Morael el ngara llomes er a Dios

Kau a sebechem loba Chedaol Reng el keldemem. Sera moterkokl el chedal a Ikelesia, e ke blol longemedaol er kau el “nguu a Chedaol Reng.” Sel techall el nguu a Reng el mo blechoel keldemem a tara klou el sengk el Dios a nguu el meskau.

A melilt a ungil tekoi a rulii el mo ungil er kau el mo melchesuar a Reng. Ngarngii a betok el ungil me a klebech el tekoi er tial beluulechad. El kmal di ua bedengem lousbech a kall me a ilumel, a uldesuem me a reng er kau a lmuut el ngarngii a klou el relii er ngii a monguiu, omomes, me a omorrenges.

Mdedesii a taem el kirel a Rubak er a bek el sils. Mosuub er Ngii. Blechoel melatk er Ngii. Moluluuch el mo er a Demam er a Babeluades. Mosuub chedaol llechukl me a tekingir a rengar el profet. E molasem el kiei loltirakl oblam suub.

Mosiik aikel ungil ra reng, omekellomes, e oleker er a Reng. Mesel molilt aikel bo momes, menguiu, orrenges, malechub e ke mo teloi er ngii, e momdasu el kmo ngerang ke mo melechesiu el kirel. Tiang oleker a ungil uldasu? Mcheridau er a ngidil ngerang el oltuub chedaol tekoi malechub eng delngerenger. Lak bo moruul a ngiidil ngerang el ngii a nogsengesii a uldesuem lungil lomdasu malechub a momelchesiu er a Reng, el reua klaudechelakl, rrom, me a mekngit el kar. Bol mesisiich a rengum el torbengii a video game malechub eng klekool, morael tuobed er a movie malechub a ngloik, mngedechii a chelitakl, malechub e bo mikrii a ngii dil ngerang el diak el tabesul ngii me a Reng.

Mousbech er a social media el melekoi a ungil tekoi. A social media a sebechel dongu er a mesisiich el cheldecheduch. A lsekum me ke ousbech er ngii, a osengem bol bedul a llomes, klaumerang, me a klemerang. Lak mongaisisiu er a klengar er kau el mora bebil er a loruul a rechad. Lak mobes el ultutelem a mengai er kau el ngelekel a roungalek er kau er a babeluades, el diak el social media.

Mosiik a ungil lomeruul me a merang, me a diak a ulebengelel deleongel. Bom kerekikl me a usbechellem er a technology me a media a diak el btechei a temem er a bedengem lobengterir a telungalek er kau me a rsechelim. A social media me a bebil er a tekoi ra melidiul a sebechel nguu a klou el temem el diak a ngera mo ungil kirem er ngii. Bo molengull er a tekingel a beluulechad el ngara melidiul e bo moak lobengterir a rechad el chelbangel ra meral klengar.

Ng sebechem loba Reng el di blechoel el obengkem. Tial telbiil a telkib er sel telbiil el kau a meruul er ngii ra bekl el taem el molai ra sakrament. A Reng a mo sioning el merkau er a Demad ra Babeluades me a Jesus Kristo. Ngii a mo mengelaod, omekrael, ouchais, e mengikiid er kau. Ngii a mo ngosukau el mtab a klemerang e mes a ungil er a beluulechad.