3.
Kwomaron̄ jipan̄ jerbal eo an Anij
Jemedwōj Ilan̄ ej iakwe aolep arji ro Nejin. E ej kōņaan jipan̄ er lo lem̧ōņōņō im lan̄lōn̄, bar ro̧o̧lļo̧k n̄an Ippān, im bōk mour indeeo. Menin ej ņa etan jerbal in lo̧mo̧o̧r im mour ijo eutiej tata an An, im E ej kūr eok n̄an jipan̄!
M̧ool ko Ejjeļo̧k Jem̧ļo̧kier
Jerbal in aiboojoj eo an Anij ej n̄an kakūrm̧oool mour jab wabanban im mour indeeo eo am̧. Jab wabanbabn ej n̄an mour n̄an indeeo kōn juon ānbwin kar jerkakpeje. Mour indeeo, ak mour āinwōt Anij, ej n̄an erom ainļo̧k wōt Anij im mour Ippān indeeo āinwōt baam̧le ko. Aolepān menin ej pidodo kōnke kōn Jisōs Kraist im Pinmuur eo An. Kwomaron̄ lōke E.
Kwomaron̄ jipan̄ jerbal eo an Anij kōn itok n̄an Kraist im jipan̄ ro jet kōm̧m̧an ejja āinwōt. Jabdewōt iien kwoj kōm̧m̧ane juon men n̄an jipan̄ juon ļoor Jisōs Kraist, kwoj jipan̄ jerbal eo an Anij.
Kūr ko
Mour kōn gospel eo. Kaļōk tōmak eo am̧ ilo Jisōs Kraist. Ukweļo̧k aolep raan. Bōk kain̄i ko an priesthood eo an Anij im kōjparok bujen ko am̧. Kōm̧m̧an bwe en jon̄o̧k eo n̄an aolepān mour eo am̧.
Kea kōn ro rej pād ilo aikuj. Pukot wāween ko n̄an jerbal im jerbal in karejar n̄an ro jet, ekoba baam̧le eo am̧, ro m̧ōttam̧, im jukjuk in pād eo am̧. Juon wāween em̧m̧an n̄an jipan̄ armej ro rej pād ilo aikuj ej n̄an pokake kien jitlo̧k im leļo̧k jortak in jitlo̧k ko.
Karuwaineneik aolep n̄an bōk gospel eo. Kōm̧m̧an bwe naan ko im m̧akūtkūt ko am̧ ren kwaļo̧k tōmak eo am̧ ilo Jisōs Kraist. Kwōn pojak n̄an jiron̄ jabdewōt eo ej kajjitōk ippam̧ kōn kōjatdikdik eo im lem̧ōņōņō kwoj en̄jake āinwōt An rikaļoor. N̄an likao ro, jerbale juon mijen edipio ej juon eddo an priesthood. N̄an jiron̄ ro, ej juon iien em̧m̧an ekajoor; jar n̄an jeļā eļan̄n̄e Irooj ekōņaan bwe kwoj jerbal. M̧aanjabpopo n̄an kwaļo̧k gospel ilo aolepān mour eo am̧.
Kobaik baam̧le ko n̄an indeeo kōn kōm̧m̧an jerbal in menmenbwij im tampeļ. Katak kōn ro jibūm̧ im jim̧m̧am̧. Kappukot wōn eo ej aikuji kain̄i ko an tampeļ. Kakutkut am̧ etal n̄an tampeļ jon̄an wōt kwomaron̄e n̄an peptaij im kapen n̄an er. Eļan̄n̄e kwoj aikuj jipan̄, etal n̄an FamilySearch.org.
Kōjeraam̧m̧an ko kar Kallim̧ur kaki.
Enaaj wōr ippam̧ jipan̄ eo an Anij. Jemedwōj Ilan̄ ejjab kōtmene bwe kwon kōm̧m̧ane jerbal in kōn kwe make. E ej pād ippām. N̄e kwoj ettā ilo ajeļo̧k iien eo am̧ im būruōm̧, E enaaj kōm̧m̧ane men ko ejej uwaer ilo kwe. Jisōs Kraist ej am̧ kajoor!
Kwonaaj obark kōn lan̄lōn̄. Jerbal eo an Anij ej juon jerbal ekam̧ōņōņō! Ilo am̧ bōk ijo kuņaam̧ ie, kwomaron̄ en̄jake lan̄lōn̄ eo E ej en̄jake. Pijaikļo̧k lan̄lōn̄ eo kwonaaj kōjjebare ippān Jemādwōj Ilan̄ im ro Nejin me kwar jipan̄ bōktok n̄an E!
Kajjitōk ko im Uwaak ko
Anij emaron̄ ke lukkuun kōjerbal n̄an ilo jerbal eo An? Aaet! Elōn̄ wāween ko n̄an jipan̄ kōn jerbal eo. Emaron̄ āinwōt armej ro jet eļapļo̧k aer lo̧ļe im kapeel, bōtaab Jemam̧ Ilan̄ ej lo kōjatdikdik eo am̧. E ekar lewaj n̄an kwe menin letok ko me kwomaron̄ kōjerbali n̄an jerbal im aintok ajri ro Nejin. Ej Em̧m̧an eļan̄n̄e menin letok kein rej oktak jān ta eo ewōr ippān ro jet. Ilo m̧ool, en̄in ej etke menin letok ko am̧ rej lukkuun aorōk. Rej aikuji eok!
Lale Matu 10:39 (eļan̄n̄e kwoj joļo̧k am̧ mour ilo jerbal eo an Rilo̧mo̧o̧r, kwonaaj lo e); 1 Korint 12:14–27 (aolep membōr ro rej aikuji er ilo ānbwin eo an Kraist); Pilippi 1:6 (kwōn lōke bwe Anij ej jerbal ilo kwe); Jekob 5:72 (Irooj in jikin kallib eo ej jerbal ippam̧); Katak im Bujen Ko 18:15–16 (am̧ lan̄lōn̄ naaj ļap ippān ro kwoj bōktok n̄an Kraist); 64:33–34 (juon jerbal eļap ej itok jān men ko reddik im ļam waan); Moses 1:6 (“ewōr juon jerbal Ippa n̄an kwe”); 6:31–34 (Anij ej kōkarbōb ro E ej kūr, em̧ool jekdo̧o̧n eļan̄n̄e rej en̄jake likjab).
Kajjitōk an Peba im Mālim Deļo̧n̄e Tampeļ
-
Ewōr ke am̧ naan in kam̧ool kōn Jepļaaktok eo an gospel eo an Jisōs Kraist?