Bol betik a rengum er a Dios, el betik a rengum er a ngar bita er kau

A Dios a betik a rengul er kau. Ngii a Demam. Sel cherrungel el beltkil a rengul a sebechel meklemesau el mo oubeltikelreng el mo er Ngii. Sel sekum a beltkil a rengum el mora Chedam er a Babeluades a kot el klou lodubech er a klengar er kau, eng betok el molib el tekoi a mo beot.

A ikel teblong el ngarbab el llacha Jesus ulsisechakl, ke de moubeltik el reng el mora Dios e oubeltikelreng el mora ngar bita er kid. Ng techa ngar bita er kau? Rokui el chad! A rokui el osisechakl el ngara chedaol llechukl lokiu a reprofet a ulak el mora ika lerung el llach.

A rokui el chad a rodam me a rodos er kau—uldimukl, a rechad el tir a kuk ngodech malechub e te diak losisiu a uldesuiu. A Chedam er a Babeluades a soal a re Ngelekel a bol kaubeltikelreng. Sel mosiou er a Rengelekel, e kau a mesiou er Ngii.

Kochotii a beltik el reng el mora Dios sel moltirakl a Llechul. El ua tiakid, sel mongull er a Chedaol sils, uldimukl el blak a rengum el mengedmokl el mo melai er a sakrament, e kochotii er a Dios el kmo kau a ngara rengum el mo odersii a ta el sils er a tal sandei el mo er Ngii. Sel molsengerenger e molecha ongeltacher me a uldars, e kochotii el mora Dios el kmo a Urerel a lmuut el klou a ultutelel merkau er a klalou er a beluulechad. Sel mousbech er a ngklel a Dios me a Kristo loba omengull, e diak morrekakl malechub e moubeot er ngii, e kau ochotii el kmo kemereng a saul er a rokui el Tir a mla remuul el merkau.

Bo mungil mora rokui el chad el ngelekel a Dios. Sel om chedal a Jesus Kristo, eng sebechem el omekrael omeruul lungil mora rokui el chad er a kakerous el beluu, me a klechelid, me a ngidil chelechad loba beltikelreng me a omengull—tokuni tirkel sel bebil er a taem e te metemall er a ulecheracheb er a omelekoi me a omeruul. Bo momekerreu er ngike el di ngii el tang, cheloit, malechub eng dikea rolel er ngii. Bom ngosuterir el mo omelchesiu er a beltikelreng er a Chedam er a Babeluades lokiu kau. Mouchais er tir ra ikel klengeltengat el Ngii a mla meskau, e mongemedaol er tir me bol loltirakl er a Jesus Kristo.

Bom kerekikl me a tekoi el molekoi a olechotel a beltikelreng er a Dios me a rebebil—a omulngedecheduch el chelbangel er a chad ma lechub e ngokiu a melidiul. Molekoi a tekoi el mesebechakl—e diak lomii, melemall, mekngit, luldimukl er a ngellakel. A omolekoi a sebechel kmal mesisiich. Bo bechei me bol klisiich el kirel a klungiaol.

Mochotii a beltikelreng el mora telungalk er kau. A oubeltik el reng el mora rengelekel a Dios a omuchel er a blai. Mrelii sel ngerchelem el rulii a blim el basio er a rokui el chad a mo sebechir el melechesuar a beltikelreng er a Osobel.

A deleuill er kau me a Dios a mo dmolech sel molecholt er a beltik el reng er kau e mongull a Llechul e murrekodel a telbilem el mo er Ngii.

A deleuill er kau me a rebebil a mo dmolech sel molecholt er a beltik el reng er kau lokiu a omesiou el di uai e a Kristo. Ke mo metik a deureng sel moruul er a beluulechad el mengai el mo ungil beluu.