Ijjamin Naaj Aikuj, jān Yongsung Kim letok jān Havenlight
5.
Etetal ilo meram an Anij
Galetia 5:25
Kwoj kōm̧m̧ani kāālet ko rem̧m̧anļo̧k n̄e kwoj lo men ko ilo alikkar. Ej etke meram eo ej lukkuun aorōk; meram eo ej kōm̧m̧an an pidodoļo̧k n̄an lo iaļ eo ejim̧we. Jemādwōj Ilan̄ ekar lewaj n̄an kwe maron̄ eo n̄an bōk meram eo an lan̄—menin letok eo an Jetōb Kwojarjar—n̄an jipan̄ eok alikkar am̧ loe ta eo em̧m̧an im nana, jim̧we im bōd.
M̧ool ko Indeeo
Kwomaron̄ bōk Jetōb Kwojarjar eo āinwōt eo m̧ōttam̧ aolep iien. Ke kar kapen eok juon membōr in Kabun̄ eo an Jisōs Kraist, kar karuwaineneik eok n̄an “bōk Jetōb Kwojarjar eo.” Iien eo em̧m̧an n̄an bōk Jetōb eo āinwōt eo m̧ōttam̧ aolep iien ej juon iaan menin letok ko reļļap tata an Anij n̄an kwe.
Kōm̧m̧ani kālet ko rem̧m̧an ekōm̧m̧an bwe maron̄ eo am̧ n̄an en̄jake Jetōb en em̧m̧anļo̧k. Elōn̄ men ko rem̧m̧an im wōr tokjeer ilo laļ in. Āinwōt an ānbwinūm̧ jelet ta eo kwoj m̧ōn̄ā im daak, kōļmenļo̧kjen eo am̧ im jetōb rej jelet ta eo kwoj riiti, alooje, im ron̄jake.
Kūr ko
Kōm̧m̧an iien n̄an Irooj aolep raan. Katak kōn E. Keememej E iien otemjelok. Jar n̄an Jem̧ōm̧ Ilan̄. Ekkatak jeje ko rekwojarjar im naan ko an rikanaan ro remour. Innām mour kōn ta eo kwoj ekkatak.
Pukōt ta enaaj kōketak, im̧we, im karuwainene Jetōb. Ilo am̧ kōm̧m̧ane kālet ko kōn ta eo kwoj alwoje, riiti, ron̄jake, ak bōk koņaam ilo, ļōmņak kōn ewi wāween am̧ en̄jake. Ej ke karuwaineneik tok ļōmņak ko rem̧m̧an? Pād ettoļo̧k jān jabdewōt men ko rej kōm̧m̧an kōjak kōn men ko rekwojarjar. Jab bōk koņaam̧ ilo men ko me rej kadikļo̧k ekajet eo am̧ ak ejekkar n̄an Jetōb, ko āinwōt kakkure, dān in karōk, ak uno ko rekajoor. Bōk peran eo n̄an kune pija in alooj eo ak game eo, diwōjļo̧k jān juon pija in alooj ak eeb, ukōt al eo am̧, ak oktakļo̧k jān jabdewōt men me ejjjab jokkuun wōt ippān Jetōb eo.
Kōjerbale social media n̄an kōketak. Social media emaron̄ juon kein jerbal ekajoor n̄an leto letak meļeļe. Eļan̄n̄e kwoj kōjerbale, pādpād ioon meram, tōmak, im m̧ool. Jab keidi mour eo am̧ n̄an ta eo armej ro jet rej āinwōt iiooni. Keememej bwe aorōk eo am̧ ej itok jān juon ajri nejin ro jinen im jemān ilan̄, ejjab jān social media.
Pukōt en̄jake ko ewōr tokjeer im jemerā ko rem̧ool, aitok. Kwon kōjparok bwe am̧ kōjerbal iaļan iiaio im media ren jab bōbrae ami joļo̧k iien ko ami ippān baamļe im ro m̧ōttam̧. Social media im iaļan iiaio ko jet emaron̄ bōk eļap iien ko am̧ ilo an jab kōro̧o̧l waj men ko raorōk reļļap. Kakkije jān laļ eo an online, im iiaio ippān armej ilo m̧oolin.
Kōjeraam̧m̧an ko kar Kallim̧ur kaki.
Emaron̄ pād Jetōb ippam̧ iien otemjej. Kallim̧ur in ej m̧ōttan bujen eo kwoj kōm̧m̧ane aolep iien kwoj bōk kwojkwoj eo. Jetōb eo enaaj kwaļo̧k kam̧ool n̄an kwe kōn Jemādwōj Ilan̄ im Jisōs Kraist. Enaaj kaenōm̧m̧an, tōl, kakkōl, im kōjeraam̧m̧an kwe. Enaaj jipan̄ kwe kile m̧ool im loe em̧m̧an eo an laļ in.
Kajjitōk im Uwaak ko
Elmen aō jeļā n̄e ij en̄jake Jetōb Kwojarjar? Ekkatak n̄an kile Jetōb ebōk iien, kōmālmel, im kijenmej. E ej kōnono n̄an kajjojo armej ilo wāween ko reoktak. Jab pere men ko reļam waan—en̄jake in aeņōm̧m̧an kwoj ron̄ jān naan in kam̧ool eo an juon armej ak en̄jake eo ejjab jim̧we kwoj bōke ālkin am̧ kōm̧m̧an juon kāālet ebōd. Kappukōt ilo jeje ko rekwojarjar kōn wāween ko reoktak Jetōb ej kōnono, jar kake, im laleļo̧k iien ko rem̧m̧an n̄an en̄jake Jetōb.
Ta in pija ko renana? Etke ij aikuj bōbrae jene? Pija nana ej bōk jikin, ilo pija ko ak naan ko, eo kar kōm̧m̧ane n̄an karuj en̄jake ko an m̧ōm̧ in kanniōk. Pija nana ej itok ilo bujin kain wāween ko, ekoba pija in alooj ko, pija ko, game ko, im al ko. Emaron̄ barāinwōt ennaan ko im pija ko jilkinļo̧k ikōņaan ro rej m̧ōtta. Pija nana ej kōm̧m̧an bwe men ko rekwojarjar—ānbwinid im en̄jake ko kanniōk—ren jab juon men in kauteij. Kwomaron̄ jidiļo̧k am̧ loe pija ko renana. Men̄e ekar jidiļo̧k am̧ loe pija ko renana ak jaab, kajju etal jāni. Kwomaron̄ barāinwōt kōnono ippān juon m̧am̧a ak baba ak juon ritto kwoj lōke. Alooj pija nana ilo kar kōņaan ej jerawiwi im ej ko̧kkure maron̄ eo am̧ n̄an en̄jake Jetōb. Ej kam̧ōjņo̧ik maron̄ eo am̧ n̄an kōjebwebweik eok make im kajoreen wāween am̧ loe kwe make im ro jet. Jisōs Kraist ewōr an kajoor n̄an jipan̄ kwe anjo̧ jān pija ko renana im ukweļo̧k. Jitļo̧k n̄an E im oktakļo̧k jān marok. Bisop eo am̧ emaron̄ jipan̄ kwe bōk kajoor im jeorļo̧k bōd kōn Rilo̧mo̧o̧r. Jisōs Kraist ej am̧ kajoor!
Lale Sam 119:105 (naan an Anij ej āinwōt juon meram ilo iaļ eo ad); Amos 5:14 (kappukot em̧m̧an); Galatia 5:22–23 (leen ko an Jetōb); Moronai 7:18–19 (meram an Kraist); Katak im Bujen Ko 6:23 (Irooj ej kōnono aenōm̧m̧an); 20:77, 79 (jar ko an kwojkwoj eo).
Kajjitōk ko an Peba in Mālim Deļo̧n̄e Tampeļ
-
Irooj ekar ba bwe aolep men ko rej aikuj “kōm̧m̧an ilo erreo” im̧aan E (Katak im Bujen Ko 42:41). Kwoj ke kajjieon̄ n̄an mour erreo ilo ļōmņak ko am̧ ak m̧wiliūm̧?