თქვენი სხეული წმინდაა

თქვენი სხეული ღმერთის ხატად არის შექმნილი – სამყაროში ყველაზე დიდებული, საოცარი არსებისა. წმინდა წერილი ჩვენს სხეულს ადარებს წმინდა ტაძარს – ადგილს, სადაც სულიწმინდა სუფევს. რა თქმა უნდა, თქვენი სხეული ახლა არ არის სრულყოფილი. მაგრამ ის გამოცდილება, რომელსაც ამ სხეულში ყოფნისას იძენთ, დაგეხმარებათ, ერთ დღეს მიიღოთ სრულყოფილი, აღმდგარი, დიდებული სხეული.

თქვენი სამშვინველი სხეულისა და სულისგან შედგება. ამის გამო ფიზიკური და სულიერი ჯანმრთელობა მჭიდროდ არის დაკავშირებული. მხსნელმა გაგვიმხილა სიბრძნის სიტყვა, სხეულზე ზრუნვის პრინციპების სწავლებისა და ფიზიკური და სულიერი დალოცვების დაპირების მიზნით.

სექსუალური გრძნობები ღვთის გეგმის მნიშვნელოვანი ნაწილია ბედნიერი ქორწინებისა და მარადიული ოჯახების შექმნისთვის. ეს გრძნობები არ არის ცოდვა – ისინი წმინდაა. იმის გამო, რომ სექსუალური გრძნობები ასეთი წმინდა და ძლიერია, ღმერთმა მოგცათ უბიწოების კანონი, რათა მოგამზადოთ იმისთვის, რომ ეს გრძნობები მისი ჩანაფიქრის მიხედვით გამოიყენოთ უბიწოების კანონი აცხადებს, რომ ღმერთის თვალში გამართლებულია, სქესობრივი ურთიერთობა მხოლოდ ერთმანეთზე დაქორწინებულ ქალსა და მამაკაცს შორის. მრავალი ადამიანი უგულებელყოფს ან სასაცილოდაც კი იგდებს ღვთის კანონს, მაგრამ უფალი გვიწვევს, ვიყოთ მისი მოწაფენი და უფრო მაღალი სტანდარტით ვიცხოვროთ.

პატივისცემით მოეპყარით თქვენს სხეულს — და სხვების სხეულებს. როდესაც ტანსაცმელთან, ვარცხნილობასთან და გარეგნობასთან დაკავშირებით გადაწყვეტილებებს იღებთ, ჰკითხეთ საკუთარ თავს: „პატივს ვცემ თუ არა ჩემს სხეულს, როგორც ღვთისგან ბოძებულ წმინდა საჩუქარს?“ მამაზეციერს სურს, ერთმანეთს ვხედავდეთ ისეთებად, როგორებიც სინამდვილეში ვართ – არა უბრალოდ ფიზიკურ სხეულებად, არამედ მის საყვარელ შვილებად, ღვთიური დანიშნულებით. თავი აარიდეთ ისეთ სტილს, რომელიც ხაზს უსვამს ან არასათანადო ყურადღებას იპყრობს თქვენი ფიზიკური სხეულისადმი ნაცვლად იმისა, რომ ხართ ღვთის შვილი მარადიული დანიშნულებით. დაე, სიწმინდე და ღმერთისადმი სიყვარული წინ უძღვოდეს თქვენს არჩევანს. ეძიეთ რჩევა თქვენი ოჯახის წევრებისგან.

გააკეთეთ ის, რაც გააძლიერებს თქვენს სხეულს და არა ის, რაც დააზიანებს ან ავნებს მას. მადლიერებით დატკბით უამრავი სიკეთით, რომელიც ღმერთმა გიბოძათ. გახსოვდეთ: ალკოჰოლი, თამბაქო, ჩაი, ყავა და სხვა მავნე ნარკოტიკები და ნივთიერებები არ არის კარგი თქვენი სხეულისთვის ან სულისთვის. სასარგებლო ნივთიერებებიც კი, როგორიცაა რეცეპტით გაცემული მედიკამენტები, შეიძლება დამანგრეველი იყოს, თუ სწორად არ გამოიყენება.

სქესობრივი აქტი და სექსუალური გრძნობები წმინდად შეინარჩუნეთ. ეს არ არის ხუმრობის ან გართობის საგანი. ერთ ქალსა და ერთ მამაკაცს შორის ქორწინების მიღმა, არასწორია სხვა ადამიანის სხეულის ინტიმურ, წმინდა ადგილებზე შეხება, თუნდაც ჩაცმულ მდგომარეობაში. როდესაც ირჩევთ, რა აკეთოთ, რას უყუროთ, რა წაიკითხოთ, რას უსმინოთ, რაზე იფიქროთ, რა დაპოსტოთ ან მესიჯად გააგზავნოთ, მოერიდეთ ყველაფერს, რაც განზრახ იწვევს ვნების აღძვრას სხვებში ან თქვენში. ეს მოიცავს ნებისმიერი სახის პორნოგრაფიას. თუ აღმოაჩენთ, რომ რომელიმე სიტუაცია ან ღონისძიება უფრო გაცდუნებთ, თავი აარიდეთ მას. თქვენ იცით, რა სიტუაციებზე და ღონისძიებებზეა საუბარი. და თუ არ ხართ დარწმუნებული, სულიწმინდა, თქვენი ოჯახი და ხელმძღვანელები დაგეხმარებიან, გაიგოთ ეს. აჩვენეთ თქვენს ზეციერ მამას, რომ პატივს სცემთ სიცოცხლის შექმნის წმინდა ძალას.

თქვენი პატივისცემა საკუთარი თავისა და სხვებისადმი გაიზრდება, თუკი თქვენს სხეულს პატივს სცემთ თქვენი ქცევით, გარეგნობითა და ჩაცმულობით.

უფალი დაჰპირდა ცოდნის დიდი განძი მათ, ვინც სიბრძნის სიტყვას იცავს. მავნე ჩვევებისგან თავისუფალი ჯანმრთელი სხეული ასევე ზრდის პირადი გამოცხადების მიღების, საღად აზროვნებისა და უფლის მსახურების უნარს.

უბიწოების კანონით ცხოვრებას ღვთის მოწონება და პირადი სულიერი ძალა მოაქვს. ის გიცავთ თქვენ და თქვენს მომავალ ოჯახს. როცა დაქორწინდებით, ეს კანონი თქვენს ქორწინებაში შემოიტანს მეტ სიყვარულს, ნდობასა და ერთობას. ამ კანონის მორჩილება შესაძლებელს გახდის თქვენთვის მარადიულ წინსვლას და უფრო დაგამსგავსებთ მამაზეციერს. თქვენი თავდაჯერება მოიმატებს, როცა იესო ქრისტეს მოწაფის როლში იცხოვრებთ.