Kaveinga ʻo e Māhina Ní: Ko Hono Fakatupulaki ʻo e Moʻui Fakafalala pē Kiate Kitá

ʻAlā siʻi kau laukonga,

Naʻa mau kiʻi fefaʻuhi mo e kupuʻi lea moʻui fakafalala pē kiate kitá ʻi heʻemau palani ʻa e konga ko ʻení.

ʻI he tafaʻaki ʻe tahá, ʻoku mau fiemaʻu ke mou maʻu ʻa e ngaahi meʻangāue ke fakatupulaki ha moʻui lelei mo lavameʻa pea tokonaki maʻamoutolu pea mo homou ngaahi fāmili lolotongá pe ʻi he kahaʻú. ʻOku mau fakatauange pē ʻokú ke ʻiloʻi ʻoku ʻikai fiemaʻu ia ke ke fakafalala ki ha taha kehe ke maʻu mei ai hoʻo fakamoʻoní. ʻOku mau loto ke mou malava, mateuteu, mo moʻui fakafalala pē kiate kimoutolu.

ʻI he tafaʻaki ʻe tahá, ʻoku ʻikai ke tau fie ʻoatu ʻa e pōpoaki ʻoku ʻuhinga ʻa e malavá ke fai ʻa e meʻa kotoa pē ʻiate koe pē. Koeʻuhí, ʻoku maʻu ʻe he kakai lavameʻa mo fakafalala pē kiate kinautolú ha ngaahi fetuʻutaki mālohi—mo e Fakamoʻuí pea mo e kakai ʻoku nau feohí.

Ko ia ko ʻemau fakaʻuhingaʻi ʻo e moʻui fakafalala pē kiate kitá ʻoku ʻikai ko e fakafalala ʻataʻatā pē kiate koe; ka ko hono maʻu ʻo e ngaahi taukei ke langa ha moʻui ʻoku ʻi ha tuʻunga tuʻu maʻu mo mahuʻingamālie. Pea ʻoku ʻikai ke mau ʻuhinga pē ki he ngaahi taukei fakatuʻasinó hangē ko e feimeʻatokoni fakatupu moʻui leleí pe fetongi ʻo ha foʻi vaʻe meʻalele—ʻoku ʻuhinga foki ʻa e moʻui fakafalala pē kiate kitá ki he ngaahi malava fakalaumālie, fakaeloto, mo fakasōsialé foki.

ʻI he fakakaukau ko iá, ko ha ngaahi talanoa ʻeni ʻe niʻihi ke poupouʻi koe ʻi hoʻo akó:

• Founga naʻe tokoni ai hono maʻu ʻo ha tāpuaki fakapēteliaké kia ʻEletā Molisoni ʻo e Kau Fitungofulú ke ne maʻu ha fakahinohino mo ha taumuʻa ʻi heʻene moʻuí

• Ko e fefaʻuhi fuoloa ʻa ha tokotaha lahi kei talavou ʻi ʻInitia ke totongi ʻa e moʻuá mo ngāue fakafaifekau

• Ko e meʻa naʻá ne fakaʻaiʻai ha tokotaha lahi kei talavou ʻi he ʻOtu Filipainí ke hoko atu ʻene akó, naʻa mo e taimi naʻá ne ongoʻi taʻelata mo ilifia aí

• Founga naʻe ako ai ʻe ha tokotaha lahi kei talavou mei Pelū ke fakatupulaki ha tōʻonga moʻui māʻoniʻoni ange ʻi he taimi naʻá ne mavahe ai mei ʻapí

ʻOku mau toe maʻu foki mo ha ngaahi talanoa ʻoku hoko ko e konga ʻo ʻetau fakamatala hokohoko atú:

• Fakataha Lotu ʻOku ʻOmí: Faleʻi meia ʻEletā Pumi ʻo e Kau Fitungofulú fekauʻaki mo hono fakapalanisi ʻo e ngaahi meʻa ʻoku fakamuʻomuʻá

• Ngaahi Taukei ʻo e Moʻui: Ngaahi taukei ke tokoniʻi koe ke ke lavameʻa ʻi hoʻo kumi ngāué

• Ko Hono Fakaʻaongaʻi ʻo e Tokāteline mo e Ngaahi Fuakavá ki Hoʻo Moʻuí: Tokoni ki hoʻo ako ʻi he Haʻu, ʻo Muimui ʻIate Aú fekauʻaki mo e fekumi ki he ʻiló ʻi tuʻa ʻi ha ako fakaʻatamaí

• Tautautefito ki he Kau Mali Foʻoú: Founga ʻoku fehangahangai ai ha husepāniti mo ha tamai kei talavou mo e loto-hohaʻa ʻokú ne ongoʻi fekauʻaki mo e tokonaki maʻa hono fāmilí

Ko e hā pē ha faʻahinga taukei fakangāue ʻokú ke feinga ke fakatupulaki, ʻoku mau fakaʻamu pē te ke falala lahi tahá kia Sīsū Kalaisi. Kapau ʻoku ngali fakalotosiʻi ʻa e tuʻunga fakaʻekonōmiká, kapau ʻokú ke hohaʻa pe ʻoku ʻikai feʻunga hoʻo moʻui lelei fakaʻatamaí ki he pole ʻo e moʻui fakaʻahó, pe kapau ʻokú ke fefaʻuhi mo hoʻo tōʻonga moʻui ʻi he ongoongoleleí, ʻiloʻi ʻokú Ne ʻi ai ke fakamālohia koe. ʻOkú Ne falala kiate koe.

ʻOua naʻá ke fakasiʻia hoʻo malava ke hoko ko ha ākonga taukei mo manavaʻofa ʻa Kalaisí ʻa ia te ne lava ʻo langa Hono Siasí mo tāpuekina ʻEne fānaú.

ʻOku mau poupou atu kiate koe,

Alison Wood, YA Fakauiké ʻĒtita hiki tataú