1.
Karōk eo an Anij ej n̄an kwe
M̧okta jān am̧ kar itok n̄an laļ in, kwaar mour ippān jinōm̧ im jemam̧ ilan̄. Kwoj jitōnbōro nejier. Ilo lan̄, kwaar katak kōn karōk eo an Anij n̄an baam̧le eo An. Kwaar bōk karōk in ilo lan̄lōn̄ kōnke enaaj kar jipan̄ eok eddōkļo̧k im wōnm̧aanļo̧k n̄an eromļo̧k āinwōt Anij kōn bōk juon ānbwin kanniōk, m̧ōttan juon baam̧le laļ in, im en̄jake ko an mour in ioon laļ in. Jet iaan en̄jake kein renaaj pen. Jemād ekar jeļā menin, kōn menin ejja m̧ōttan karōk eo An, E ekar jilkintok juon Rilo̧mo̧o̧r, Jisōs Kraist, n̄an jipan̄ eok. Jej ņa etan menin karōk in lo̧mo̧o̧r ak karōk in m̧ōņōņō.
M̧ool ko Ejjeļo̧k Jem̧ļo̧kier
Jemedwōj Ilan̄ ej eo ear ejaake karōk. E ej Jemān jetōb eo am̧, im E ej iakwe eok. E ekōņaan lewaj n̄an eok kōjeraam̧m̧an eo eļap tata An—mour indeeo Ippān. Ilo naan ko jet, E ekōņaan bwe kwon eromļo̧k āinwōt E im mour kōn mour eo E ej mour elem̧ōņōņō, ewōj. Ewōr Ippān aolep kajoor im ejeļā aolep men. Kwomaron̄ lōke E, jekdo̧o̧n n̄e mour in epen.
Jisōs Kraist ej kōm̧m̧an bwe karōk eo en pidodo. M̧okta jān an laļ in kar ejaak, Jemedwōj Ilan̄ ekar kāālet E n̄an erom am̧ Rilo̧mo̧o̧r. Jisōs Kraist ej eo wōt me emaron̄ bōkļo̧k eok n̄an Jemam̧ ilo Lan̄. Menin ej etke jej kāālet n̄an ļoor E. Aolep men rej pedped ioon kāālet jab in!
M̧are im baam̧le rej aorōk n̄an karōk eo an Anij. Kwoj m̧ōttan baam̧le eo an Anij, im aolep ajri in jetōb ro Nejin rej itok n̄an laļ in kōn juon m̧am̧a im juon baba. Anij ej kōņaan bwe leddik ro im ļaddik ro Nejin ren eddōkļo̧k ippān doon n̄an weppāān indeeo. Em̧m̧aan ro im kōrā ro kajjojo rej jokkun wōt juon jipan̄ leļo̧k n̄an juon m̧are em̧m̧an, ebōro kuk. Mour in baam̧le ijin ioon laļ in—jekdo̧o̧n kōn aolep men rejjab weppāān—maron̄ bōktok lan̄lōn̄ eļap. Ej meļeļe in n̄an jipan̄ kōpooj eok n̄an mour indeeo ippān Anij.
Kūr ko
Dāpij juon erreim̧aanļo̧k indeeo. Jabdewōt iien kwoj jelm̧ae kapo ko, mālejjon̄ ko, inepata ko, ak kāālet ko reppen, kakeememej eok make kōn karōk eo an Anij. Lale ekōjkan an m̧ool ko indeeo kwojeļā kōn karōk eo An maron̄ jipan̄ eok oktak am̧ lali apan̄ ko am̧.
Pukot pein Anij ilo mour eo am̧. Kile wāween ko Anij ej kōjeraam̧m̧an eok. Emaron̄ in juon kain jerbal jān juon, juon iien aenōm̧m̧an, ak juon uwaak in jar.
Kāālet n̄an ļoor karōk eo an Anij. Katak kōn ta eo Jemam̧ Ilan̄ ej kōņaan bwe kwon kōm̧m̧ane. Kappukot tōl eo An ilo am̧ ekkatak jeje ko rekwojarjar, naan ko an rikanaan ro remour, kean̄ eo an baam̧le, im kōjeraam̧m̧an in petriak eo am̧. Menin enaaj jipan̄ eok m̧aanjabpopo n̄an jerbal n̄an Irooj, āinwōt juon mijenede im ilo aolepān am̧ mour. Kōm̧m̧an jerbal in jipan̄ n̄an Irooj, m̧are indeeo, im karūttoļo̧k ajri ro ej men aorōk tata. Kōm̧m̧ane ijo kuņaam̧ n̄an kōm̧m̧ane juon baam̧le em̧ōņōņō kiiō kōn ļoor katak ko an Jisōs Kraist.
Kōjeraam̧m̧an ko kar Kallim̧ur kaki.
Kwomaron̄ jelm̧ae mālejjon̄ ko an mour kōn peran im kōjatdikdik ilo Kraist. Kōnke kwojeļā kōn karōn indeeo eo an Anij, ewōr juon ippam̧ kein jerbal aorōk me emaron̄ jipan̄ eok ilo iien ko reppen. Kwojeļā bwe ekanooj lōn̄ n̄an mour jān ta eo ej waļo̧k ikōtaan ļotak im mej. Kwojeļā wōn lukkuun kwe, ta jibadbad eo am̧, im ewōn eo kwomaron̄ erom kōn jipan̄ eo an Rilo̧mo̧o̧r. Jisōs Kraist ej am̧ kajoor!
Kwoj bōk mour indeeo ilo am̧ ļoor Jisōs Kraist. E enaaj lewaj n̄an kwe kajoor eo n̄an eromļo̧k āinwōt E, bar jepļaakļo̧k n̄an jinōm̧ im jemam̧ ilan̄, im mour ilo lan̄lōj ippān ro rejitōnbōro indeeo. Lōke Jisōs Kraist
Kajjitōk im Uwaak ko
Etke mour in ekanooj in pen jet iien? Ekōjkan aō lo kajoor? En̄jake ko am̧ ilo mour in—jekdo̧o̧n ko reppen tata—maron̄ in erom n̄an em̧m̧an eo am̧. Remaron̄ jipan̄ eok eddōkļo̧k im wōnm̧aanļo̧k ilo am̧ oktakļo̧k n̄an Rilo̧mo̧o̧r eo. Ejjeļo̧k men kwoj dibuki me Jisōs Kraist ejjab meļeļe kake kōnke kōn en̄taan in pinmuur eo An. E elukkuun jeļā ewi wāween jipan̄ eok. Pedped e mour eo am̧ ilo E, im E enaaj ļōn̄aj eok ilōn̄ in aolep pere im mijak ko.
Jet iien, ļōmņak eo kōn m̧ōņōņō ilo baam̧le im m̧are ej āinwōt lukkuun ettoļo̧k. Ekōjkan aō maron̄ lo lōke? Jekdo̧o̧n ta jekjek eo am̧, jab ebbweer jān karōk eo an Jemādwōj Ilan̄. E ejjamin naaj ebbweer jān kwe. Eļan̄n̄e kwoj tiljek n̄an Rilo̧mo̧o̧r eo im bujen ko am̧, kwonaaj lo uwaak ko ilo katak ko an Jisōs Kraist. E emeļeļe aolep men kwoj en̄jake. Kōn E, kwonaaj bōk kajoor n̄an pokake kien ko an Anij im bōk kōjeraam̧m̧an ko E ej kallim̧ur kaki. Lōke E im gospel eo An.
Lale 2 Nipai 9:13 (eļap em̧m̧an eo an karōk eo an ad Anij!); Mosaia 2:41 (ro me rej kōjparok kien ko maron̄ mour ippān Anij ilo lem̧ōņōņō eo ejjeļo̧k-jem̧ļo̧kin); Alma 12:28–34 (Anij ekar kōm̧m̧ane karōk in pinmuur eo kar jeļā kake n̄an ajri ro Nejin); Ebream 3:22–26 (karōk eo an Anij ekitbuuj jilkintok kōj n̄an laļ, ijo jemaron̄ kāālet kōn kōj make n̄an ļoor kien ko An).
Kajjitōk ko an Peba in Mālim Deļo̧n̄e Tampeļ
-
Ewōr ke am̧ tōmak ilo im naan in kam̧ool kōn Anij, Jemād Indeeo; Nejin, Jisōs Kraist, im Jetōb Kwojarjar?