თქვენ შეგიძლიათ თქვენი წვლილი შეიტანოთ ღვთის საქმეში

ღვთის საქმე და დიდებაა თქვენი მარადიული სიცოცხლისა და უკვდავების უზრუნველყოფა. უკვდავება ნიშნავს მარადიულ ცხოვრებას აღმდგარ სხეულში. მარადიული სიცოცხლე ანუ ამაღლება ნიშნავს დაემსგავსო ღმერთს და მასთან ერთად მარადიულად იცხოვრო, როგორც ოჯახი. ეს ყველაფერი შესაძლებელია იესო ქრისტესა და მისი გამოსყიდვის წყალობით. თქვენ შეგიძლიათ ენდოთ მას.

შეგიძლიათ თქვენი წვლილი შეიტანოთ ღვთის საქმეში ქრისტესთან მოსვლით და სხვების მასთან მიყვანით. ყოველ ჯერზე, როცა ვინმეს ეხმარებით, გახდეს ქრისტეს მიმდევარი, თქვენ ღვთის საქმის შესრულებაში შეგაქვთ წვლილი.

იცხოვრეთ სახარების მიხედვით. გაზარდეთ თქვენი რწმენა იესო ქრისტეში. ყოველდღიურად მოინანიეთ. მიიღეთ ღვთის მღვდლობის წეს-ჩვეულებები და დაიცავით თქვენი აღთქმები. ცხოვრების ბოლომდე მიჰყევით ამ ნიმუშს.

იზრუნეთ გასაჭირში მყოფებზე. იპოვეთ სხვებისთვის მსახურებისა და მათზე ზრუნვის გზები, მათ შორის თქვენს ოჯახზე, მეგობრებზე და თემზე. გასაჭირში მყოფი ადამიანების დახმარების ერთ-ერთი გზაა მარხვის კანონის დაცვა და მარხვის შემოწირულობის გაღება.

მოიწვიეთ ყველა, მიიღონ სახარება. თქვენი სიტყვები და ქმედებები იესო ქრისტეში რწმენას უნდა გამოხატავდეს. მზად იყავით მოუყვეთ ყველას, ვინც გეკითხებათ, იმ იმედისა და ბედნიერების შესახებ, რომელსაც გრძნობთ, როგორც მისი მოწაფე. ახალგაზრდა მამაკაცებისთვის სრული დროის მისიაში მსახურება სამღვდელოების პასუხისმგებლობაა. ახალგაზრდა ქალებისთვის ეს არის დიდი შესაძლებლობა; ილოცეთ, რათა გაიგოთ, სურს თუ არა უფალს თქვენი მსახურება. მზად იყავით, მთელი ცხოვრების მანძილზე გააზიაროთ სახარება.

ოჯახური ისტორიისა და სატაძრო სამუშაოს შესრულებით გააერთიანეთ ოჯახები მარადისობისთვის. შეიტყვეთ თქვენი წინაპრების შესახებ. გაიგეთ, ვის სჭირდება სატაძრო წეს-ჩვეულებები. იარეთ ტაძარში რაც შეიძლება ხშირად, რათა მათთვის მოინათლოთ და წევრად დამტკიცდეთ. თუ დახმარება გჭირდებათ, გადადით აქ: FamilySearch.org.

თქვენ გექნებათ ღმერთის დახმარება. მამაზეციერი არ ელის თქვენგან იმას, რომ მარტო შეასრულოთ ეს საქმე. ის თქვენთანაა. როცა თქვენ მორჩილად სთავაზობთ მას თქვენს დროსა და გულს, ის თქვენი მეშვეობით საოცარ საქმეებს განახორციელებს. იესო ქრისტე არის თქვენი ძალა!

თქვენ სიხარულით აღივსებით. ღმერთის საქმე სახალისო საქმეა! მასში მონაწილეობით თქვენ შეგიძლიათ იგრძნოთ სიხარული, რომელსაც იგი გრძნობს. წარმოიდგინეთ სიხარული, რომელსაც მამაზეციერს და მის შვილებს გაუზიარებთ, რომლებიც მასთან მიიყვანეთ!