12.
Jisōs Kraist ej bōktok lan̄lōn̄
Jemam̧ Ilan̄ ej lan̄lōn̄. E ekōņaan bwe kwe, eo Nejin, en bōk eļap lan̄lōn̄. En̄in ej etke E kar kōpooj karōk in m̧ōņōņō eo. E ekar jilkintok Nejin, Jisōs Kraist, n̄an erom am̧ Rilo̧mo̧o̧r im katakin gospel eo An. Naan eo gospel ej meļeļe in “naan eo em̧m̧an,” im naan eo em̧m̧an ej bwe kōnke kōn Jisōs Kraist, kwomaron̄ bōk m̧ōņōņō ilo mour in im lan̄lōn̄ elikio n̄an indeeo.
M̧ool ko Ejjeļo̧k Jem̧ļo̧kier
Mennin kōttōpar bwe kwōn bōk m̧ōņōņō im lan̄lōn̄. En̄in ej jibadbad eo an mour eo am̧. Ej jibadbad eo an karōk in m̧ōņōņō eo an Jemedwōj Ilan̄. Menin ejjab meļeļe koban būrom̧ōj ak wōr iien reppen n̄an kwe. Bōtaab ej meļeļe in bwe Rilo̧mo̧o̧r eo emaron̄ jipan̄ eok ribuk iien ko reppen im lo lan̄lōn̄.
Lan̄lōn̄ ejjab itok jān jekjek ko am̧, ej itok jān ļoor Jisōs Kraist. Emaron̄ wōt am̧ juon raan enana, juon wiik enana, ak juon iiō enana. Bōtaab lan̄lōn̄ ejjab kōn jako eo būrom̧ōj jān mour eo am̧; ej an Kraist pād ilo mour eo am̧.
Lan̄lōn̄ eo an Rilo̧mo̧o̧r eo eļapļo̧k im etoļo̧k an pād jān jabdewōt men. Setan enaaj kapo eok n̄an kappukot limo im bab laļ in wāween ko ļōmņak kōn juon make ak jān kam̧ōņōņō ko an laļ in. Jabdewōt men me rej jum̧ae Jisōs Kraist im kien ko An rebban boktok n̄an kwe lan̄lōn̄ im m̧ōņōņō ko rem̧ool, ejjeļo̧k jem̧ļo̧kier. Keememej bwe men ko an laļ in rej an jidik wōt iien. Gospel eo an Jisōs Kraist ej letok lan̄lōn̄ im m̧ōņōņō rem̧wilaļ, kwojarjar, im n̄an indeeo.
Kūr ko
Kāālet lan̄lōn̄. Men̄e em̧ool bwe ewōr būrom̧ōj im apan̄ ilo laļ in, Jemedwōj Ilan̄ ekar barāinwōt kobrak laļ in kōn elōn̄ men ko raiboojoj, em̧m̧an. Pukoti men kein. Kajjion̄ n̄an kile wun ko n̄an lan̄lōn̄ aolep raan—bōlen em̧m̧an bar jei. Mennin letok kein rej jān Jemād ilo Lan̄ eo ej iakwe.
Bōktok lan̄lōn̄ im m̧ōņōņō n̄an ro jet. Jisōs Kraist ekar lo tarlep in lan̄lōn̄ eo ilo bōktok n̄an kōj lan̄lōn̄. Kwomaron̄ ļoor waanjon̄o̧k eo An kōn pukot lan̄lōn̄ im m̧ōņōņō eo ilo jerbal n̄an ro jet. Jipan̄ juon en̄jake iakwe. Leļo̧k naan in nebar. Kōketak juon eo me ej apan̄. Eļan̄n̄e kwoj en̄jake āinwōt kwoj aikuj eļapļo̧k lan̄lōn̄ ilo mour eo am̧, kajjion̄ bōkļo̧k lan̄lōn̄ n̄an bar juon.
Kwon lan̄lōn̄ ilo kabun̄-jar n̄an Irooj. N̄e kwoj etal n̄an jar, pedped ioon lan̄lōn̄ eo me Jisōs Kraist ej lewaj n̄an kwe, im nebar E kake! Kōm̧m̧an ijo kuņaam̧ n̄an leļo̧k n̄an jetōb eo elan̄lōn̄ ilo kweilo̧k ko an Kabun̄ in. Kōm̧m̧ani al ko rekwojarjar m̧ōttan kabun̄-jar eo am̧ ilo m̧weo im ilo m̧ōn jar eo.
Kōjeraam̧m̧an ko kar Kallim̧ur kaki.
Kwomaron̄ en̄jake lan̄lōn̄ jekdo̧o̧n n̄e mour in epen. Kwomaron̄ ļōmņak ekōjkan an menin pidodo, bōtaab em̧ool. Am̧ tōmak ilo Jisōs Kraist, kajoor in kemour eo An, im kallim̧ur ko An indeeo maron̄ lewaj n̄an eok lan̄lōn̄ eo ejjab bōjrak. An lan̄lōn̄ ej kalbubuik būrum̧ōj im ej bōktok aenōm̧m̧an eo me ej eļļāļo̧k jān aolep meļeļe.
Lan̄lōn̄ elikio ej kōttar eok ilo aelōn̄ in selestial eo an Anij. Jisōs Kraist ekar anjo̧ ioon aolep men ko me remaron̄ dāpij eok jān bōk lan̄lōn̄ eo indeeo. Ilo am̧ lōke E im ļoor E, lan̄lōn̄ in enaaj am̧.
Kajjitōk ko im Uwaak ko
Eļan̄n̄e gospel eo ej lan̄lōn̄, etke ij lukkuun būrom̧ōj? En̄jake būrom̧ōj ejjab juon kakōļļe bwe kwojjab mour kōn gospel eo. Mour eo an aolep ej kitbuuj apan̄, mālijjon̄, im būrom̧ōj. Ļoor Jisōs Kraist ejjab ukōt menin, bōtaab ej kakkejel eok ippān juon Rilo̧mo̧o̧r eo me eamaron̄ kaenōm̧m̧an eok im jipan̄ eok lo lan̄lōn̄ im m̧ōņōņō eo.
Etke ekanoj in lōn̄ en̄taan ilo laļ in? Juon iaan en̄taan ko ilo laļ in ej itok kōnke armej rej kōjerbal anemkwōj in kāālet eo aer n̄an kōm̧m̧ani kāālet ko rebōd. Menin emaron̄ kōm̧m̧an aer kaen̄taan er make im armej ro jet. Ilo jekjek ko jet, en̄taan ejjab an juon bōd—ej juon tōprak in mour ilo juon laļ eo ejjab weeppān Jekdo̧o̧n ta jekjek eo, emaron̄ in karup bōro n̄an lo an juon en̄taan, eļap tata juon eo kwoj iakwe. Jeļā bwe Anij ej barāinwōt būrom̧ōj n̄e kwoj en̄taan. E ej kōtļo̧k bwe mālijjon̄ ko an mour wabanban ren jipan̄ eok eddōkļo̧k im pojak n̄an lan̄lōn̄ eo indeeo Ippān, bōtaab E ejjab do̧o̧r eok n̄an en̄taan make. E ekar jilkintok Jisōs Kraist n̄an bōk ioon Make metak eo am̧ bwe E en maron̄ jipan̄ eok. Jisōs Kraist ej am̧ kajoor! Im E ej karuwaineneik eok, āinwōt juon iaan rikaļoor ro An, n̄an kōm̧m̧ane ta eo kwomaron̄ n̄an jipan̄ kōmeraik en̄taan an ro jet.
Lale Sam 16:11 (im̧aan mejān Anij ej juon lan̄lōn̄ elikio); 95:1 (al n̄an Irooj); Jon 16:33 (kwon aenōm̧m̧an; Jisōs Kraist ekar anjo̧ ioon laļ); Galetia 5:22 (leen Jetōb ej lan̄lōn̄); Hibru 12:2 (Jisōs ekar dibuk en̄taan eo An kōnke kōn lan̄lōn̄ eo an lo̧mo̧o̧ren ro nejin Anij); 2 Nipai 2:25 (Anij ekōņaan bwe kwon lan̄lōn̄); Alma 26:15–16 ((kōm̧m̧ane jerbal eo an Anij ej tōlļo̧k n̄an lan̄lōn̄); Katak im Bujen Ko 18:15–16 (ewi jon̄an an ļap naaj am̧ m̧ōņōņō eļan̄n̄e kwoj bōktok elōn̄ armej n̄an Kraist).
Kajjitōk ko an Peba in Mālim Deļo̧n̄e Tampeļ
-
Ewōr ke am̧ naan in kam̧ool kōn Pinmuur eo an Jisōs Kraist im jerbal eo An āinwōt am̧ Rilo̧mo̧o̧r im Ripinmuur?