Kōm̧m̧ani kāālet ko reim̧we

Ilo N̄an Kōkajoorļo̧k Jodikdik ro, kwonaaj loe katakin ko an Jisōs Kraist im rikanaan ro An. Ippān m̧ool kein āinwōt am̧ kein tōl, kwomaron̄ kōm̧m̧ani kālet ko reim̧we me renaaj kōjeram̧m̧an kwe kiiō im indeeo.

Kwoj juon jetōb nejin Anij ejitōnbōro. Karōk in m̧ōņōņō eo An eļap ej kōm̧m̧an maron̄ n̄an kwe n̄an eddōkļo̧k ilo jetōb im kōlapļo̧k un eo am̧ ekwojarjar. E ekar jilkintok Jisōs Kraist n̄an erom am̧ Rilo̧mo̧o̧r,

Jem̧ōm ilo Lan̄ ej lōke kwe. Em̧ōj an lewaj n̄an eok eļap kōjeram̧m̧an, ekoba tarlep in gospel eo im kain̄i im bujen ko rekwojarjar eo ej kapen kwe n̄an E im boktok kajoor eo An n̄an mour eo am̧. Ippān bujen kein ej itok lan̄lōn̄ eo kobaiktok im eddo eo. E ejeļā ke kwomaron̄ kōm̧m̧ane juon oktak ilo laļ in, menin aikuj, ilo elōn̄ wāween ko, oktak jān laļ in. Kappukōt tōl eo an Jemedwōj Ilan̄ ilo am̧ kōm̧m̧ani kālet ko. Enaaj kōjeram̧m̧an kwe kōn im̧we kōn Jetōb Kwojarjar.

Jisōs Kraist ej iaļ eo n̄an m̧ōņōņō indeeo. Ilo am̧ kōjerbale anemkwoj eo am̧ n̄an ļoore Jisōs Kraist, kwoj pād ilo iaļ eo ej tōl n̄an m̧ōņōņō indeeo. Kōm̧m̧an bwe Jisōs Kraist en am̧ waanjon̄o̧k, am̧ pedped in dekā eo epen. Kalōk mour eo am̧ ilo katak ko An, im jon̄e kālet ko am̧ kaki. Bujen ko kwoj kōm̧m̧ane ilo iien peptaij, ilo iien kwojkwoj eo, im ilo tampeļ rej dekā in ekkal ko an pedped eo am̧ epen ilo Kraist. Kwonaaj baj wōt jelm̧ae apan̄ ko im kapo ko, ak Jemedwōj Ilan̄ im Rilo̧mo̧o̧r renaaj jipan̄ kwe ilo aolepeer.

Un eo an N̄an Kōkajoorļo̧k Jodikdik ro ejjab n̄an lewaj n̄an kwe juon “aaet” ak “jaab” kōn aolep kāālet ko kwomaron̄ jelm̧ae. Ijello̧kin, Irooj ej karuwaineneik eok n̄an mour ilo juon wāween eutiejļo̧k im ekwojarjarļo̧k—juon mour eo pepded ioon m̧ool ko indeeo im kōjeraam̧m̧an ko kar kallim̧ur kaki an Irooj. En̄in ej iaļ eo An. Unin Tōl in enaaj jipan̄ kwe kōn wāween eo An. Ej kōmeļeļeik m̧ool ko em̧ōj An kwaļo̧ki. Kōm̧m̧ani m̧ool kein am̧ unin tōl n̄an kōm̧m̧ani kāālet ko—kāālet ko reļlap, āinwōt kōm̧m̧ani bujen ko ilo tampeļ im jerbale juon mijen, barāinwōt kāālet ko raan otemjej, āinwōt ekōjkan kōm̧m̧an n̄an ro jet ak ekōjkan kōjerbal iien eo am̧.

Ilo an ro jet jipan̄ kwe, eddōkļo̧k eo am̧ ilo jetōb ej am̧ make. Ej am̧ eddo. Kōm̧m̧ane ijo em̧m̧an tata kwomaron̄e n̄an eddōkļo̧k kajjojo raan, kōjparok kien ko an Anij im kauteij bujen ko am̧, im jipan̄ ro jet epaakeļo̧k Rilo̧mo̧o̧r.

Lale Mosaia 4:29–30 (wāween ko n̄an jerawiwi ejjeļo̧k oraer, kōn menin jej aikuj lale kōj make); Hilamōn 5:12 (kalōk pedped eo am̧ ioon Kraist); Katak im Bujen Ko 45:57 (bōk Jetōb Kwojarjar eo n̄an am̧ tōl); 25:13 (eddep n̄an bujen ko).