Founga ʻe 3 ke “Fekumi ki he ʻIlo” (ʻOku ʻIkai Kau ai ʻa e Akó)

Ko e hā ha taukei ʻi he moʻuí ʻoku teʻeki ai ke ke ako? Ko ha ngaahi tafaʻaki ʻeni ʻo e moʻuí te ke lava ʻo fakaleleiʻi ai hoʻo ngaahi taukeí:

• Ngaahi taukei ʻo e ʻapí (feimeʻatokoni pe teuteuʻi ʻo ha houa kai, fakatau mai ha ngaahi meʻa ki he ʻapí ʻo ngāue ʻaki ha patiseti, fokotuʻutuʻu pe fakamaau, tokangaʻi ha fanga kiʻi ʻakau pe ngoue matalaʻiʻakau)

• Ngaahi taukei ʻi he ngāue maʻuʻanga moʻuí (fakaleleiʻi e kulupu fengāueʻakí mo hono fokotuʻu ha ngaahi vā fetuʻutaki fakapalōfesinale, faʻu ʻo ha tohi aʻusia fakaako mo fakangāue, maʻu mo fakalele ha pisinisi, faʻu ha ʻū ʻīmeili)

• Ngaahi taukei ʻi he meʻa fakapaʻangá (fakapatiseti, fakahū mo ʻinivesi ʻa e paʻangá; totongi ʻa e ngaahi tukuhaú; palani ki he mālōlō mei he ngāué)

• Ngaahi taukei ʻo e fetuʻutakí (ngaahi founga fakafanongo leleí, fakaleleiʻi ʻo e fepakipakí, ivi matuʻuaki fakaelotó, lea ʻi he kakaí)

• Ngaahi taukei ʻi he ngāue angamahení (tokangaʻi ʻo e kaá, pasikalá, pe monomono ʻi ʻapí; ko hono ngāue ʻaki ʻo e ngaahi meʻangāué; tuitui faingofuá; ʻuluaki tokoní)

• Ngaahi taukei fakamānakó (niti, ako ha meʻalea fakamūsika, faitā, tā valivali)

Kole ki ha mātuʻa, kaungāmeʻa, mēmipa ʻo e uōtí, pe taki ʻo e Siasí ke ne fakahinohinoʻi koe ʻi ha taukei foʻou ʻi he moʻuí. Fakakaukau ke kau ʻi ha taha ʻo e ngaahi kalasi moʻui fakafalala pē kiate kita ʻa e Siasí.

ʻI he kotoa ʻo ʻetau moʻuí, te tau ala aʻusia ha ngaahi tuʻunga fakalaumālie māʻolunga pea mo maʻulalo. Ka ko e fē pē ha feituʻu ʻokú ke ʻi ai ʻi hoʻo fonongá, ʻoku hoko maʻu pē hono fakatupulaki hoʻo ʻilo ki he ongoongoleleí ko ha founga mahuʻinga ke “fekumi ki he ʻiló” ʻi he kotoa hoʻo moʻuí.

ʻOku pehē ʻi he talateu ʻo e tohi lēsoni Haʻu, ʻo Muimui ʻiate Aú: “Ko e taumuʻa ʻo e ako mo e akoʻi kotoa pē ʻo e ongoongoleleí ko hono fakaloloto ʻetau ului [ki he Tamai Hēvaní mo Sīsū Kalaisi] mo tokoni ke tau hoko ʻo hangē ange ko [Kinauá]. ʻI he taimi ʻoku tau ako ai ʻa e ongoongoleleí ʻo makatuʻunga ʻi he ʻuhingá ni, ʻoku ʻikai ngata pē ʻi heʻetau fekumi ki ha ngaahi fakamatala foʻoú; ka ʻoku tau fie hoko ko ha kau ʻfakatupu foʻouʼ (2 Kolinitō 5:17).”

Ko ha ngaahi founga ʻeni te ke lava ai ʻo fakaloloto hoʻo ului ki he Tamai Hēvaní mo Sīsū Kalaisí ʻo fakafou ʻi hono ako ʻo e ongoongoleleí:

• Ako ki he moʻui mo e ʻulungaanga ʻo Sīsū Kalaisí

• “Ako fekauʻaki mo e ʻOtuá mo e founga ʻo ʻEne ngāué”

• ʻAlu ki he ʻinisititiutí

• ʻAlu ki he temipalé kapau ʻokú ke lava

• Ako ʻa e ngaahi moʻoni ʻoku akoʻi ʻi he ʻenitaumeni temipalé

• Ako ʻa e ngaahi fuakava fakatemipale kuó ke fakahoko pe fakaʻamu ke fakahokó

• Fakaleleiʻi hoʻo ako folofolá ʻo fakafou ʻi he Haʻu, ʻo Muimui ʻIate Aú pe ʻi he Ngaahi Tefitó mo e Ngaahi Fehuʻí ʻi he Gospel Library

Ko hono fakatupulaki hoʻo ngaahi taukei ʻi he moʻuí mo fakaleleiʻi hoʻo ako ʻa e ongoongoleleí ko ha ongo founga ia te ke lava ai ʻo teuteu ki he meʻa hokó. Ka ʻoku ʻi ai ha ngaahi konga kehe ʻo e tuʻunga kakai lalahí te tau fehangahangai mo ia ʻi ha ʻaho pe ʻamanaki te tau aʻusia ʻa ia te tau lava ʻo teuteu ki ai ʻi he taimí ni!

Ko ha ngaahi sīpinga ʻeni ʻe niʻihi:

• Nofo-malí (ako e ngaahi tefitoʻi moʻoni ʻo e mali taʻengatá, tānaki ʻa e ngaahi kupuʻi lea mei he konifelenisi lahí fekauʻaki mo e nofo-malí, kole faleʻi mei he ngaahi hoa mali ʻokú ke manumanumelieʻia aí, teuteu ki he feohi fafale fakasekisualé ʻaki haʻo akoʻi koe ʻo fakafou ʻi he ngaahi maʻuʻanga tokoni fakalaumālie ʻoku makatuʻunga ʻi he tuí pe kau taki falalaʻangá)

• Tuʻunga fakaemātuʻá (ako kau ki he ngaahi faʻē mo e ngaahi tamai ʻi he folofolá, toʻo ha kalasi tauhi fānau, talanoa ki he ngaahi mātuʻa kehé, lau ʻa e ngaahi lea ʻi he konifelenisi lahí fekauʻaki mo e tauhi fānaú)

• Fakaʻau ke motuʻá mo e moʻui leleí (ako ʻa e meʻakai fakatupu moʻui lelei totonú, ako ha ngaahi founga foʻou ke fakamālohisino ai, ako ʻa e ngaahi tefitoʻi founga tokoni ʻuluakí)

Ko e hā pē ho tūkunga ʻi he moʻuí, ʻoku finangalo ʻa e Tamai Hēvaní mo Sīsū Kalaisi ke fakatupulaki hoʻo ʻiló mo e tuí koeʻuhí “ke mou mateuteu ʻi he ngaahi meʻa kotoa pē ʻi he taimi te u toe fekauʻi atu ai ʻa kimoutolu ke tauhi faivelenga ki he lakanga kuo ui ʻa kimoutolu ki aí, pea mo e ngāue kuó u fili ʻa kimoutolu ki aí” (Tokāteline mo e Ngaahi Fuakava 88:80).

ʻOku ʻi ai ha taumuʻa ʻa e Tamai Hēvaní maʻau. ʻI hoʻo feinga ke maʻu ha ako ʻi he kotoa hoʻo moʻuí, ʻo tatau ai pē pe ʻi ha loki ako pe ʻi tuʻa, te Ne tāpuekina hoʻo ngaahi feingá mo tataki koe ki he feituʻu ʻokú Ne fiemaʻu ke ke ʻi aí.