ჭეშმარიტება გაგათავისუფლებთ

ზეციურ მამას სურს, რომ მისი ძენი და ასულნი ყოველთვის სწავლობდნენ. თქვენ გაქვთ როგორც მიწიერი, ისე სულიერი მიზეზები იმისთვის, რომ ეძიოთ და გიყვარდეთ სწავლა. განათლება მხოლოდ ფულის შოვნას არ ეხება. ეს არის თქვენი მარადიული მიზნის ნაწილი – უფრო მეტად დაემსგავსოთ მამაზეციერს.

პატიოსნად ცხოვრება ნიშნავს, რომ თქვენ გიყვართ ის, რაც ღმერთის თვალში არის მართალი – პირად კომფორტზე, პოპულარობაზე ან მოხერხებულობაზე მეტად. ეს ნიშნავს აკეთო მართალი საქმე მხოლოდ იმის გამო, რომ ის მართალია.

თქვენ რაღაც ძვირფასი გაქვთ გასაზიარებლად. იესო ქრისტეს სახარება მოიცავს ცხოვრებისეულ კითხვებზე პასუხებს. ეს არის გზა სიმშვიდისა და ბედნიერებისკენ. შესაძლოა თქვენ ყველაფერი არ იცოდეთ, მაგრამ საკმარისი იცით იმისთვის, რომ გიყვარდეთ მოყვასი, გაუზიაროთ მას ჭეშმარიტი პრინციპები და მოიწვიოთ ისინი, შეიტყონ მეტი.

ყოველთვის ისწავლეთ. ეძიეთ თქვენი გონებისა და უნარების განვითარების შესაძლებლობები. ეს შესაძლებლობები შეიძლება მოიცავდეს როგორც ოფიციალურ განათლებას სკოლაში ან ხელობის შესწავლას, აგრეთვე არაოფიციალურ სწავლას თქვენთვის სანდო წყაროდან. ჩართეთ თქვენს მცდელობებში უფალი და ის წინ გაგიძღვებათ.

ისწავლეთ სულიერი ჭეშმარიტებანი. გარშემო სამყაროს შესწავლისას, ასევე ისწავლეთ მხსნელის შესახებ, რომელმაც სამყარო შექმნა. შეისწავლეთ მისი ცხოვრება და სწავლება. აქციეთ სემინარია, ინსტიტუტი და სახარების პირადი შესწავლა თქვენი ცხოვრების მუდმივ ნაწილად. ეს მოგამზადებთ მისიაში მსახურებისთვის და მთელი ცხოვრების მანძილზე სახარების გაზიარებისთვის.

იცხოვრეთ პატიოსნად. არ მოიპაროთ, არ იცრუოთ, არ იეშმაკოთ და არ მოიტყუოთ – არც სკოლაში, არც სამსახურში და არც ონლაინ. იყავით იესო ქრისტეს ერთგული მიმდევარი საჯაროდ და პირადად.

განათლება ზრდის თქვენს უნარს, ემსახუროთ უფალს, მათ შორის მისიონერის როლში. ეს გაძლევთ სხვების, განსაკუთრებით კი თქვენი ოჯახის წევრების, დალოცვის ძალას. რაც უფრო მეტს ისწავლით, მით უფრო მეტად შეგეძლებათ ღმერთის სასუფევლის შენებაში დახმარება და სამყაროზე დადებითი გავლენის მოხდენა.

პატიოსნებას მოაქვს სიმშვიდე და საკუთარი თავის მიმართ პატივისცემა. როცა თქვენი სიტყვები და ქმედებები ჭეშმარიტების ფარგლებშია, თქვენ აჩვენებთ, რომ თქვენი ნდობა შეუძლიათ როგორც სხვა ადამიანებს, ისე უფალს.

როცა იესო ქრისტეს სწავლებებს იცავთ, ის თქვენს გვერდითაა. იესო ქრისტე არის თქვენი ძალა! შეიძლება სხვები არ ეთანხებიან თქვენს მრწამსს, მაგრამ თქვენი გამბედაობა და გულწრფელობა შესამჩნევი იქნება. განურჩევლად იმისა, მიბაძავენ თუ არა სხვები თქვენს მაგალითს, თქვენი მოწმობა, დაჯერებულობა და ქრისტეში რწმენა გაიზრდება.