Kain̄i im bujen ko an tampeļ rej lewaj n̄an eok eļapļo̧k maron̄ n̄an bōk kōjeraam̧m̧an ko an Anij

Menin letok kwojarjar eo ej juon menin an jeļāļo̧kjeņ im kajoor. Ilo kain̄i ko an menin letok kwojarjar eo an tampeļ, kwoj bōk etan Rilo̧mo̧o̧r eo ioom̧ make eļapļo̧k. Kwoj bujen n̄an pokake Anij, kaarmejete n̄an kōm̧anm̧an Ankilaan, mour kōn gospel eo an Jisōs Kraist, pokake kien erreo, im kōkwojarjar—ak ajeļo̧k—mour eo am̧ im aolep ko Anij ekar lewaj n̄an kwe n̄an Kabun̄ eo An. Erkein kallim̧ur ko am̧. Anij ej kallim̧ur n̄an kōjeraam̧man eok kōn eļapļo̧k jeļāļo̧kjeņ, kōjparok, im maron̄ n̄an bōk kajoor eo An. E ej barāinwōt kallim̧ur n̄an lewaj n̄an eok mour indeeo Ippān. Āinwōt m̧ōttan menin letok kwojarjar eo, kwoj bōk maron̄ eo ekwojarjar an kōņak karment eo an priesthood eo ekwojarjar. Karment eo ej juon kakōļļe kōn Jisōs Kraist im juon kakeememej kōn tampeļ bujen ko am̧.

Liāp an tampeļ eo ej kobaik ripālele ro im baam̧le ko n̄an indeeo. Ilo kain̄i eo an liāp an tampeļ, kwe im eo pālem̧ naaj kōm̧m̧ane juon bujen ippān Anij im ippān doon. Kwonaaj kallim̧ur n̄an lukkuun kōmaatļo̧k ilo m̧ool am̧ n̄an Anij im n̄an doon, n̄an iakwe im jerbal n̄an doon, im n̄an jerbal ippān doon n̄an kōjparok kien ko an Anij. En̄in ej kallim̧ur eo am̧. Anij ej kallim̧ur bwe jemjerā eo am̧ ippān eo pālem̧ im ajri ro nejūm maron̄ pād n̄an indeeo. E ej barāiwnōt kallim̧ur bwe kwomaron̄ bōk aiboojoj eo eutiej tata Ippān ilo aelōn̄ in selestial ilo am̧ kōjparok bujen ko am̧. Kōjeraam̧m̧an in ej ņa etan mour ijo eutiej tata.

En pād ippam̧ iien otemjej juon peba in mālim n̄an deļo̧n̄e tampeļ. Kweilo̧k ippān juon uwaan bisoprik eo am̧ n̄an bōk juon. Enaaj kajjitōk ippam̧ kajjitōk ko kōn ekōjkan am̧ mour kōn jon̄o̧k ko an Irooj n̄an deļo̧n̄e m̧weo Im̧ōn ekwojarjar. En makijkij am̧ etale kajjitōk kein. (Kwomaron̄ loi ilo appendix eo n̄an unin tōl in.) Jekdo̧o̧n n̄e kwoj jokwe ettoļo̧k jān juon tampeļ, kōm̧m̧an bwe peba in mālim eo am̧ en erom juon kakōļļe in iakwe eo am̧ n̄an Irooj im am̧ kallim̧ur n̄an mour kōn jon̄o̧k ko An.

Ikutkut etal n̄an tampeļ jon̄an wōt am̧ maron̄. Ippān peba in mālim in deļo̧n̄e tampeļ eo am̧, kwomaron̄ deļo̧n̄e m̧weo im̧ōn Irooj im peptaij im kapene n̄an rūtto ro am̧, bwe ren maron̄ bōk kōjeraam̧man ko kwar liļo̧k. Bōk em̧m̧an eo an aolep iien ko rem̧m̧an n̄an pād ilo tampeļ. Pukot Irooj ilo m̧weo Im̧ōn. Pukot E ilo kain̄i ko, kakōļļe ko, im Jetōb eo kwoj en̄jake. Kwonaaj loe E.

M̧aanjabpopo n̄an kōm̧m̧ani bujen ko ilo m̧weo im̧ōn Irooj. Juon iaan wāween ko rem̧m̧an tata n̄an kōm̧m̧ane menin ej n̄an kōjparok bujen peptaij eo am̧. Kōm̧m̧ane bwe en juon am̧ kōttōpar in tōl n̄an bōk kain̄i ko an tampeļ im n̄an erom juon rikōjparok bujen to̧o̧n wōt am̧ mour. Jino kiiō n̄an mour kōn kien ko kwonaaj kallim̧ur n̄an pokaki ilo tampeļ eo: pokake kien ko an Anij, kaarmejete, gospel eo an Jisōs Kraist, erreo, im kōkwojarjar. Baam̧le eo am̧, bisop eo, im ritōl ro jet an Kabun̄ in remaron̄ jipan̄ eok.

Kwomaron̄ erom āinwōt Jisōs Kraist. E enaaj jipan̄ eok erom juon rikaļoor in jim̧we em̧m̧anļo̧k. Kain̄i ko im tampeļ bujen ko renaaj katakin eok wāween deļo̧n̄e im̧aan mejān Anij im bōk mour indeeo Ippān.

Kwonaaj letlet kōn kajoor an Anij. Tampeļ bujen ko rej itok kōn kallim̧ur eo me kajoor im aiboojoj eo a Anij naaj pād ioom̧. Enjeļ ro An renaaj mije eok.

Iien eo ilo tampeļ enaaj kakkejel eok epaakeļo̧k Jisōs Kraist im Jetōb Kwojarjar. Kwonaaj en̄jake aenōm̧m̧an eo im kakkūje eo an Anij. Kwonaaj ron̄ Ainikien kōn eļapļo̧k alikkar. Lan̄ ko renaaj peļļo̧k n̄an kwe, im enaaj em̧m̧anļo̧k am̧ meļeļe iaļ ko An. Enaaj ļapļo̧k am̧ kajoor n̄an jelm̧ae apan̄ ko am̧ kōnke būruōm̧ ej ekkejel n̄an Būruōn.