6.
Iakwe Anij, iakwe rūturum̧
Matu 22:37–40
N̄an jipan̄ kwe kōm̧m̧ane kāālet ko rem̧m̧an, Anij ej letok kien ko. E ej kōm̧m̧ane menin kōnke E ej iakwe kwe. Im wūn eo em̧m̧an tata n̄an pokake kien ko an Anij ej kōnke kwoj iakwe E. Iakwe ej aorōk ilo kien ko an Anij.
M̧ool ko Ejjeļo̧k Jem̧ļo̧kier
Anij ej iakwe eok. E ej Jemam̧. Iakwe eo An eweppān emaron̄ im̧we kwe n̄an iakwe E. N̄e iakwe eo am̧ n̄an Jemedwōj Ilan̄ ej kāālet eo aorōk tata ilo mour eo am̧, kāālet ko rellōn̄ renaaj pidodo.
Kien ko ruo reļļap iaan aolep kien rej iakwe Anij im iakwe rūturum̧. Im wōn eo ej rūturum̧? Aolep! Aolep men ko jet katakin ilo jeje ko rekwojarjar im jān rikanaan ro rej ekkeijel ippān kien kein ruo.
Aolep armej rej jeim̧ im jatūm̧—ekoba, aaet, armej ro reoktak jān kwe ak rej jab errā ippam̧. Jemedwōj Ilan̄ ej kōņaan bwe ajri ro Nejin ren iakwe doon. N̄e kwōj jerbal n̄an ajri ro Nejin, kwoj jerbal n̄an E.
Kūr ko
Kwaļo̧k iakwe n̄an Anij ilo kōjparok kien ko An. N̄an waanjon̄ak, ilo ad kwojarjar raan in Jabōt, ekoba ilo tiljek kōppopo n̄an im bōke kwojkwoj eo, kwoj kwaļo̧k iakwe n̄an Anij bwe kwoj m̧ōņōņō in ajeļo̧k juon raan ilo juon wiik n̄an E. Ilo am̧ jitlo̧k im kōļļā juon m̧ōttan jon̄oul im joortak ko, kwoj kwaļo̧k n̄an Anij bwe jerbal eo an eļapļo̧k an aorōk n̄an kwe jān m̧weiuk ko. N̄e kwoj kōjerbale etan Anij im Kraist ilo kauteij, ejjab ilo kajje ak ba bajjōk, kwoj kwaļo̧k bwe kwoj kam̧m̧oolol kōn aolep men ko Rekar kōm̧m̧ane n̄an kwe.
Kōm̧m̧an n̄an aolep āinwōt juon ajri nejin Anij. Āinwōt juon rikaļoor an Jisōs Kraist, kwomaron̄ būlik m̧aan ilo kōm̧m̧an n̄an aolep armej jān aolep ri laļ ko, kabun̄ ko, im jabdewōt bar kumi ko jet kōn iakwe im kautiej—eļap tata ro me rej jet iien rijorrāān ro an naan ko im jerbal ko rekōmmetak. Pukotļo̧k ro me remaron̄ en̄jake aer ajimakeke, ettoļo̧k, ak m̧ōjņo̧. Jipan̄ er en̄jake iakwe eo an Jemedwōj Ilan̄ jān kwe. Kwaļo̧k ippāer kōjeraam̧m̧an ko E ekar liwaj n̄an eok, im karuwaineneik er n̄an ļoor Jisōs Kraist.
Kanooj lale bwe kajin eo am̧ ej kwaļo̧k iakwe eo am̧ n̄an Anij im ro jet—men̄e kwoj kōnono ilo likio in armej ak ilo online. Ba men ko rej kōketak—ejjab men ko remaron̄ kōm̧m̧an akweel, metak, ak kalulu, jekdoon n̄e kōm̧m̧an kōjak. Naan ko am̧ remaron̄ kajoor. Kōtļo̧k bwe ren kajoor ilo em̧m̧an.
Kwaļo̧k iakwe n̄an baam̧le eo am̧. Iakwe aolep ajri ro nejin Anij ej jino ilo m̧weo. Kōm̧m̧an ijo koņaam̧ bwe m̧weo im̧ōm̧ en juon jikin aolep rej en̄jake iakwe eo an Rilo̧mo̧o̧r.
Kōjeraam̧m̧an ko kar Kallim̧ur kaki.
Jemjerā eo am̧ ippān Anij enaaj m̧wūlaļļo̧k ilo am̧ kwaļo̧k iakwe eo am̧ ilo am̧ pokake kien ko An im kōjparok bujen ko am̧ Ippān.
Jemjerā eo am̧ ippān ro jet enaaj m̧wūlaļļo̧k ilo am̧ kwaļo̧k iakwe eo am̧ ilo jerbal in jipan̄ āinwōt Kraist. Kwonaaj lo lan̄lōn̄ ilo am̧ kōm̧m̧an bwe laļ in en lapļo̧k an juon jikin iakwe.
Kajjitōk ko im Uwaak ko
Ekōjkan aō en̄jake iakwe eo an Anij? Iakwe eo an Jemedwōj Ilan̄ ej aolep iien pojak. En ekkā am̧ ekōnono ippān ilo jar. Kwaļo̧k en̄jake ko am̧ n̄an E, im lukkun lale im̧we ko jān E. Riiti naan ko an ilo jeje ko rekwojarjar. Ļōmņak kōn aolepen men ko E kar kōm̧m̧ane n̄an kwe. Bōk am̧ iien ilo ijoko im m̧akūtkūt ko ijo Jetōb ej pād ie.
Irooj ej ke kōņaan bwe in iakwe aolep, barāinwōt ro rej nana n̄an n̄a? Irooj ekōņaan bwe kwon iakwe rikōjrat ro am̧ im jar kōn ro rej nana n̄an kwe. Bōtaab, ejjab meļeļein bwe kwoj aikuj pād ilo juon wāween eo ej kōm̧m̧an bwe kwon metak ilo kōlmenļo̧kjen, ānbwin, im jetōb. Ejaaki bun̄tōn ko rem̧m̧an n̄an kōjparok eok make. Eļan̄n̄e m̧an ak kakkure eok, ak n̄e kwojeļā ke men in ej waļo̧k n̄an bar juon, kōnaan ippān juon rūtto eo kwoj lōke.
N̄aat im ewi wāween aō jeļā kajeen membōr ļaddik ro n̄e n̄a leddik ak leddik ro n̄e n̄a ļaddik? Wāween eo em̧m̧an tata n̄an jeļā kajeen ro jet ej ilo m̧ōttā eo em̧m̧an. Ilo am̧ dik wōt, kalōk m̧ōttā ko ippān elōn̄ armej. Ilo jet m̧anit, jodikdik ro rej jeļā kajeen ļaddik n̄e er leddik im leddik rej jeļā kajjien ļaddik ilo iien m̧akūtkūt ko an kurup ko. N̄an eddōkļo̧k im jokane eo am̧ ilo en̄jake ak jetōb, karum̧wijļo̧k juon-illo̧k-juon m̧akūtkūt ko m̧ae iien eo kwoj ekkeke—16 iiō dettam̧ ej juon jon̄o̧k em̧m̧an. Ko̧o̧njeļ ippān baam̧le eo im ritōl ro am̧. Kakwoņ jemjerā ko rekajoor an ruo armej jān doon m̧ae iien kwoj rerūttoļo̧k. Bōk am̧ iien ippān ro rej jipan̄ kwe kōjparok kallim̧ur ko am̧ n̄an Jisōs Kraist.
Ta eo imaron̄ kōm̧m̧ane n̄e m̧weo im̧ō ejjab juon jikin iakwe? Rilo̧mo̧o̧r ejeļā kōn ta eo kwoj ioone, im E ej iakwe kwe. Kijenmej, wōnm̧aanļo̧k n̄an kōjparok kien ko an Anij, im kōm̧m̧an bwe kwon juon waanjon̄ak em̧m̧an n̄an baam̧le eo am̧. Jerbal ko am̧ reļem waan an iakwe remaron̄ kōm̧m̧ane juon oktak eļap. Kwomaron̄ barāinwōt kalōk jemjerā ko ilo ward eo an baam̧le eo am̧. Kōppopo kiiō n̄an kalōk am̧ make baam̧le loe ilo katak ko an Jisōs Kraist. Kakeememej: Jisōs Kraist ej am̧ kajoor.
Lale Aiseia 58:3–11 (jibadbad ko an jitlo̧k); 58:13–14 (kōjeraam̧m̧an ko an kautiej Jabōt); Malakai 3:8–10 (kōjeraam̧m̧an ko an juon m̧ōttan jon̄oul); Luk 6:27–28 (iakwe rikōjdāt ro am̧); 10:25–37 (wōn eo ej rūturu?); Jon 3:16–17 (Anij ekar iakwe kōn̄, kōn menin E ekar jilkintok Nejin); 14:15 (jej kōjparok kien ko kōnke jej iakwe Anij); 1 Jon 4:19 (jej iakwe Anij kōnke E ej akwe kōj); Mosaia 2:17 (n̄e jej jerbal n̄an ro jet, jej jerbal n̄an Anij).
Kajjitōk ko an Peba in Mālim Deļo̧n̄e Tampeļ
-
Kwoj ke ļoor katak ko an Kabun̄ eo an Jisōs Kraist ilo m̧wilūm̧ ilo ņojak im lo̧bwilej (public) ippān membōr ro an baam̧le eo am̧ ak ro jet?
-
Kwoj ke juon eo elikio an kōļļā juon m̧ōttan jon̄oul?