he Fakamoʻuí ha mālohi ke tokoniʻi kitautolu ke ikunaʻi ʻa e filí pea fekumi ki he moʻui kakató. Naʻe fakamoʻoniʻi ʻe Palesiteni Lāsolo M. Nalesoni kimuí ni mai: “Naʻe toʻo ʻe Sīsū Kalaisi kiate Ia ʻa hoʻo ngaahi angahalá, hoʻo ngaahi mamahí, hoʻo loto-mamahí mo ho ngaahi vaivaí. ʻOku ʻikai ko ha meʻa pau ke ke fuesia toko taha pē kinautolu! Te Ne fakamolemoleʻi koe ʻi haʻo fakatomalá. Te Ne tāpuakiʻi koe ʻaki ʻa e meʻa ʻokú ke fiemaʻú. Te Ne fakamoʻui ho laumālie kuo kafó.”
ʻOku finangalo ʻa e ʻOtuá ke ke aʻusia ʻa e fiemālie fakasekisualé mo e fiefiá ʻi he founga naʻá Ne fakataumuʻa ki aí. Te Ne takiekina koe ki he hala ʻo e fuakavá. ʻOkú Ne fonu ʻi he manavaʻofa pea lava ke tokoniʻi koe ke ikunaʻi hoʻo ngaahi faingataʻaʻiá mo maʻu hoʻo ngaahi holi māʻoniʻoní.