Þið eruð blessuð með lyklum og valdi prestdæmisins

Allir lyklar og valdsumboð prestdæmisins koma frá Jesú Kristi. Sérhver prestdæmishafi getur rakið valdsumboð sitt til hans. Frelsarinn ákvarðar hver hlýtur þetta valdsumboð og hverjir fá prestdæmislykla. Við treystum fullkominni þekkingu hans.

Jesús Kristur hefur endurreist prestdæmi sitt á okkar tíma. Hann leiðbeinir hvernig prestdæmið skal notað. Adam, Móse, Pétur og margir aðrir spámenn í gegnum söguna hlutu prestdæmislykla. Á okkar tíma, hlaut Joseph Smith prestdæmislykla frá Jóhannesi skírara, Pétri, Móse, Elíasi, Elía og fleirum. Meðlimir Æðsta forsætisráðsins og Tólfpostulasveitarinnar hafa alla prestdæmislykla á jörðu á okkar tíma. Staðarprestdæmisleiðtogar og sveitarforsetar hafa líka prestdæmislykla fyrir kallanir sínar. Prestdæmislyklar stjórna verki Guðs. Þeir heimila og gefa körlum og konum vald til að aðstoða við verkið.

Prestdæmisvald blessar öll börn Guðs. Þar sem prestdæmið var endurreist, getið þið meðtekið helgiathafnir og gert sáttmála við Guð. Þið getið starfað í nafni Guðs þegar þið hljótið verkefni eða köllun frá einhverjum sem hefur valdsumboð.

Takið á móti kirkjuköllunum og þjónið trúfastlega. Þegar þið hljótið kirkjuköllun eruð þið sett í embætti með valdsumboði frá Guði til að þjóna í því hlutverki. Þið getið líka hlotið leiðsögn frá Guði varðandi þjónustu ykkar. Þegar þið þjónið eruð þið fulltrúar Jesú Krists. Leggið ykkar besta af mörkum.

Styðjið þá sem Guð hefur kallað til að þjóna. Að styðja þýðir meira en bara að rétta upp hönd þegar nafn er lesið upp á kirkjusamkomu. Það merkir að styðja og hjálpa. Leitið leiða til að sýna að þið styðjið það fólk sem Jesús Kristur hefur kallað til að þjóna í kirkju sinni.

Sinnið verkefnum frá kirkjuleiðtogum ykkar – þar á meðal frá sveitar- eða bekkjarforsætisráði ykkar. Þeir hafa valdsumboð frá Guði, sem þeir fela ykkur fyrir það verkefni. Þið gætuð fengið það verkefni að þjóna einhverjum, bjóða fólk velkomið þegar það kemur á sakramentissamkomu eða hjálpa við viðburð. Hvert sem verkefnið er, lítið þá á það sem tækifæri til að verða lærisveinn Jesú Krists og þjóna börnum Guðs.

Þið getið treyst því að helgiathafnirnar sem þið takið á móti séu heimilaðar af Jesú Kristi. Þetta er eitt af því sem gerir kirkju Jesú Krists einstaka. Kraftur Guðs opinberast í helgiathöfnum prestdæmisins.

Þið munið verða verkfæri í höndum Guðs. Þegar þið þjónið Drottni með hans heimild og undir leiðsögn þjóna hans sem hafa prestdæmislykla, mun hann hjálpa ykkur að vita hvernig þjóna skal öðrum í verki hans. Jesús Kristur er styrkur ykkar. Þjónusta ykkar mun hjálpa ykkur að komast nær honum og færa ykkur gleði.