Jesús Kristur færir gleði

Ykkur er ætlað að vera hamingjusöm og glöð. Það er tilgangur lífs ykkar. Það er tilgangur sæluáætlunar himnesks föður. Þetta þýðir ekki að þið munið aldrei verða sorgmædd eða upplifa erfiðleika. En það þýðir að frelsarinn getur hjálpað ykkur að komast í gegnum erfiða tíma og finna gleði.

Gleði hlýst ekki vegna aðstæðna ykkar; hún hlýst af því að fylgja Jesú Kristi. Þið gætuð átt slæman dag, slæma viku eða slæmt ár. En gleði er ekki fjarvera sorgar í lífinu; hún er nærvera Krists í lífi ykkar.

Gleði frelsarans er meiri og varanlegri en nokkuð annað. Satan mun freista ykkar til að leita skemmtunar og fullnægju á eigingjarnan hátt eða frá stundlegum ánægjugjöfum. Allt sem er andstætt Jesú Kristi og boðorðum hans getur ekki fært ykkur sanna, varanlega gleði og hamingju. Hafið í huga að jarðneskir hlutir eru tímabundnir. Fagnaðarerindi Jesú Krists býður gleði og hamingju sem er djúp, heilög og ævarandi.

Veljið gleði. Þótt satt sé að sorg og erfiðleikar séu í þessum heimi, þá hefur himneskur faðir líka fyllt heiminn með mörgum fallegum og heilnæmum hlutum. Leitið þeirra. Reynið að finna ástæður til að gleðjast á hverjum degi – og skrifið þær jafnvel niður. Þetta eru gjafir frá ykkar ástríka föður á himnum.

Færið öðrum gleði og hamingju. Jesús Kristur fann fyllingu gleðinnar í því að færa okkur gleði. Þið getið fylgt fordæmi hans með því að finna gleði og hamingju í þjónustu við aðra. Hjálpið einhverjum að finna fyrir kærleika. Hrósið einhverjum einlæglega. Veitið hvatningu einhverjum sem á erfitt. Ef ykkur líður einhvern tíma eins og þið þurfið aukna gleði í lífinu, reynið þá að færa öðrum gleði.

Gleðjist í því að tilbiðja Drottin. Þegar þið farið í kirkju, einblínið þá á gleðina sem Jesús Kristur veitir ykkur og lofið hann fyrir það! Leggið ykkar af mörkum til að gleðilegur andi ríki á kirkjusamkomum ykkar. Gerið helga tónlist að hluta af tilbeiðslu ykkar heima og í kirkju.

Þið getið fundið gleði, jafnvel þegar lífið er erfitt. Þið gætuð velt fyrir ykkur hvernig það er mögulegt, en það er satt. Trú ykkar á Jesú Krist, græðandi máttur hans og eilíf fyrirheit hans geta veitt ykkur stöðuga gleði. Gleði hans yfirskyggir sorgina og færir frið sem er æðri öllum skilningi.

Fylling gleðinnar bíður ykkar í himneska ríki Guðs. Jesús Kristur sigraðist á öllu sem gæti komið í veg fyrir að þið öðluðust eilífa gleði. Ef þið treystið honum og fylgið honum, mun þessi gleði verða ykkar.