წეს-ჩვეულებები და აღთქმები გაძლევთ წვდომას ღვთის კურთხევებზე

წეს-ჩვეულებები მიგითითებენ იესო ქრისტეზე. წეს-ჩვეულება არის სიმბოლური მნიშვნელობის მქონე წმინდა ცერემონიალი, რომელიც იესო ქრისტეს შესახებ გვასწავლის. მაგალითად, ზიარება მხოლოდ პური და წყალი არ არის. ის მხსნელის შესახებ გვახსნებეს.

აღთქმები არის ღვთის სიყვარულის, ნდობისა და მოლოდინების ნიშანი. მათ თქვენი ღმერთთან ურთიერთობა უფრო ღრმა დონეზე გადაჰყავს. აღთქმის დადებით თქვენ აჩვენებთ, რომ გიყვართ ღმერთი და მის წინაშე ვალდებულება გაქვთ აღებული. თქვენ შეგიძლიათ ენდოთ მას, ის კი თქვენ გენდობათ. ასეთი ღრმა ვალდებულებით მოდის მის ძალაზე უფრო დიდი წვდომა და დახმარება, თუკი თქვენს აღთქმებს იცავთ.

თქვენ დებთ აღთქმას ღმერთთან, როცა ინათლებით და როცა ზიარებას იღებთ. ნათლობისას თქვენ დებთ, რომ მზად ხართ საკუთარ თავზე აიღოთ ქრისტეს სახელი, ემსახუროთ მას, და დაიცვათ მისი მცნებები მთელი ცხოვრების განმავლობაში. ზიარების დროს თქვენ ასევე ჰპირდებით, რომ ყოველთვის გეხსომებათ უფალი. ეს თქვენი დაპირებებია. როცა მათ მონდომებით იცავთ, ღმერთი გპირდებათ, რომ გიბოძებთ სულიწმინდას მუდმივი თანამგზავრის როლში.

აღიქვით ზიარება, როგორც წმინდა ძღვენი. აჩვენეთ თქვენი ვალდებულება იესო ქრისტეს წინაშე, ზიარების დროს წმინდა გამოცდილებისთვის მომზადებით. დაფიქრდით, რა შეგიძლიათ გააკეთოთ, რათა ეს წეს-ჩვეულება თქვენი მთელი კვირის გამორჩეულ სულიერ გამოცდილებად იქცეს.

ეძიეთ წეს-ჩვეულებებში მხსნელი. როცა უყურებთ წეს-ჩვეულებას ან მონაწილეობას იღებთ მასში, ჰკითხეთ საკუთარ თავს: „რას ვსწალობ აქედან იესო ქრისტეს შესახებ“? ან „როგორ მაახლოებს ეს მასთან“? მიაქციეთ ყურადღება იმას, რას გასწავლით სულიწმინდა.

დაე, თქვენი აღთქმები თქვენს ქმედებებს მიუძღვოდეს წინ. როცა არჩევანის წინაშე აღმოჩნდებით, გაიხსენეთ თქვენი აღთქმისეული ურთიერთობა ღმერთთან. იყავით მისი ერთგული. ჰკითხეთ საკუთარ თავს: შეესაბამება ეს ჩემს აღთქმებს? მაგალითად: მიყვარს სხვა ადამიანები და ვუწევ მათ მზრუნველობას, ვანუგეშებ მათ, ვისაც ნუგეში ესაჭიროება და ვდგავარ ქრისტეს მოწმედ – ყველგან და ყოველთვის?

თქვენ შეგიძლიათ, დაძლიოთ ცდუნება, ცოდვა და ცხოვრების სირთულეები. აღთქმების დადება და დაცვა გაძლევთ წვდომას ღვთის ძალაზე. ამ ძალით, თქვენ შეგიძლიათ დაჯერებულობით შეხვდეთ ნებისმიერ მოვლენას. იესო ქრისტე არის თქვენი ძალა!

თქვენ შეგიძლიათ განიწმინდოთ და მიტევება მიიღოთ. ღმერთის დაპირების ნაწილია ის, რომ ნათლობის აღთქმის ერთგულებისთვის თქვენ ცოდვები მოგეტევებათ. ეს ნიშნავს, რომ თუ მოინანიებთ და ღმერთთან დადებულ დაპირებებს შეასრულებთ, ის მოგიტევებთ და დაგეხმარებათ გაუმჯობესებაში.

თქვენ შეგიძლიათ, ყოველთვის იყოლიოთ თანამგზავრად სულიწმინდა. ნათლობასთან და ზიარებასთან დაკავშირებული მეორე დაპირება არის სულიწმიდის მუდმივი თანხლება და ანგელოზთა მსახურება. არ არის აუცილებელი, ცხოვრებისეული სირთულეები მარტომ გამოიაროთ. ღმერთი არასოდეს მიატოვებს თავისი აღთქმის შვილებს – შეგიძლიათ ამის იმედი გქონდეთ.

თქვენ შეგიძლიათ, ღვთის აღთქმული ხალხის მხარდაჭერა მიიღოთ. თქვენ მხსნელის ეკლესიის აღთქმული ხალხის თემს ეკუთვნით. თქვენ ერთმანეთს ამაღლებთ და ამხნევებთ. თქვენ ერთად გლოვობთ და ხარობთ. თქვენ ერთმანეთის ტვირთს ზიდავთ. თქვენი ოჯახი, ეპისკოპოსი, ხელმძღვანელები და ეკლესიის სხვა წევრები მზად არიან, დაგეხმარონ და თქვენ შეგიძლიათ, დაეხმაროთ მათ.