Jodikdik ro
9. Kwoj jeraam̧m̧an kōn ki ko im mālim eo an priesthood eo
rikwōj meļan in lan̄ ro rej kōjepļaaktok ki ko an priesthood eo ilo Kirtland Tampeļ

9.

Kwoj jeraam̧m̧an kōn ki ko im mālim eo an priesthood eo

Matu 16:18–19

Ke Jisōs ekar katakin Piter kōn mālim eo an priesthood eo, E ekar kōnono kōn ki ko. Ki ko rej kōjerbali n̄an mejaļļo̧k im kōpeļļo̧k men ko. Ki ko an priesthood eo maron̄ mejaļļo̧k kajoor eo an Anij, menin letok ko, im kōjeraam̧m̧an ko ilo mour eo am̧.

M̧ool ko Ejjeļo̧k Jem̧ļo̧kier

Aolep ki ko im mālim eo an priesthood eo rej itok kōn Jisōs Kraist. Aolep rikabwijer ro an priesthood eo maron̄ anōk likļo̧k mālim eo an n̄an E. Rilo̧mo̧o̧r eo ej kōmlet wōn eo ej bōk mālim in im wōn ej bōk ki ko an priesthood eo. Jej lōke jeļā eo An eweppān.

Jisōs Kraist ekar bar kōjepļaaktok priesthood eo An ilo tōre in ad. E ej tōl ekōjkan an priesthood eo naaj kōjerbale. Adam, Moses, Piter, im ebar lōn̄ rikanaan ro jet ilo aolep bwebwenato raar bōk ki ko an priesthood eo. Ilo tōre in ad, Josep Smith ekar bōk ki ko an priesthood eo jān Jon Peptaij, Piter, Moses, Elias, Ilaija, im ro jet. Ro uwaan Būreejtōnji eo Kein Kajuon im Doulul eo an Jon̄oulruo Rijilōk ro rej kabwijer aolep ki ko an priesthood eo ioon laļ in rainin. Ritōl ro an priesthood ijo jokwe ie im būreejtōn ro an elder ro rej barāinwōt kabwijer ki ko an priesthood eo n̄an kūr ko aer. Ki ko an priesthood eo rej tōl jerbal eo an Anij. Rej kōmālim im kōkajoor em̧m̧aan ro im kōrā ro n̄an jipan̄ ilo jerbal jab in.

Mālim eo an priesthood eo ej kōjeraam̧m̧an aolep ajri ro nejin Anij. Kōnke priesthood eo kar kōjepļaaktok, kwomaron̄ bōk kain̄i ko im kōm̧m̧ani bujen ko ippān Anij. Kwomaron̄ jerbal ilo etan Anij n̄e kwoj bōk juon ijjitōn̄ ak kūr jān juon eo ewōr ippān mālim.

Kūr ko

Bōk kūr ko an Kabun̄ in im jerbal tiljek. N̄e kwoj bōk juon kūr an Kabun̄ in, kwoj kōjenolo̧k kōn mālim eo jān Anij n̄an jerbal ilo eddo jab eo. Kwomaron̄ barāinwōt bōk tōl eo jān Anij n̄an jerbal in jipan̄ eo am̧. Ilo am̧ jerbal, kwoj bōk jikin Jisōs Kraist. Leļo̧k n̄an E ijo em̧m̧an tata ippam̧.

Rejetake ro me Anij ekar kūr n̄an jerbal. N̄an rejetake ej meļeļe in eļapļo̧k jān baj kajutak peiūm̧ n̄e juon āt ej kwaļo̧ke ilo juon kweilo̧k an Kabun̄ in. Meeļeļein n̄an rie im jipan̄e. Kappukot wāween ko n̄an kwaļok bwe kwoj rejetake armej eo Jisōs Kraist ekar kūri n̄an jerbal ilo Kabun̄ eo An.

Kakūrm̧ool ijjitōn̄ ko jān ritōl ro am̧ an Kabun̄ in—ekoba jān doulul eo am̧ ak kūlaaj būreejtōnji eo am̧. Ewōr ippāer mālim eo jān Anij, eo rej kappeik eok n̄an ijjitōn̄ jab eo. Maron̄ kappeik eok n̄an jerbal in karejar n̄an juon, karuwaineneik armej ro rej itaktok ilo kweilo̧k in kwojkwoj eo, ak jipan̄ kōn juon m̧akūtkūt. Jekdo̧o̧n ta ijjitōn̄ eo, kalimjōke āinwōt juon iien em̧m̧an n̄an erom juon rikaļoor an Jisōs Kraist im jerbal n̄an ajri ro nejin Anij.

Jisōs Kraist kar peptaiji jān Jon Peptaij ilo Reba Jordan

Kōjeraam̧m̧an ko kar Kallim̧ur kaki.

Kwomaron̄ lōke bwe kain̄i ko kwoj būki rej kōmālim jān Jisōs Kraist. En̄in ej juon iaan men me ej kōm̧m̧an an Kabun̄ eo an Jisōs Kraist ainjuon. Kōn kain̄i ko an priesthood eo, kajoor eo an Anij ej waļo̧k

Kwonaaj erom juon kein jerbal ilo pein Irooj. Ilo am̧ jerbal n̄an Irooj kōn mālim eo An im ium̧win tōl eo an ro Rikarejeran me rej kabwijer ki ko an priesthood eo, E enaaj jipan̄ eok jeļā ekōjkan jerbal n̄an ro jet ilo jerbal eo An. Jisōs Kraist ej am̧ kajoor. Jerbal in jipan̄ eo am̧ enaaj jipan̄ eok epaakeļo̧k E im bōktok n̄an eok lan̄llōn̄.

Kajjitōk ko im Uwaak ko

Wōn eo ilo ward eo aō ej kabwijer ki ko an priesthood eo? Bisop eo im būreejtōn ro an doulul ko an elder ro, rūkaki ro, im tikōn ro rej kabwijer ki ko an priesthood eo. Menin ej meļeļe bwe Irooj ekar kappeik er n̄an tōl ekōjkan kōjerbal priesthood eo n̄an jerbal im kōjeraam̧m̧an aolep ilo ward eo.

Ekōjkan an ki ko an priesthood eo kōjeraam̧m̧an eō? Kain̄i ko āinwōt peptaij im kwojkwoj eo rej kōmālim jān ki ko an priesthood eo. N̄e kwoj bōk juon kūr ilo Kabun̄ in, naaj kōjenolo̧k eok ium̧win tōl eo an juon eo ej kabwijer ki ko. Menin ej kōjeraam̧m̧an eok kōn mālim eo n̄an jerbal ilo kūr jab eo. Ritōl ro an Kabun̄ in im rūkaki ro me rej jerbal n̄an kwe rej barāinwōt bōk mālim an priesthood eo kōn ki ko.

Ekōjkan an em̧m̧aan ro im kōrā ro jerbal kōm mālim eo an priesthood eo? Em̧maan ro rōrreo kar leļo̧k ioer priesthood eo im rej ekkapit n̄an opiij ko an priesthood eo āinwōt tikōn, rūkaki, pris, im elder. Jim̧or kōrā im em̧m̧aan ro me rej kōjenolo̧k n̄an jerbal ilo juon kūr rej bōk mālim eo an priesthood kar kappeik jān Anij n̄an kakūrm̧ool kūr jab eo. Ejja menin wōt em̧ool n̄an kōrā ro im em̧m̧aan ro me rej bōk juon ijjitōn̄ jān juon rtōl an Kabun̄ in.

Lale Katak im Bujen Ko 35:24–27 (Kabun̄ in ej tōl kōn ki ko an Irooj kar litok); 107:18–20 (ki ko an Priesthood eo an Melkesidek im Priesthood eo an Aron); 110:11–16 (Moses, Elias, im Ilaija kar kōjepļaaktok ki ko).

Kajjitōk ko an Peba in Mālim Deļo̧n̄e Tampeļ

  • Kwoj ke rejtake Būreejtōn eo an Kabun̄ eo an Jisōs Kraist im Armej ro Rekwojarjar ilo Raan-ko Āliktata āinwōt rikanaan, rilolo, im ribōk revelesōn im armej eo de eo ioon laļ in kar kōmālimi n̄an kōjerbal aolep priesthood ki ko?

  • Kwoj ke rejtake ro uwaan Būreejtōnji eo Kein Kajuon im Doulul eo an Jon̄oulruo Rijilōk ro āinwōt rikanaan ro, rilolo ro, im ribōk revelesōn ro?

  • Kwoj ke rejtake Ritōl ro jet Routiej an Kabun̄ in im ritōl ro ijo jokwe ie an Kabun̄ in?