Baam̧le eo ej Reilo̧k n̄an Meram eo, jān Lovetta Reyes Cairo. Letok jān Havenlight

Ānbwinnūm̧ ekwojarjar

1 Korint 6:18–20

Ānbwinūm̧ ej juon menin letok aiboojoj jān Jemedwōj Ilan̄. Juon ānbwin ej lewaj n̄an eok eļapļo̧k kajoor n̄an kōjerbal anemkwōj in kāālet eo am̧ n̄an kāālet ikōtaan jim̧we im bōd. Jepļaaktok eo an gospel eo an Jisōs Kraist emaron̄ jipan̄ kwe loe ānbwinūm̧ ilo wāween eo Anij ej loe. Im menin ekōm̧m̧an juon oktak eļap ilo kāālet ko am̧ kōn ta eo kwoj kōm̧m̧ane kōn anbwinnūm̧ im ekōjkan am̧ kōjparoke.

M̧ool ko Ejjeļo̧k Jem̧ļo̧kier

Ānbwinnūm̧ ej nememein Anij—aiboojoj tata, Armej eo euteij tata ilo aolepān laļ in. Jeje ko rekwojarjar rej keidi ānbwinid n̄an juon tampeļ ekwojarjar, juon jikin Jetōb emaron̄ jokwe ie. Aaet, ānbwinnūm̧ ejjab weppān kiiō. Bōtaab en̄jake ko kwoj būki kōn āinbwinnum̧ maron̄ jipan̄ kwe kōppopo n̄an bōke juon raan juon ānbwin eweppān, kar jerkakpeje, kar kaiboojoje.

Am̧ ej ejaak jān ānbwinnūm̧ im jetōb eo am̧. Kōn un in, ājmour ilo ānbwin im ājmour ilo jetōb rej ekkeijel wōt ippān doon. Rilo̧mo̧o̧r ekar kwaļo̧k Naan in Mālōtlōt eo n̄an katakin pedped in katak ko n̄an kōjparok anbwinnūm̧ im n̄an kallim̧ur kōn kōjeraam̧m̧an ko an ānbwin im jetōb.

En̄jake ko an mōm̧ an kanniōk ej m̧ōttan eo aorōk ilo karōk eo an Anij n̄an ejaake m̧are ko relem̧ōņōņō im baam̧le ko n̄an indeeo. En̄jake kein rej jab jerawiwi—rekwojarjar. Kōnke en̄jake ko an mōm̧ an kanniōk relukkuun ekwojarjar im lukkuun kajoor, Anij em̧ōj an lewaj n̄an eok kien eo An kōn mour erreo n̄an kōppopo n̄an kōjerbale en̄jake kein ekkar n̄an ta eo E ej karōke. Kien erreo ej ba bwe Anij ej kōmālim m̧akūtkūt ko an kanniōk ikōtaan wōt juon em̧m̧aan im juon kōrā em̧ōj aer m̧are. Elōn̄ armej rej kowaan ak kajirere kōn kien eo an Anij, bōtaab Irooj ej karuwaineneik bwe jen an rikaļoor im mour kōn jon̄an ko reutiejļo̧k.

Kūr ko

Kautiej ānbwinūm im ānbwinin ro jet. Ilo am̧ kōm̧m̧an kāālet ko kōn nuknuk, wāween kōm̧m̧ane bōram̧, paotokūm̧, kajjitōk ippam̧ make, “N̄aij ke kauteij ānbwinnū āinwōt juon menin letok eo ekwojarjar jān Anij?” Jemedwōj Ilan̄ ekōņaan bwe jen kalimjōk doon kōn lukkuun wōn kōj: ejjab ilo ānbwin wōt ak āinwōt ajri ro Nejin rejitōnbōro kōn juon kōttōpar ekwojarjar. Joļo̧k jitaeļ ko me rej kōmejajaik ak bōktok ļōmņak ko rejjab jetjet n̄an ānbwin in kanniōk eo ijello̧kin wōn kwe āinwōt juon nejin Anij kōn juon jekļaj indeeo. Kōtļo̧k bwe mour erreo im iakwe n̄an Anij en tōl kāālet ko am̧. Pukot kapilōk jān baam̧le eo am̧.

Kōm̧m̧ani men ko me renaaj kōkajoorļo̧r ānbwinnūm̧, ejjab men ko me renaaj kōmetak ak kakkure. Lem̧ōņōņō kōn kam̧m̧oolol kōn elōn̄ men ko rem̧m̧an Anij ekar liwaj. Keememej bwe dān in kadōk, jikka, ko̧pe, tii, im uno ko rekkajoor im uno ko jet rejjab n̄an ānbwinnūm̧ ak am̧ jetōb. Em̧ool barāinwōt uno ko jet n̄an jipan̄, āinwōt uno ko elletok in taktō, emaron̄ ko̧kkure eļan̄n̄e ejjab jerbal ilo jim̧we.

Kōm̧man bwe kiki ippān doon im en̄jake ko an kanniōk ren ekwojarjar. Rejjab aikuj kein kōnono ko n̄an kōm̧m̧an kōjak ak kein kaloojoj. Itulikin m̧are eo ikōtaan juon em̧m̧aan im juon kōrā, ebōd n̄an an̄ur m̧ōttan ko rettiņo, rekwojarjar an ānbwinnin bar juon armej, jekdo̧o̧n eļan̄n̄e ej nuknuk Ilo kāālet eo am̧ kōn ta eo kwōj kōm̧m̧ane, lale, riiti, ron̄jake, ļōmņak kake, likūt ilo mejatoto, ak jeje, joļo̧k jabdewōt men ko me kar ļōmņak in kairuj en̄jake in ļōn̄ ko ilo ro jet ak kwe make. Menin ekoba pija nana ko ilo jabdewōt wāween. N̄e kwoj loe bwe wāween eo ak m̧akūtkūt eo ekōm̧m̧an kapo ko rekajoorļo̧k, etal jāni. Kwojeļā ta jekjek kein im m̧akūtkūt ko rej. Im eļan̄n̄e kwojjab jeļā, Jetōb eo, baam̧le eo am̧, im ritōl ro am̧ maron̄ jipan̄ eok jeļā. Kwaļo̧k n̄an Jemam̧ ilo Ilan̄ bwe kwoj kaorōk im kautiej kajoor eo ekwojarjar n̄an ejaak mour.

Jisōs Kraist ej ļōmņak im m̧alļo̧k ioon jokoņ eo an

Kōjeraam̧m̧an ko kar Kallim̧ur kaki

Kautiej eo am̧ n̄an kwe make im ro jet enaaj ļapļo̧k ilo am̧ kauteij ānbwinnūm̧ ilo m̧wilūm̧, piktokūm̧, im nuknuk.

Irooj ekar kallim̧ur kōn jeram̧m̧an ko an jeļāļo̧kjen eļap n̄an ro rej kōjparok Naan in Mālōtlōt. Juon ānbwin eo ewāmourur, ejeļo̧k anūrlep, ej barāinwōt kōlapļo̧k maron̄ eo am̧ n̄an bōk revelesōn ko am̧ make, lōmņak eo ealikkar, im jerbal n̄an Irooj.

Mour kōn kien erreo ej boktok errā eo an Anij im kajoor in jetōb an make. Ej bōbrae eok im baam̧le eo am̧ ilju jekļaj. N̄e em̧ōj am̧ m̧are, kien in enaaj boktok eļapļo̧k iakwe, lōke, im ippān doon ilo m̧are eo am̧. Pokake kien in enaaj kōm̧m̧an bwe kwon wōnm̧aanļo̧k n̄an indeeo im erom̧ āinwōt Jemedwōj Ilan̄. Lōke eo am̧ enaaj eddōkļo̧k ilo am̧ mour āinwōt rikaļoor an Jisōs Kraist.

Kajjitōk im Uwaak ko

Ta katak eo an Irooj kōn nuknuk, erreo, eo̧ ko, im dede ko? Jon̄o̧k eo an Irooj ej n̄an kwe n̄an kautiej ekwojarjar eo an ānbwinnūm̧, jekdo̧o̧n n̄e menin ej meļeļe in oktak jān armej ro jet. Kōtļo̧k bwe m̧ool in im Jetōb ren am̧ tōl ilo am̧ kōm̧m̧ani kālet ko—eļaptata kālet ko me renaaj jelōt ānbwinūm̧ ilo juon iien aitok kitien. Kwon lo̧ļe im tiljek, im pukot kapilōk jān baam̧le eo am̧ im ritōl ro.

Elmen aō jelm̧ae kapo im imminene ko renana? Jemedwōj Ilan̄ im Jisōs Kraist ewōr aer kajoor n̄an jipan̄ kwe. Kobrak mour eo am̧ kōn men ko me rej akjoketok kajoor eo Aer n̄an mour eo am̧, ko āinwōt jar, ekkatak jeje ko rekwojarjar, im jerbal n̄an ro jet. Oktakļo̧k n̄an Jisōs Kraist im gospel eo An, im kwonaaj lo bwe m̧ōjņo̧ ko maron̄ erom kajoor ko. Pukot jipan̄ eo jān baam̧ļe, ritōl ro, im professional counselor ro lōke er n̄e aikuj. Remaron̄ jipan̄ eok bar bōk kōjbwebweik mour eo am̧. Emaron̄ bōk iien, kōn menin kijenmej, im lale kwar ebbwer.

Ewōr aō kōņaan ippān bar juon armej āinwōt n̄a (leddik n̄an leddik ak laddik n̄an laddik). Ewi wāween an jon̄o̧k kein iooktok n̄a? En̄jake eo kōn kōņaan leddik n̄an leddik ak ļaddik n̄an ļaddik ejjab jerawiwi. N̄e ewōr am̧ en̄jake kein im kwoj jab kōm̧m̧ani ak mour kaki, kwoj mour kōn kien erreo eo ekwojarjar an Jemedwōj Ilan̄. Kwoj juon nejin Anij ejitōn bōro im juon rikaļoor an Jisōs Kraist. Keememej bwe Rilo̧mo̧o̧r emeļeļe aolep men kwoj en̄jake. Ilo ekkeijel in bujen eo am̧ Ippān, kwonaaj kappukōt kajoor n̄an pokake kien ko an Anij im bōk kōjeraam̧m̧an ko E kar kallim̧uri. Lōke E im gospel eo An.

Kar kakkure n̄a, im ijook. Ijerawiwi ke? Jaab. N̄e kwe juon eo kar kakure kōn jabdewōt kakure ko ejjab kōm̧m̧an ruōm̧ n̄an jerawiwi. Rilo̧mo̧o̧r ej iakwe eok. E ej am̧ kajoor. Ekōņaan jipan̄ eok, kōmour eok, im lewaj aenōm̧m̧an. Proessional counselor ro lōke, ro uwaan baam̧le eo am̧, im ritōl ro am̧ maron̄ barāinwōt jipan̄.

Lale Jenesis 1:27 (jej pād ilo nememein Anij); Jon 14:18 (Rilo̧mo̧o̧r eo ej kallim̧ur kōn kaenōm̧m̧an); Pilippai 4:7 (aenōm̧m̧an eo an Anij ej eļļaļo̧k jān meļeļe); Mosaia 2:41 (ro me rej kōjparok kien ko an Anij rej jeraam̧m̧an ilo kanniōk im jetōb); Kaak im Bujen Ko 88:15 (jetōb eo im ānbwin eo rej jetōb); 89 (Naan in Mālōtlōt); 121:45 (ļōmņak ko rekwojarjar rej tōlļo̧k n̄an eļapļo̧k lōke).

Kajjitōk ko an Peba in Mālim Deļo̧n̄e Tampeļ

Irooj ekar ba bwe aolep men ko rej aikuj “kōm̧m̧an ilo erreo” im̧aan E (Katak im Bujen Ko 42:41). Kwoj ke kajjieon̄ n̄an mour erreo ilo ļōmņak ko am̧ ak m̧wiliūm̧?
Kwoj ke pokake kien erreo?
Kwoj ke meļeļe im pokake Naan in Mālōtlōt?