Jesucristo

Wala nang mas hahalaga pa sa malalaman natin tungkol kay Jesucristo—kung sino Siya, ano ang ginawa Niya para sa atin, at kung ano ang nais Niyang malaman at gawin natin. Tinutulungan tayo ng mga banal na kasulatan at mga turo ng mga propeta at apostol ngayong modernong panahon na malaman ang mahalagang papel na Kanyang ginampanan bilang ating Tagapagligtas at Manunubos.

Nalaman natin sa mga banal na kasulatan na sa mundo bago siya isinilang, si Jesucristo ang piniling maging Tagapagligtas ng lahat ng anak ng Ama sa Langit (tingnan sa 1 Pedro 1:19–20; Abraham 3:27). Sa simula pa lamang, si Jesucristo na ang pangunahing tauhan sa pagtupad sa plano ng Diyos para sa kaligtasan at kadakilaan ng Kanyang mga anak. Sa ilalim ng patnubay ng Ama, nilikha ni Jesucristo ang langit at ang lupa (tingnan sa Moses 1:32–33). Noong panahon ng Lumang Tipan, si Jesucristo ay kilala bilang ang dakilang Jehova. Ginabayan at pinatnubayan Niya ang mga sinaunang propeta at mga mananampalataya. Ang Kanyang pagmamahal at awa ang nagpatatag sa kanila sa panahon ng kanilang mga pagsubok.

Mahigit 2,000 taon na ang nakararaan, si Jesucristo ay pumarito sa lupa sa isang mahimalang pagsilang. Siya ay nanirahan at naglingkod sa mga tao sa lupain ng Israel. Gumawa Siya ng mga makapangyarihang himala, tulad ng pagpapagaling sa maysakit at pagbangon sa mga patay (tingnan sa Mateo 11:4–5). Itinatag Niya ang Kanyang Simbahan at itinuro ang doktrina ng pagsisisi, kapatawaran ng mga kasalanan, at buhay na walang hanggan sa lahat ng susunod sa Kanya. Si Jesucristo ay namuhay nang perpekto, na laging tumatalima sa pagsunod sa Kanyang Ama (tingnan sa 2 Nephi 31:7).

Dahil pumarito si Jesucristo sa lupa upang iligtas ang mga anak ng Ama, kusang-loob Niyang inako ng Kanyang sarili ang parusa para sa kanilang mga kasalanan. Ilang siglo na ang nakararaan, ipinropesiya ni Isaias: “Tunay na kanyang pinasan ang ating mga karamdaman, at dinala ang ating mga kalungkutan. … Siya’y nasugatan dahil sa ating mga pagsuway, siya’y binugbog dahil sa ating mga kasamaan” (Isaias 53:4–5). Nakaranas si Jesus ng napakatinding paghihirap, na naging dahilan upang labasan Siya ng dugo sa bawat butas ng balat (tingnan sa Lucas 22:44; Doktrina at mga Tipan 19:15–20). Siya ay dinakip at hinatulan batay sa mga maling paratang at pinarusahan ng kamatayan. Malupit Siyang ipinako sa krus, kung saan Siya nagdusa at nag-alay ng Kanyang buhay para sa atin (tingnan sa Mateo 27:50). Ngunit hindi nagwakas ang lahat sa Kanyang kamatayan. Si Jesucristo ay bumangon mula sa libingan at naglingkod sa Kanyang mga alagad bilang nabuhay na mag-uling nilalang (tingnan sa Lucas 24:36–40; 3 Nephi 11:8–15).

Ngayon, inaasahan ng mga miyembro ng Simbahan ni Jesucristo ang Kanyang ipinangakong pagbabalik sa lupa. Walang nakaaalam kung kailan ito magaganap (tingnan sa Doktrina at mga Tipan 49:7), ngunit binabanggit sa mga banal na kasulatan ang mga palatandaan at kaganapang mangyayari bago ang Kanyang Ikalawang Pagparito. Mababago ang mundo sa pagbabalik ng Panginoon, at ihahayag Niya ang lahat ng bagay sa mga taong matwid (tingnan sa Doktrina at mga Tipan 101:23–34).

Naghanda ang Ama sa Langit ng maraming pagpapala para sa mga tumatanggap sa Kanyang Anak na si Jesucristo (tingnan sa Doktrina at mga Tipan 84:37–38). Ipinahayag ni Jesucristo: “Kung lalapit kayo sa akin ay magkakaroon kayo ng buhay na walang hanggan. Masdan, ang aking bisig ng awa ay nakaunat sa inyo, at kung sinuman ang lalapit, siya ay tatanggapin ko” (3 Nephi 9:14). Ipinapakita natin ang hangarin nating tanggapin ang paanyaya ng Panginoon na lumapit sa Kanya kapag nananampalataya tayo sa Kanya, nagsisisi sa ating mga kasalanan, nagpapabinyag, sinusunod ang mga utos ng Diyos, at tumatanggap ng mga sagradong ordenansa sa templo.

Kapag mapagpakumbaba tayong bumabaling kay Jesucristo nang may pananampalataya at pagsisisi, makatatanggap tayo ng kapatawaran sa ating mga kasalanan (tingnan sa Mosias 4:2–3). Dahil sa Pagbabayad-sala ni Jesucristo, posible rin na “makahugot tayo ng lakas sa Diyos—lakas na sapat sa pagharap sa mga pasanin, balakid, at tukso ng ating panahon.” Ang natatanggap nating pagmamahal, awa, at kapatawaran mula kay Jesucristo ay maaaring magdulot ng walang-hanggang pagbabago sa ating buhay at magbibigay sa atin ng lakas na sumulong sa paggawa ng kalooban ng Diyos (tingnan sa Mosias 5:2; Helaman 15:7–8).