იესო ქრისტეს მოაქვს სიხარული

თქვენ სიხარულისა და ბედნიერებისთვის ხართ შექმნილნი. ეს თქვენი ცხოვრების მიზანია. ეს მამაზეციერის ბედნიერების გეგმის მიზანია. ეს არ ნიშნავს იმას, რომ თქვენ არასოდეს მოიწყენთ ან რთული პერიოდები არ გექნებათ. მაგრამ ეს ნიშნავს, რომ მხსნელს შეუძლია დაგეხმაროთ რთული პერიოდის დაძლევაში და სიხარულის პოვნაში.

სიხარული არ მოდის თქვენი ვითარებიდან; ის მოდის იესო ქრისტეს მიმდევრობიდან. შესაძლოა მძიმე დღე, მძიმე კვირა ან მძიმე წელი გქონდეთ. მაგრამ სიხარული არ ნიშნავს ცხოვრებაში მწუხარების არ არსებობას. ეს ნიშნავს თქვენს ცხოვრებაში ქრისტეს არსებობას.

მხსნელის სიხარული უფრო დიდი და ხანგრძლივია, ვიდრე ნებისმიერი სხვა რამე. სატანა გაცდუნებთ, ეგოისტური გზებით ან მიწიერ სიამოვნებაში ეძიოთ სიხარული და კმაყოფილება. ვერაფერი, რაც იესო ქრისტესა და მის მცნებებს ეწინააღმდეგება, ვერ მოგიტანთ ჭეშმარიტ, ხანგრძლივ სიხარულსა და ბედნიერებას. გახსოვდეთ, რომ ყოველივე ამაქვეყნიური დროებითია. იესო ქრისტეს სახარება გთავაზობთ ღრმა, წმინდა და მარადიულ სიხარულსა და ბედნიერებას.

აირჩიეთ სიხარული. მიუხედავად იმისა, რომ ამ ცხოვრებაში მწუხარება და გასაჭირი არსებობს, ზეციერმა მამამ სამყარო აღავსო მრავალი ლამაზი, სასარგებლო რამით. ეძიეთ ისინი. ყოველდღიურად ეცადეთ, შეამჩნიოთ მიზეზი სიხარულისთვის – იქნებ ჩაიწეროთ კიდევაც ეს მიზეზები. ეს თქვენი მოსიყვარულე ზეციერი მამის საჩუქრებია.

მიანიჭეთ სხვებს სიხარული და ბედნიერება. იესო ქრისტემ სიხარულის სისავსე იპოვა ჩვენთვის სიხარულის მინიჭებისას. შეგიძლიათ მიბაძოთ მის მაგალითს და სხვების მსახურებაში იპოვოთ სიხარული. დაეხმარეთ ვინმეს, იგრძნოს სიყვარული. უთხარით გულწრფელი ქათინაური. გაამხნევეთ გასაჭირში მყოფი ადამიანი. თუ იგრძნობთ, რომ სიხარული გაკლიათ, ეცადეთ ვინმეს მოჰგვაროთ სიხარული.

სიხარულით ეცით თაყვანი უფალს. როცა ეკლესიაში მიდიხართ, მთელი ყურადღება გადაიტანეთ იმ სიხარულზე, რომელსაც იესო ქრისტე გიბოძებთ; აქეთ და ადიდეთ იგი ამისთვის. შეიტანეთ თქვენი წვლილი და შემატეთ საეკლესიო შეხვედრებს სიხარული. გახადეთ სასულიერო მუსიკა სახლში და ეკლესიაში ღვთის თაყვანისცემის ნაწილი.

შეგიძლიათ იგრძნოთ სიხარული მაშინაც კი, როცა ცხოვრება რთულია. შეიძლება ფიქრობდეთ, თუ როგორ არის ეს შესაძლებელი, მაგრამ ეს ჭეშმარიტებაა. თქვენი რწმენა იესო ქრისტეში, მისი განკურნების ძალა და მარადიული დაპირებები მუდმივი სიხარულის წყაროდ შეიძლება იქცეს. მისი სიხარული მწუხარებას გადაფარავს და ისეთ სიმშვიდეს მოგგვრის, რომელიც ყოველგვარ წვდომას აღემატება.

ღვთის ცელესტიალურ სასუფეველში სიხარულის სისრულე გელით. იესო ქრისტემ სძლია ყოველივეს, რასაც მარადიული სიხარულის მიღებაში შეეძლო თქვენთვის ხელის შეშლა. როცა უფალს ენდობით და მას მისდევთ, ეს სიხარული თქვენი იქნება.