Jesus Christ dze enyigye ba

Wo Ɔsor Egya enyi gye Ɔpɛ dɛ ɔwo, Ne ba, nya enyigye ara ibotum enya. Iyi ntsi na Osiesiee enyigye ho nhyehyɛɛ no. Ɔsomaa Ne Ba, Jesus Christ, dɛ Ɔmbɛyɛ w’Agyekwa na Ɔnkyerɛkyerɛ wo N’asɛmpa no. Nsɛmfua asɛmpa asekyerɛ nye “asɛm pa,” na asɛm pa no nye dɛ osian Jesus Christ ntsi, ibotum enya enyigye wɔ abrabɔ yi mu na enyigye ne mãhyɛ afebɔɔ.

Onnyiewiei Nokwar horow

Botae a ɔda hɔ ma wo nye dɛ ibenya dɛwdzi na enyigye. Ɔno nye w’abrabɔ no botae. Ɔyɛ Ɔsor Egya N’enyigye ho nhyehyɛɛ no botae. Iyi nnkyerɛ dɛ nnkedzi awerɛhow dabiarada anaa dɛ nnkenya nkõdzen mber. Mbom ɔkyerɛ dɛ Agyenkwa no botum aboa wo ma edua nkõdzen mber mu na enya enyigye.

Enyigye mmfi wo gyinabew horow mu mmba, ofi ereka Jesus Christ do ba. Bia da no ronnkɔ yie, dapɛn no ronnkɔ yie, anaa afe no ronnkɔ yie mma wo. Mbom enyigye nnyɛ dɛ awerɛhowdzi nnyi w’abrabɔ mu, ɔyɛ Christ a Ɔwɔ w’abrabɔ mu no.

Agyenkwa enyigye no krɔn na otsim kyɛn biribiara. Satan bɔsɔ wɔ ahwɛ dɛ hwehwɛ enyikadze na mee wɔ pɛsɛankonya akwan mu anaa fi wiadze akɔndɔdze mu. Biribiara a ɔnye Jesus Christ na Ne mbrasɛm no bɔ ebira no nnkotum dze nokwar, daapem enyigye na dɛwdzi abrɛ wo. Kaa dɛ wiadze yi do ndzɛmba no yɛ mber tsiabaa dze. Jesus Christ asɛmpa no ma enyigye na dɛwdzi a ɔdɔ bun mu, a ɔyɛ krɔnkrɔn na afebɔɔ.

Nsa To ahorow

San mu yi enyigye. Ɔyɛ nokwar dɛ awerɛhow na nkodzen wɔ wiadze yi mu dze, naaso Ɔsor Egya dze ndzɛmba pii a ɔyɛ fɛw, na odzi mu ahyɛ wiadze yi mu mã. Hwehwɛ iyinom. Bɔ mbɔdzen dɛ ibɛhyɛ siantsir ahorow nsew a ibedzi dɛw dabiara—bi mpom kyerɛw to hɔ. Iyinom yɛ akyɛdze horow a ofi wo Sor Egya dɔfo hɔ.

Fa enyigye na dɛwdzi bra nkaafo. Jesus Christ nyaa enyigye ne mãhyɛ dɛ Ɔdze enyigye abrɛ hɛn. Ibotum edzi Ne fasusu do ber a isom nkaafo dze hwehwɛ enyigye na dɛwdzi. Boa obi ma onya atsenkã dɛ wɔdɔ no. Ma nokwar nkamfo. Hyɛ obi a oridzi aper nkuran. Sɛ enya atsenkã dɛ ihia enyigye mbordo wɔ w’abrabɔ mu a, bɔ mbɔdzen dɛ edze enyigye bɛbrɛ obi fofor.

Fa enyigye sɔr Ewuradze. Sɛ ekɔ asɔr a, tsim wɔ enyigye a Jesus Christ dze ma wo no do, na yi No ayew wɔ ho! Yɛ w’afamudze ma ɔmfa enyigye sunsum mbra w’Asɔr nhyiamu mu. Ma ndwom krɔnkrɔn nkã erosɔr wɔ fie na asɔr ho.

Minerva Teichert, yɛɛ Christ a Ɔhyɛ Atar Memen nsaano mfonyin

Nhyira horow a Wɔabɔ ho Anohoba

Ibotum enya enyigye ho atsenkã mber mpo a abrabɔ ayɛ dzen. Bia ɔbɛyɛ wo nwanwa dɛ iyi besi dɛn botum ayɛ. Wo gyedzi wɔ Jesus Christ mu, N’ayarsa tum, na N’onnyiewiei anohoba horow botum ama wo enyigye aber nyina. N’enyigye fua awerɛhow do na ɔdze asomdwee a ɔbor ntseasee nyina do ba.

Enyigye ne mãhyɛ rotweɔn wo wɔ Nyankopɔn ne celestial ahenman mu. Jesus Christ dzii ndzɛmba nyinara a obotum esianka wo ma nnkenya onnyiewiei enyigye no do konyim. Ber a etwer No na eka No do no, enyigye yi bɛyɛ wo dze.

Nsɛmbisa na Nyiano

Sɛ asɛmpa no yɛ enyigye, dɛn ntsi ma mowerɛ how? Iridzi awerɛhow no nnyɛ sɛnkyerɛdze dɛ eremmfa asɛmpa no mmbɔ bra. Abɛbrɛsɛ, nsɔhwɛ na awerɛhow kã obiara n’abrabɔ ho. Ereka Jesus Christ do no nnsesã iyi, mbom ɔnye wo fam Agyenkwa ho a obotum akyekye wo werɛ na Ɔaboa wo ma enya enyigye na dɛwdzi.

Dɛn ntsi na amandzehu pii rokɔ do wɔ wiadze yi mu? Wiadze yi mu amandzehu binom ba osian nkorɔfo dze hɔn pɛ yɛ nsanmuyi horow a omuo. Iyi botum dze amandzehu abrɛ hɔnankasa hɔnho na nkorɔfo binom so. Kwan binom so do no, amandzehu nnyɛ obiara no mfomdo—ɔyɛ wiadze a onndzi mu a yɛtse mu yi no nsunsuando. Mbrɛ ɔtse biara no, obotum ayɛ akomabu dɛ ibɔhwɛ obi a oruhu amandze, nkankara obia idɔ no. Nya awerɛhyɛmu dɛ Nyame so No werɛ how sɛ iruhu amandze a. Ɔma ɔnnkyebo asetsena mu nsɔhwɛ ho kwan a ɔboa wo ma inyin na eyɛ ahoboa ma onnyiewiei enyigye wɔ Ne nkyɛn, mbom Onngya wo nko ma nnhu amandze. Ɔsomaa Jesus Christ dɛ Ɔmbɛfa wo yaw ama Oeetum aaboa wo. Jesus Christ yɛ w’ahoɔdzen! Na Ɔto nsa frɛ wo, dɛ n’akadofo mu ɔbaako no, dɛ yɛ dza ibotum dze adwedwe binom hɔn amandzehu.

Hwɛ Ndwom 16:11 (enyika a ɔmee wɔ Nyankopɔn n’enyim); 95:1 (hom ntow ndwom mma Ewuradze); John 16:33 (hom nhyɛ dzen; Jesus Christ edzi wiadze do konyim); Galatiafo 5:22 (sunsum n’aba nye dɛw); Hebrews 12:2 (Jesus sɔɔw n’amandzehu osian Nyame ne mba ɔgye ho dɛw); 2 Nephi 2:25 (Nyankopɔn pɛ dɛ inya enyigye); Alma 26:15–16 (ereyɛ Nyame n’edwuma dze dɛw ba); Nkyerɛkyerɛ na Ahyɛmudzi 18:15–16 (mbrɛ w’enyigye besi bɛyɛ kɛse ber a iboa binom ma wɔba Christ hɔ).

Temple Recommend Asɛmbisa

Ana ewɔ dasegye wɔ Jesus Christ No Werdambɔ no mu na Ne dzibew dɛ w’Agyenkwa na Pomfo?