Jesus Kristo a meskid a deureng

Kau a ruul el kirem el melchesuarra deuilareng me a deureng. Sei a moktek er a klengar er kau. Ngii a moktek er a Demad ra Babeluades er sel luldasu ra deureng. Tiang a diak el belkul a kmo ng diak bom mekngit a rengum malechub e bol meringel a klengar er kau. Ngdi ngii a belkul a kmo a Osobel a sebechel ngosukau el ngoriakl a metacherbesul taem e metik a deureng.

A deureng a diak el dubech lokiu ra teletael ra klechad er kau; ng morengii sel moltirakl er a Jesus Kristo. Ke locha ngarngii a mekngit el sils er kau, mekngit el sandei, malechub eng mekngit el rak. Ngdi deureng a diak el sel lak a klengit el reng er a klengar er kau; ng sel le ngarngii a Kristo ra elsel a klengar er kau.

A deureng er a Osobel a lmuut el klou e melemolm el ngarngii ra ngidil tekoi. A Diablong a mo melasem er kau el mo osiik a omilil me a omotech el reng lokiu a keldidai el reng malechub a tametereng er a beluulechad. Ngidil tekoi el ngodech er a Jesus Kristo me a Lechul a diak el beskau a merang, e melmolm el deureng me a diulareng. Molatk el kmo a ikal tekoi er tial beluulechad a di kedeb a klengar er ngii. A ebangkelio ra Jesus Kristo a meskid a deureng me a diulareng el dmolech, chedaol, e diak a ulebengelel.

Mngiltii a deureng. Ng uaisei el klemerang el kmong ngarngii a klengit el reng me a ringel er tial beluulechad, ea Demad ra Babeluades a dirrek el mla mekekii a beluulechad er a betok el klebokel, el klaleu lungil er kid. Bo mosiik. Molasem lomes a moktek loutkeu a rengmiu ra bekl el sils—locha dirrek el bom mluches ngii el tekoi. A ikang a sengk el mlara betik er a rengum el Demam ra Babeluades.

Modars a deureng me a diulareng el mora rebebil. A Jesus Kristo a miltik er a mui el deureng ra loldars el me er kid a deureng. Ng sebechem loltirakl er a Okesiul losiik ra deureng me a diulareng sel mosiou ra rebebil. Mngesiur a tara chad me bo lomelchesiu er a beltikelreng. Melekoi a ungil tekoi el meral ngara rengud. Molisiich ra chad el chuarem. A lsekum me ke melchesuar el kmo kousbech a lmuut el betok el deureng ra klengar er kau, e molasem lodersii a deureng el mora tara chad.

Moldeu ra rengum sel mongull er a Rubak. Sel bora ikelesia, momes er sel deureng el Jesus Kristo a omeskau, e moldanges er Ngii el kirel! Mrelii a ngerechelem el kirel a reng er a deureng ra ikel longdibel ra Ikelesia. Mrelii a chedaol chelitakl el mo telkib er sel omengull er kau om ngara blim me a ikelesia.

Ng sebechem el melchesuar a deureng luldimukl er a taem el mngara ringel. Ke locha mo melbedebek el mekerang e tiang a sebechel, ng di ng klemerang. A klaumera er kau ra Jesus Kristo, Klisichel lomekungil, me a diak a ulebengelel yaksok er Ngii a sebechel meskau a mekedekudem el deureng. A deureng er Ngii a dokedek a klengit el reng e meskau a budech lengelakl er a klaudengei er kid.

A mui el deureng a mengiil er kau er a kot el ngarbab el rengedel a Dios. Jesus Kristo a mlo mesisiich er a rokui el tekoi el ngii a merrob er kau me mnguu sel diak a ulebengelel deureng. Mesel moumera er Ngii e moltirakl er Ngii, e tial deureng a bo mobang.