Kwojkwoj Ioon Naan eo, jān Liz Lemon Swindle. letok jān Havenlight

M̧ool eo enaaj kanemkwoj eok

Jon 8:32

Jemam̧ Ilan̄ ej juon Anij in m̧ool. E ejeļā men otemjeļo̧k. Aolep men rej itok jān E im tōl n̄an E. Kwoj kwaļo̧k ke kwoj kaorōk m̧ool ilo am̧ kappukōt ekkatak, mour kōn m̧ool, im jutak pen kōn ta eo kwojeļā em̧ool—men̄e kwoj aikuj jutak make iaam̧.

M̧ool ko Ejjeļo̧k Jem̧ļo̧kier

Jemedwōj Ilan̄ ej kōņaan bwe leddik ro im ļaddik ro Nejin ren iien otemjej katak. Ewōr ippam̧ jim̧or wun ko an kanniōk im jetōb n̄an pukot im iakwe katak. Jeļāļo̧kjeņ ejjab wōt n̄an kōm̧m̧an jāān. Ej m̧ōttanļo̧k kōttōpar eo am̧ indeeo n̄an erom āinwōt Jemedwōj Ilan̄.

Mour kōn m̧ool ej meļeļe in kwoj iakwe ta eo ejim̧we im̧aan mejān Anij—eļapļo̧k jān am̧ iakwe aenōm̧m̧an, bun̄bun̄, ak em̧m̧an eo am̧ make. Ej meļeļein kōm̧m̧ane ta eo ejim̧we kōnke ejim̧we.

Ewōr ippam̧ juon men eaorōk n̄an kwaļo̧k. Gospel eo an Jisōs Kraist ej kabwijer uwaak ko n̄an kajjitōk ko an mour in. Ej iaļ eo n̄an aenōm̧m̧an im m̧ōņōņō, Kwomaron̄ jab jeļā aolep men, bōtaab ebwe jon̄an am̧ jeļā n̄an iakwe ro iturum̧, kwaļo̧k pedped in katak ko rem̧ool ippāer, im karuwaineneik er n̄an katak eļapļo̧k.

Kūr ko

Ekkatak iien otemjej. Kappukōt iien ko rem̧m̧an n̄an kōlapļo̧k kōlmenļo̧kjeņ eo am̧ im kapeel eo am̧. Iien kein rem̧m̧an remaron̄ koba jeļāļo̧kjeņ ilo jikuuļ ak kaminene ko, barāinwōt katak rejjab oktak jān kein katakin ko kwoj lōke. Kobaik Irooj ilo kijejeto ko am̧, im E naaj tōl eok.

Katak m̧ool ko ilo jetōb. Ilo am̧ ekkatak kōn laļ eo ipeļaakūm̧, ekkatak barāinwōt kōn Rilo̧mo̧o̧r, eo ekar kōm̧anm̧an laļin. Ekkatak kōn mour im ekkatak ko An. Kōm̧m̧an bwe jemenere, institute, im ekkatak kōn gospel eo en m̧ōttan ekkatak eo am̧ ilo mour in. Emaron̄ kōpooj eok n̄an jerbale juon mijen im kwaļo̧k gospel eo ilo aolepān mour eo am̧.

Mour kōn m̧ool. Jab koot, riap, jerbal bōd, ak m̧oņ ilo jabdewōt wāween—ilo jikin jikuuļ, jikin, jerbal, online, ak ijoke jabdewōt Kwōn juon rikaļoor an Jisōs Kraist etiljek iloblej im ilo ittiņo jim̧ōr.

armej ro rej bukwelōlō im̧aan Jisōs Kraist eo ejerkakpeje.

Kōjeraam̧m̧an ko kar Kallim̧ur kaki.

Jeļāļo̧kjeņ ej kōļapļo̧k maron̄ eo am̧ n̄an jerbal n̄an Irooj, ekoba āinwōt juon mijenede. Ej kōkajoor kwe n̄an kōjeraam̧m̧an ro jet, eļaptata baam̧le eo am̧. Ilo an ļapļo̧k am̧ ekkatak, enaaj ļapļo̧k am̧ maron̄ kalōk aelōn̄ in kiin̄ eo an Anij im im̧we laļ in n̄an em̧m̧an.

M̧ool ej boktok aenōm̧m̧an im kautiej kōj make. N̄e naan ko am̧ im m̧akūtkūt ko am̧ rej jokkun wōt juon ippān m̧ool eo, kwōj kwaļo̧k ke armej ro jet im Irooj remaron̄ lōke eok.

N̄e kwoj jutak kōn katak ko an Jisōs Kraist, E ej jutak ippam̧. Jisōs Kraist ej am̧ kajoor! Ro jet remaron̄ jab errā kōn tōmak ko am̧, bōtaap renaaj kile peram im m̧ool. Jekdo̧o̧n n̄e rej ak rejjab ļoore waanjon̄ak ko am̧, naan in kam̧ool ko am̧, lōke, im tōmak ilo Kraist enaaj eddōkļo̧k.

Kajjitōk im Uwaak ko

Ewōr ke bōd n̄e ej wōr ippād kajjitōk ko kōn Kabun̄ in? Elmen aō maron̄ lo uwaak ko? Kajjitōk ko ad ejjab kōkaļļe in m̧ōjņo̧ ak ejjelo̧k tōmak. Ilo m̧ool, kajjitōk kajjitōk ko remaron̄ jipan̄ kalōk tōmak. Jepļaaktok eo an gospel in ekar jino ke 14 iiō Josep Smith ekar kajiitōk kajjitōk ko kōn tōmak. Kappukot uwaak ko ilo jeje ko rekwojarjar, ilo naan ko an rikanaan ro an Anij, jān ritōl ro am̧ im ro uwaan baamle eo am̧ retiljek, im jān Anij Make. Eļan̄n̄e uwaak ko rejjab kajju itok, lōke bwe kwonaaj ekkatak ļain ioon ļain. Wōnm̧aanļo̧k im mour kōn ta eo em̧ōj am̧ jeļā kadede, im wōnm̧aanļo̧k n̄an kappukot m̧ool.

Elmen aō jutak kōn m̧ool eo ilo aō jab kainepataik ro eoktak tōmak ko aer? Jinoe ilo am̧ lukkuun lale bwe naan ko am̧ im m̧akūtkūt ko am̧ rej im̧we jān iakwe eo an Anij im ajri ro Nejin. Kwaļo̧k kōn gospel ejjab aikuj kōm̧m̧an jān jetōb in akweel ak kōn alikkar, kijenmej, im jouj. Jemaron̄ kwaļo̧k iakwe n̄an ro jet, men̄e kwojjab errā kōn ta ko rej tōmaki. Kwon juon waanjon̄o̧k em̧m̧an an juon rikaļoor an Jisōs Kraist kōn wāween am̧ mour.

Lale Matu 5:14–16 (kōm̧m̧an bwe am̧ meram en romaak); Jon 14:6 (Jisōs ej m̧ool eo); 1 Piter 3:15 (kwon pojak iien otemjej n̄an kwaļo̧k am̧ kōjatdikdik ilo Krasit); Katak im Bujen Ko 88:77–80 (men ko Irooj ej kōņaan bwe jen katak); 88:118 (kappukot jān bok ko rem̧m̧antata naan ko in mālōtlōt); 93:36 (aiboojoj eo an Anij ej jeļāļo̧kjeņ); 124:15 (m̧ool ej meļeļe in iakwe ta eo ejim̧we); 130:18 (mālōtlōt eo ad naaj walōn̄ļo̧k ippād n̄e jej jerkakpeje).

Kajjitōk ko an Peba in Mālim Deļo̧n̄e Tampeļ

Kwoj ke kajjieon̄ n̄an m̧ool ilo aolep kōm̧man ko am̧?
Kwoj ke rie ak kōketak jabdewōt katak ko, iminene ko, ak katak rej jum̧ae ko an Kabun̄ eo an Jisōs Kraist im Armej ro Rekwojarjar ilo Raan-ko Āliktata?