7.
Kain̄i ko im bujen ko rej lewaj n̄an eok būk kōjeraam̧m̧an ko an Anij
Jemam̧ Ilan̄ ej kijooror in katakin im kōjeraam̧m̧an eok. Juon wāween E ej kōm̧m̧ane menin ej kōn kain̄i ko āinwōt peptaij, kapene, im kwojkwoj eo. Kōn kain̄i ko āinwōt kein, jej kōm̧m̧ane juon bujen, ak kallim̧ur, ippān Anij. Kōjparok bujen ko ej kōļapļo̧k kajoor eo an Anij ilo mour eo am̧ im ej jipan̄ eok m̧aanjabpopo n̄an mour indeeo. Menin ej etke kain̄i ko im bujen ko rej aorōk n̄an kōj—kōnke rej kōkajoorļo̧k ekkejel eo ad n̄an Jemādwōj Ilan̄ im ad Rilo̧mo̧o̧r im jipan̄ kōj eromļo̧k āinwōt Er.
M̧ool ko Ejjeļo̧k Jem̧ļo̧kier
Kain̄i ko rej jitōn̄ļo̧k eok n̄an Jisōs Kraist. Juon bujen ej juon iien ekwojarjar kōn meļeļe in kakōļļe ko me rej katakin kōn Jisōs Kraist. Kwojkwoj eo, n̄an waanjon̄o̧k, ejjab baj pilawe im dān. Ej kakeememej kōj kōn Rilo̧mo̧o̧r eo.
Bujen ko rej juon kakōļļe kōn iakwe eo, lōke eo, im kōtmene ko an Anij. Rej bōk jemjerā eo am̧ ippān Anij n̄an juon dettan eo em̧wilaļļo̧k. Kōm̧m̧ane juon bujen ej kwaļo̧k bwe kwoj iakwe Anij im kwoj wujlepļo̧k n̄an E. Kwomaron̄ lōke E, im E emaron̄ lōke eok. Kōn kallim̧ur jab eo em̧wilaļļo̧k ej itok eļapļo̧k maron̄ n̄an kajoor eo An im jipan̄ ilo am̧ kōjparok bujen ko am̧.
Kwoj kōm̧m̧ani bujen ko ippān Anij n̄e kwoj peptaij im kapene im n̄e kwoj bōk m̧ōttan kwojkwoj eo. N̄e kwoj peptaij, kwoj kallim̧ur n̄an bōk ioom̧ make etan Jisōs Kraist, jerbal n̄an E, im kōjparok kien ko An ilo aolepān mour eo am̧. Ilo iien kwojkwoj eo, kwoj barāinwōt kallim̧ur n̄an iien otemjej keememej E. Erkein kallim̧ur ko am̧. Ilo am̧ m̧ōņōņō in kōjparok er, Anij ej kallim̧ur n̄an lewaj n̄an eok Jetōb Kwojarjar eo āinwōt juon m̧ōttam̧ aolep iien.
Kūr ko
Kōm̧m̧an n̄an kwojkwoj eo āinwōt juon menin letok ekwojarjar. Kwaļo̧k kallim̧ur eo am̧ n̄an Jisōs Kraist kōn m̧aanjabpopo n̄an juon en̄jake ekwojarjar ilo iien kwojkwoj eo. Kejekļo̧kjeņ kōn ta eo kwomaron̄ kōm̧m̧ane bwe kain̄i in en juon men aorōk ilo jetōb an wiik eo am̧.
Pukot Rilo̧mo̧o̧r eo ilo kain̄i ko. N̄e kwoj lale ak bōk kuņaan ilo juon kain̄i kajitikn eok make, “Ta eo ij katak jān menin kōn Jisōs Kraist” ak “Ekōjkan an kepaakļo̧k eō n̄an E?” Kanooj leļo̧k am̧ n̄an ta eo Jetōb eo ej katakin eok.
Kōm̧m̧an bwe bujen ko am̧ rej tōl jerbal ko am̧. N̄e ewōr am̧ juon kāālet n̄an kōm̧m̧ane, keememej bujen jemjerā eo am̧ ippān Anij. Kwon m̧ool n̄an E. Kajitikin eokmake: Menin ej ke jokkun wōt ke ippān bujen ko aō? N̄an waanjon̄o̧k, ij ke iakwe jerbal in karejar n̄an ro jet, kaenōm̧m̧an armej ro rej aikuj kaenōm̧m̧an, im jutak āinwōt juon rikam̧ool an Kraist—aolep jikin im iien otemjej?
Kōjeraam̧m̧an ko kar Kallim̧ur kaki.
Kwomaron̄ bōk kajoor eo n̄an anjo̧ ioon kapo, jerawiwi, im mālijjon̄ ko an mour. Kōm̧m̧an im kōjparok bujen ko ej lewaj n̄an eok maron̄ n̄an kajoor eo an Anij. Kōn kajoor jab in, kwomaron̄ jelm̧ae jabdewōt men kōn lōke. Jisōs Kraist ej am̧ kajoor!
Kwomaron̄ erreo im jeorļo̧k bōd. M̧ōttan kallim̧ur eo an Anij n̄an kwe kōn kōjparok bujen peptaij eo am̧ ej juon jeorļo̧k bōk in jerawiwi ko am̧. Ej meļeļe in bwe ilo am̧ ukweļo̧k im kōjparok kallim̧ur ko ippān Anij, E enaaj jeorļo̧k am̧ bōd im eddōkļo̧k.
Kwomaron̄ bōk Jetōb Kwojarjar eo ippam̧ iien otemjej. Bar juon kallim̧ur ej ekkejel n̄an peptaij im kwokwoj eo ej jemjerā eo aolep iien an Jetōb eo An im jerbal in karejar eo an enjeļ ro. Kwojjab aikuj in jelm̧ae apan̄ ko am̧ makeļo̧k. Anij eban kōjerwawaik ajri in bujen ro Nejin—kwomaron̄ pedped ioon men jab in.
Kwomaron̄ bōk rejtake eo an armej in bujen ro an Anij. Kwoj uwaan juon jukjuk in pād an armej in bujen ro ilo Kabun̄ eo an Rilo̧mo̧o̧r. Kwoj ļōn̄aj im kōketak doon. Kwoj būrom̧ōj ippān doon im lem̧ōņōņō ippān doon. Kom̧ij ineek eddo ko an doon. Baam̧le eo am̧, bisop eo, ritōl ro, im membōr ro jet an Kabun̄ in rej pād n̄an jipan̄ eok, im kwomaron̄ jipan̄ er.
Kajjitōk ko im Uwaak ko
Imaron̄ ke erom juon rikaļoor em̧m̧an an Jisōs Kraist ilo ejjeļo̧k kain̄i ko im bujen ko? Elōn̄ armej ro rem̧m̧an me rej m̧ool in ļoor Jisōs Kraist, em̧ool jekdo̧o̧n n̄e rejjan̄in kar peptaij ak pād ilo tampeļ. Mekarta, Jemādwōj Ilan̄ ej kōņaan bwe aolep ajri ro Nejin ren bōk kain̄i ko An im kōm̧m̧ani bujen ko Ippān bwe ren maron̄ bōk eļapļo̧k An jipan̄, tūriam̧o, im kajoor. Ej juon iaan wūn ko reļļap Jisōs Kraist ekar kōjepļaaktok Kabun̄ eo An! Aolep ajri ro nejin Anij naaj wōr aer iien em̧m̧an—ilo mour in ak eo tok juon—n̄an bōk kain̄i ko im bujen ko remenin aikuj n̄an mour indeeo.
Ikar jan̄in aolep iien tiljek n̄an bujen ko aō. Ewōr ke kōjatdikdik n̄an n̄a? Aaet! Gospel eo an Jisōs Kraist ej juon gospel in kōjātdikdik im ijjino ko rekāāl! En̄in ej etke jej bōk kwojkwoj eo kajjojo wiik. Jemādwōj Ilan̄ ekar jeļā bwe jenaaj kar kōm̧m̧ani bōd ko im aikuj juon ijjino kāāl. Rilo̧mo̧o̧r eo ekar leļo̧k An mour n̄an lewaj n̄an eok juon iaļ in ro̧o̧lļo̧k. Ilo am̧ kōjerbal tōmak ilo Jisōs Kraist im ukweļo̧k, kwomaron̄ bar bōk maron̄ eo n̄an kajoor eo an Anij.
Lale 1 Korint 11:23–26 (bōk kwojkwoj eo ej kwaļok bwe jej tōmak ilo Jisōs Kraist im Pinmuur eo An); Mosaia 18:10, 13 (bujen peptaij eo); Katak im Bujen Ko 13 (Priesthood eo an Aron ekitbuuj ki ko an ukweļo̧k, peptaij, im kōjeraam̧m̧an ko an enjeļ ro); 20:37 (men ko aikuji n̄an peptaij); 20:77, 79 (jar ko an kwojkwoj eo).
Kajjitōk ko an Peba in Mālim Deļo̧n̄e Tampeļ
-
Kwoj ke kajjieon̄ n̄an kōjparok kwojarjar eo an raan in Jabōt, jim̧or ilo m̧weo im m̧ōn jar eo; pād ilo kweilo̧k ko am̧; m̧aanjabpopo n̄an im bōk kwojkwoj eo ilo erreo; im mour mour eo am̧ ilo jokkun wōt ippān kakien ko im kien ko an gospel eo?