Áætlun Guðs er fyrir ykkur

Himneskur faðir er höfundur áætlunarinnar. Hann er faðir anda ykkar og hann elskar ykkur. Hann þráir að veita ykkur æðstu blessun sína – eilíft líf með sér. Með öðrum orðum, hann vill að þið verðið líkari honum og lifið því gleðiríka, dýrðlega lífi sem hann lifir. Hann hefur allt vald og veit alla hluti. Þið getið treyst honum, jafnvel þegar lífið er erfitt.

Jesús Kristur gerir áætlunina mögulega. Áður en heimurinn var skapaður, valdi himneskur faðir hann til að vera frelsari ykkar. Jesús Kristur er sá eini sem getur leitt ykkur aftur til föður ykkar á himnum. Þess vegna veljum við að fylgja honum. Allt er háð þessu vali!

Hjónaband og fjölskylda eru nauðsynleg í áætlun Guðs. Þið eruð hluti af fjölskyldu Guðs og öll andabörn hans koma til jarðar í gegnum móður og föður. Guð vill að dætur hans og synir þróist saman í átt að eilífri fullkomnun. Karlar og konur leggja sitt af mörkum til ástríks, sameinaðs hjónabands. Fjölskyldulíf hér á jörðu – jafnvel með öllum sínum ófullkomleika – getur fært mikla gleði. Því er ætlað að búa ykkur undir eilíft líf með Guði.

Hafið eilífa yfirsýn. Hvenær sem þið standið frammi fyrir freistingum, raunum, vonbrigðum eða erfiðum ákvörðunum, minnist þá áætlunar Guðs. Sjáið hvernig hinn eilífi sannleikur sem þið þekkið um áætlun hans getur hjálpað ykkur að líta áskoranir ykkar öðrum augum.

Leitið að hönd Guðs í lífi ykkar. Takið eftir því hvernig Guð blessar ykkur. Það gæti verið góðverk einhvers, friðarstund eða svar við bæn.

Veljið að fylgja áætlun Guðs. Lærið um það sem himneskur faðir vill að þið gerið. Leitið leiðsagnar hans þegar þið rannsakið ritningarnar, orð lifandi spámanna, fjölskylduyfirlýsinguna og patríarkablessun ykkar. Það mun hjálpa ykkur að búa ykkur undir að þjóna Drottni, sem trúboði og alla ævi. Gerið þjónustu við Drottin, eilíft hjónaband og barnauppeldi að forgangsatriði. Leggið ykkar af mörkum til að eiga hamingjusama fjölskyldu núna, með því að fylgja kenningum Jesú Krists.

Þið getið tekist á við raunir lífsins með hugrekki og von í Kristi. Þar sem þið þekkið hina eilífu áætlun Guðs, búið þið yfir dýrmætu verkfæri sem getur hjálpað ykkur á erfiðum tímum. Þið vitið að lífið er miklu meira en það sem gerist á milli fæðingar og dauða. Þið vitið hver þið í raun eruð, hver tilgangur ykkar er og hver þið getið orðið með hjálp frelsarans. Jesús Kristur er styrkur ykkar!

Þið getið hlotið eilíft líf er þið fylgið Jesú Kristi. Hann mun veita ykkur kraft til að verða líkari sér, snúa aftur til himneskra foreldra ykkar og lifa í gleði með ástvinum ykkar að eilífu. Treystið Jesú Kristi.