Sannleikurinn mun gera ykkur frjáls

Himneskur faðir vill að dætur hans og synir séu alltaf að læra. Þið hafið bæði stundlegar og andlegar ástæður til að sækjast eftir og hafa unun af lærdómi. Menntun snýst ekki bara um að afla tekna. Það er hluti af eilífu markmiði ykkar að verða líkari himneskum föður.

Að lifa lífinu af ráðvendni merkir að þið elskið það sem rétt er í augum Guðs – meira en persónuleg þægindi, vinsældir eða hentugleika. Það þýðir að gera það sem er rétt, einfaldlega vegna þess að það er rétt.

Þið hafið einhverju dýrmætu að miðla. Fagnaðarerindi Jesú Krists geymir svörin við spurningum lífsins. Það er vegurinn til friðar og hamingju. Þið vitið ef til vill ekki allt en þið vitið nægilega mikið til að elska náunga ykkar, miðla þeim sönnum reglum og bjóða þeim að læra meira.

Verið alltaf að læra. Leitið tækifæra til að víkka út huga ykkar og færni. Þessi tækifæri geta verið formleg menntun í skóla eða starfsþjálfun, sem og óformlegt nám hjá aðilum sem þið treystið. Hafið Drottin með í viðleitni ykkar og hann mun leiða ykkur.

Lærið andlegan sannleika. Þegar þið lærið um heiminn umhverfis, lærið þá líka um frelsarann sem skapaði heiminn. Lærið um líf hans og kenningar. Gerið trúarskólanám yngri og eldri deilda og persónulegt trúarnám að hluta af ævilöngu námi ykkar. Það getur búið ykkur undir að þjóna í trúboði og miðla fagnaðarerindinu alla ykkar ævi.

Lifið af ráðvendni. Ekki stela, ljúga, svindla eða blekkja á nokkurn hátt – í skólanum, á vinnustaðnum, á netinu, alls staðar. Verið sömu trúföstu fylgjendur Jesú Krists opinberlega og í einrúmi.

Menntun eykur getu ykkar til að þjóna Drottni, þar með talið sem trúboðar. Hún gerir ykkur kleift að blessa aðra, einkum fjölskyldu ykkar. Því meira sem þið lærið, því meira getið þið hjálpað við að byggja upp ríki Guðs og hafa áhrif á heiminn til góðs.

Heiðarleiki færir frið og sjálfsvirðingu. Þegar orð ykkar og gjörðir eru í samræmi við sannleikann, sýnið þið að aðrir og Drottinn geta treyst ykkur.

Þegar þið verjið málstað kenninga Jesú Krists stendur hann með ykkur. Jesús Kristur er styrkur ykkar! Aðrir eru kannski ekki sammála trú ykkar en það verður tekið eftir hugrekki ykkar og einlægni. Hvort sem aðrir fylgi fordæmi ykkar eða ekki, mun vitnisburður ykkar, traust og trú á Jesú Krist vaxa.