A bedengem a chedaol

A bedengem a di ua bedengel a Dios—el ngii a kot el klebokel, e ngarbab el Chad er a rokui. A chedaol llechukl a mengaisisiu er a bedenged el mora chedaol templo, el basio el Reng a sebechel kiei er ngii. Uaisei, el bedenged a diak el cherrungel er chelechang. Eng di a blekeradel el merkau leng ngil bedengem a sebechel kudmeklau el churengelii er a tara klebesei, lokisii er a kodall, el klebkall el bedengem.

Kau el chad a mlokdubech el bedengem me a reng er kau. Tiaikid a uchul me a ulekereuil a bedenged me a ulekereuil a reng a kmeed el kabekbuch. A Osobel a ulechotii a Ulekerreuil a Bedenged el molisechakl osisechakl el mekera domekerreu er a bedenged e mo yaskok a klengeltengat er a bedenged me a reng.

A momelechesiu el tekingel deleboes a klou a ultutelel tebedechel a uldesuel a Dios el mo oldubech a ungil chebechiil me a diak a ulebengelel telungalek. A ikal domelchesiu a diak el klengit—aikang a chedaol. Le domelchesiu el reng ra deleboes a kot el chedaol e mesisiich, a Dios a mla meskau a Lechul er a klikiid el mo mengedmokl er kau el mo ousbech aikal momelchesiu el kirel a ikel moktek er Ngii. A llach er a klikiid a melekoi el kmo a Dios a kongei er a omeruul er a deleboes el di delongelel a sechal me a redil el tir a bechiil. Betok el ngara beluulechad a diak loltirakl me a lechub e toltuub er a llechul a Dios, eng di a Dios a mengemedaol er kid el mo chedal e kiei er a ngarbab el kerebai.

Momekerreu er a bedengem—me a bedengir a rebebil—loba omelengmes. Sel molilt a bilem, teletelel a chium, me a teletelem, e moker er kau, “Ngak a mengull er a bedengek el chedaol sengk el mlara Dios?” A Chedam er a Babeluades a soal a domes er a tang el kmo kede meral re ua techang: el diak el dil bedenged e bai ke de betik er a rengul el ngelekel el chedaol a teleteled. Lak mousbech a teletael lolecholt malechub lolechau a mad el diak lungil mora bedengem ra bai sel meral kau el ngelekel a Dios loba diak a ulebengelel sils er kau. Mngai a kldung me a beltikelreng el mora Dios mel lomekrael a ikel molilt. Mosiik omellach er a rechad ra blim.

Moruul a tekoi el ngii a mo melisiich er a bedengem,el diak el tekoi el mo tomelli malechub eng oitechetur. Bo lungil a rengum loba omereng el saul a betok lungil tekoi el Dios a mla meskau. Eng di lak mobes el kmo a rrom, dekool, kohi, tea, me a bebil ra melemall el kar me a klalou a diak el bora bedengem me a reng er kau. Ngii me a ikel lolengeseu el klalou, el uai a kar er a ospitar, a sebechel melemall a lak dousbech er sel meral teletelel.

Mongeluolou a deleboes me a omelchesiu a teletael er a deleboes el chedaol. A ikang a diak el kirel tekoi er a ngellakl malechub a omosiroi. A ikrel a delongelir a bechiil el sechal me a redil, eng mekngit lorutech er sel berrotel, e chedaol el bedengel a tara chad, molmuut er a loubail. Aikel molilt el tekoi el moruul, me a omomes, omongui, orrenges er ngii, omdasu el kirel, ke post, malechub a meluches, e bom ikrii a ngii di el ngerang el meruul er kau el mo soam a delboes el teletael er a rebebil me a lechub a mor kau. Tiang a uldimukl osengel a delboes er a ngii di el teletael. Alsekum me ke metik er a blekeradel malechub a omeruul el rullau el mo kot el nguibes, e bom cheroid er ngii. Kau a medengei el kmo aikal teletael me a omeruul ngerang. Alsekum me kou mededenger, ea Reng, telungalek er kau, me a re meredelem ra ikelesia a sebechir el ngosukau el mo medengei. Mochotii er a Demam er a Babeluades el kmo kau a mengull e olngesenges er a chedaol klisiich el mo omekdubech a klengar.

Omengull er a kau me a rebebil a merael mo mesisiich sel mongull er a bedengem lokiu a blekerdelem, teletelem, me sel moubail.

A Rubak a mla yaksok a ngarbab el mekreos el klemedengei el mo er tirkel oltirakl er a Ulekerreuil a Bedenged. A ungil lulkereuil bedenged, a diak el sau a ngerang, e dirrek el rullau mengai el moungil melai a ocholt el mer kau, omdasu lungil, e mesiou er a Rubak.

A kiei loba llach er a klikiid a meskid a kengei er a Dios me a chedaol klisiich el mer kid. Ng sobecheklau me a re telungalk er kau ra ngarmedam el taem. Sel bo bechiil, e tial llach a mo meskau a ngarbab el belikelreng, oumerang, me a kltal reng el mora chebechielem. Otireklel tial llach a rulii meng sebechem el merael mo ungil mo ua Demam er a Babeluades. A kllouelreng er kau a mukeroul sel omkiei el chedal a Jesus Kristo.